ଓଡ଼ିଆ ବାର୍ତ୍ତା/ ଥୁଆମୂଳ ରାମପୁର (ଦୂର୍ଗା କୀର୍ତ୍ତି): ଗୁରୁ ଶିଷ୍ୟଙ୍କ ପବିତ୍ର ସମ୍ପର୍କ ମଧ୍ୟରେ ପୁଣିଥରେ ଲାଗିଛି କଳଙ୍କର ଦାଗ। ପ୍ରଧାନ ଶିକ୍ଷକ ଛାତ୍ରୀମାନଙ୍କୁ ଅସଦାଚରଣ କରିଥିବା ଭଲି ଏକ ସଙ୍ଗିନ ଅଭିଯୋଗ ଆସିଛି କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଳକ ଅଧିନରେ ଥିବା ଗୋପୀନାଥପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରୁ । ଏହି ବିଦ୍ୟାଳୟଟି ଆଦିବାସୀ କଲ୍ୟାଣ ବିଭାଗ ଦ୍ବାରା ପରିଚାଳିତ। ୧୦୦ ଶଯ୍ଯା ବିଶିଷ୍ଟ ଏହି ଛାତ୍ରୀ ନିବାସରେ ରହୁଥିବା ୬ ଜଣ ଛାତ୍ରୀ ଶିକ୍ଷକଙ୍କ ନାଁରେ ଏଭଳି ଅଭିଯୋଗ କରିଛନ୍ତି। ଅନ୍ତେବାସୀ ଛାତ୍ରୀ ମାନଙ୍କୁ ପ୍ରଧାନ ଶିକ୍ଷକ ଶଶୀଧର ନାଏକ ଆସଦାଚରଣ କରୁଥିବା ଅଭିଯୋଗ କରିଛନ୍ତି ଛାତ୍ରୀମାନେ । ପିଡିତା ଛାତ୍ରୀମାନେ କହିଛନ୍ତି ଯେ, ଯଦି ଏହି ବିଷୟକୁ ନିଜ ବାପା ମାଆଙ୍କୁ ଜଣାନ୍ତି ତେବେ ସାର୍ଟିଫିକେଟ ଦେଇ ବିଦ୍ଯାଳୟରୁ ବହିସ୍କାର କରିଦେବାର ଧମକ ଦେଇଥିଲେ ପ୍ରଧାନଶିକ୍ଷକ । ତେଣୁ ଭୟରେ ଛାତ୍ରୀମାନେ କାନ୍ଦି କାନ୍ଦି ହଷ୍ଟେଲରୁ ବାହାରି ଯାଉଥିବା ଦେଖି ଗୋପୀନାଥପୁର କିଛି ଗ୍ରାମବାସୀ ତାଙ୍କୁ ଅଟକାଇବା ସହିତ ଘଟଣା ବିଷୟରେ ଅବଗତ ହୋଇଥିଲେ । କିଛି ସମୟ ପରେ ଉକ୍ତ ବିଦ୍ୟାଳୟର ପରିଚାଳନା କମିଟି ସଭାପତି ସୋମେଶ୍ବର ବେହେରା ଘଟଣା ସ୍ଥଳରେ ପହଞ୍ଚି ଛାତ୍ରୀ ମାନଙ୍କୁ ସୁରକ୍ଷା ବ୍ଯବସ୍ତା କରିବା ପାଇଁ ଗ୍ରାମରେ ଥିବା ଓଏଲ୍ଏମ୍ ଗୃହରେ ରଖିବା ପରେ ଗଣଶିକ୍ଷା ବିଭାଗର ପ୍ରଦତ୍ତ ଟୋଲ୍ ଫ୍ରି ନମ୍ବରରେ ଅଭିଯୋଗକୁ ଜଣାଇଥିବା ପ୍ରକାଶ କରିଛନ୍ତି । ଅଭିଯୋଗ ପାଇ ଘଟଣାର ତଦନ୍ତ ପାଇଁ ଜିଲ୍ଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଆସିଥିଲା । ଘଟଣା ବିଷୟରେ ଛାତ୍ରୀମାନେ ବିଦ୍ୟାଳୟର ମଧ୍ୟାହ୍ନ ଭୋଜନ ରୋଷେଇ କରୁଥିବା ଦିଦିଙ୍କୁ ମଧ୍ୟ ଜଣାଇଥିବା ପ୍ରକାଶ କହିଛନ୍ତି । ଛାତ୍ରୀ ମାନଙ୍କ ଅଭିଯୋଗ ଅନୁସାରେ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ଛାତ୍ରୀମାନେ ରହୁଥିବା ହଷ୍ଟେଲକୁ କେବଳ ମହିଳା ୱାଡେନ୍ ହିଁ ପ୍ରବେଶ କରିପାରିବେ । କିନ୍ତୁ ପ୍ରଧାନ ଶିକ୍ଷକ ବିନା ଅନୁମତିରେ ପ୍ରବେଶ କରି ଛାତ୍ରୀ ମାନଙ୍କୁ ଅସଦାଚରଣ କରୁଥିବା ଅଭିଯୋଗ କରିଛନ୍ତି । ଏପରିକି ପ୍ରଧାନ ଶିକ୍ଷକ ଛାତ୍ରୀ ମାନେ ଗାଧୋଇବା ଓ ଡ୍ରେସ ପିନ୍ଧିଥିବା ସମୟରେ ଲୁଚିଛପି ଦେଖିବା ଠୁ ଆରମ୍ଭ କରି ହଷ୍ଟେଲକୁ ଅବାଧରେ ପ୍ରବେଶ କରି ଛାତ୍ରୀ ମାନଙ୍କ ଶରୀରକୁ ଛୁଇଁବା ଭଳି ମଧ୍ୟ ଅଭିଯୋଗ କରିଛନ୍ତି । ଅଭିଯୋଗ ପାଇ ବ୍ଳକ ସମ୍ପ୍ରସାରଣ ଅଧିକାରୀ ଗଙ୍ଗାଧର ବେହେରା ଓ ବ୍ଳକ ଶିକ୍ଷା ବିଭାଗ ପକ୍ଷରୁ ବିଜୟ କୁମାର ବେହୁରା ଘଟଣା ସ୍ଥଳରେ ପହଞ୍ଚି ଅଭିଯୋଗକାରୀ ଛାତ୍ରୀ ମାନଙ୍କୁ ସମସ୍ତ ବିଷୟ ସମ୍ପର୍କରେ ପଚାରିଥିଲେ । ୬ ଜଣ ଛାତ୍ରୀ ଉକ୍ତ ଘଟଣାର ଅଭିଯୋଗ ନେଇ ଲିଖିତ ଭାବରେ ପ୍ରଶାସନକୁ ଜଣାଇଥିଲେ । ଛାତ୍ରୀ ମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ତୂରନ୍ତ ଅଭିଯୁକ୍ତ ପ୍ରଧାନ ଶିକ୍ଷକ ଶଶୀଧର ନାଏକକୁ ଦାୟିତ୍ୱରୁ ହଟାଇ ଦିଆ ଯାଇ ଥିବାବେଳେ ହଷ୍ଟେଲ ଦାୟିତ୍ୱ ଶିକ୍ଷୟିତ୍ରୀ ଆଲ୍ଲାଦିନୀ ମଣି ବାଗଙ୍କୁ ହସ୍ତାନ୍ତର କରିଥିବା ସୂଚନା ମିଳିଛି । ଖବର ପାଇ ଥୁଆମୂଳ ରାମପୁର ଥାନା ଅଧିକାରୀ ଗୋବିନ୍ଦ ମାଝୀ ବିଦ୍ୟାଳୟକୁ ପହଞ୍ଚି ତନାଘନା ତଦନ୍ତ ଆରମ୍ଭ କରିଥିଲେ । ଜିଲ୍ଲା ମଙ୍ଗଳ ଅଧିକାରୀ ଏବଂ ଜିଲ୍ଲା ଚାଇଲ୍ଡ ହେଲ୍ପ ଲାଇନ୍ ବିଭାଗ ପହଞ୍ଚି ଛାତ୍ରୀ ମାନଙ୍କ ଠାରୁ ଅଭିଯୋଗ ଶୁଣିଥିଲେ । ଥୁଆମୂଳ ରାମପୁର ବିଡ଼ିଓ ଶୁଭକାନ୍ତ ନାଏକ ଓ ଥୁଆମୂଳ ରାମପୁର ଥାନା ଅଧିକାରୀ ଗୋବିନ୍ଦ ମାଝୀ ପହଞ୍ଚି ତଦନ୍ତ କରିଥିବା ଜଣାପଡିଛି । ଅଭିଯୁକ୍ତ ପ୍ରଧାନ ଶିକ୍ଷକ ଶ୍ରୀ ନାଏକଙ୍କୁ ଥାନରେ ଅଟକ ରଖାଯାଇଛି । ଏହାର ତଦନ୍ତ ପରେ ହିଁ ପ୍ରକୃତ ରହସ୍ୟ ପଦାକୁ ଆସିବା ସହିତ ପ୍ରଧାନ ଶିକ୍ଷକ ବିରୋଧରେ ପଦକ୍ଷେପ ଗ୍ରହଣ କରିବା ସହ କାର୍ଯ୍ଯାନୁଷ୍ଠାନ ଗ୍ରହଣ କରାଯିବା ବିଷୟ ଜଣାପଡିଛି ।