କଳାହାଣ୍ଡି,୨/୭: କଳାହାଣ୍ଡି ଜିଲ୍ଲା ଆରକ୍ଷୀ ଅଧିକ୍ଷକଙ୍କ ଆନୁକୂଲ୍ୟରେ ଆଜି (ଗୁରୁବାର) ଥୁଆପଦର ଉଚ୍ଚ ପ୍ରାଥମିକ ବିଦ୍ୟାଳୟ ଠାରେ ଏକ ସ୍ବେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି। ‘ମୋ ସରକାର’ ଯୋଜନା ମାଧ୍ୟମରେ ହେଉଥିବା ଏହି ରକ୍ତଦାନ ଶିବିରରେ ଜିଲ୍ଲା ଅତିରିକ୍ତ ଆରକ୍ଷୀ ଅଧିକ୍ଷକ ମନୋଜ କୁମାର ମହାନ୍ତ, ସଦର ଥାନା ଅଧିକାରୀ ପ୍ରଦୀପ କୁମାର ଧରୁଆ, ଥାନା କର୍ମଚାରୀ, ଥୁଆପଦର ପଞ୍ଚାୟତ ସରପଞ୍ଚ ତଥା ସ୍ଥାନୀୟ ସମାଜସେବୀ ପ୍ରମୁଖ ଉପସ୍ଥିତ ଥିଲେ ।

ଶିବିରରେ କୋଭିଡ କଟକଣା ଦୃଷ୍ଟିରୁ ସମସ୍ତେ ମାସ୍କ ପିନ୍ଧିଥିଲେ ଓ ସାମାଜିକ ଦୂରତା ବଜାୟ ରଖାଯାଇ ଥିଲା। ରକ୍ତଦାତା ମାନଙ୍କୁ ଜିଲ୍ଲା ପୋଲିସ ପକ୍ଷରୁ ସାନିଟାଇଜ କରାଯାଇଥିଲା। ଏହି ରକ୍ତଦାନ ଶିବିରରେ ୮୯ ୟୁନିଟ ରକ୍ତ ସଂଗ୍ରହ କରାଯାଇଛି।

ଶିବିରରେ ଥୁଆପଦର ଗ୍ରାମ ପଞ୍ଚାୟତ ସରପଞ୍ଚ ଚୂଡ଼ାମଣି ନାଏକ, ସ୍ଥାନୀୟ ସମାଜସେବୀ ପୌଲାଶ ରଣା, କିର୍ତ୍ତନ ନାଏକ, ଜିତେନ୍ ଗୌଡ଼, ଶ୍ରୀକାନ୍ତ ବେନିଆ, ନରେନ୍ଦ୍ର ଭୋଇ, ଅରବିନ୍ଦ ସାହୁ, ଲୋକେଶ୍ୱର ନାଏକ, ବିନୋଦ ହରପାଲ, ଦୟାନିଧି ନାଏକ, ବବଲୁ ମହାନନ୍ଦ, ସରୋଜ କୁମାର ସାହୁ, ଭରତ ଯୋଶୀ, ବିଦ୍ୟାଧର ଯୁଆଡଙ୍କ ସମେତ ଭବାନୀପାଟଣା ରକ୍ତ ଭଣ୍ଡାର କର୍ମଚାରୀ ପ୍ରମୁଖ ପରିଚାଳନାରେ ସହଯୋଗ କରିଥିଲେ। ଏହି ଶିବିରରେ ସ୍ଥାନୀୟ ବାସିନ୍ଦା ମାନେ ଯୋଗଦେଇ ରକ୍ତଦାନ କରିଥିଲେ।