ବିଦ୍ୟୁତ୍ ବିଭାଗର ୩ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ ସହ ପୁଅକୁ ଚାକିରି ପାଇଁ ପ୍ରତିଶ୍ରୁତି
ଓଡ଼ିଆ ବାର୍ତ୍ତା/ ସୁବର୍ଣ୍ଣପୁର (ରାଜ କିଶୋର ତ୍ରିପାଠୀ): ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକର ଗଣ୍ଡାବାହାଲ ସ୍ଥିତ ନିଜ ବାସଭବନ ଉପରେ ଉଚ୍ଚ କ୍ଷମତା ସମ୍ପନ୍ନ ୧୧ କେଭି ବିଦ୍ୟୁତ ତାର ଯାଇଥିବା ବେଳେ ଘର ବାଲକନୀରେ ଲାଗିଥିବା ଷ୍ଟିଲ ରାଲିଂ ଓ ଏକ ପାଇପ ବିଦ୍ୟୁତ ସଂସ୍ପର୍ଶରେ ଆସି ସ୍ଵାମୀ ମୃତ୍ୟୁ ବରଣ କରିଥିବା ବେଳେ ସ୍ତ୍ରୀ ଗୁରୁତର ଆହତ ହୋଇ ବୁର୍ଲା ବଡ଼ ମେଡିକାଲରେ ଚିକିତ୍ସିତ ହେଉଛନ୍ତି । ମୃତକ ଜଣକ ହେଲେ ବାଲ୍ମିକ ପୁରୋହିତ ବୋଲି ଜଣା ପଡ଼ିଥିବା ବେଳେ ତାଙ୍କ ସ୍ତ୍ରୀ ସୁଭାଷିନୀ ପୁରୋହିତ ଗୁରୁତର ଆହତ ହୋଇ ପ୍ରଥମେ ଉଲୁଣ୍ଡା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ର ଓ ପରେ ବୁର୍ଲା ବଡ଼ ମେଡିକାଲ ଓ ପରେ ଅବସ୍ଥା ଗୁରୁତର ହେବାରୁ ରାୟପୁରର ଏକ ମେଡ଼ିକାଲରେ ଚିକିତ୍ସିତ ହେଉଛନ୍ତି। ସେପଟେ ବାଲ୍ମିକୀଙ୍କ ମୃତଦେହ ବ୍ୟବଚ୍ଛେଦ ପରେ ସୋନପୁରରୁ ଗଣ୍ଡବାହାଲ ପହଞ୍ଚିବା ପରେ ସମାଜସେବୀ ନିରୋଦ ପୁରୋହିତ ଓ ସ୍ଥାନୀୟ ଲୋକେ କ୍ଷତିପୂରଣ ଦାବିରେ ରାସ୍ତାରୋକ ପାଇଁ ପ୍ରସ୍ତୁତ ହେଉଥିବା ବେଳେ ଉଲୁଣ୍ଡା ତହସିଲଦାର ଦିଲିପ ମାଝୀ, ବୀରମହାରାଜପୁର ଏସଡିପି ବାସୁଦେବ ଛତ୍ରିଆ ଓ ବିଦ୍ୟୁତ୍ ବିଭାଗ ଅଧିକାରୀ ପହଞ୍ଚି ତହସିଲଦାରଙ୍କ ଉପସ୍ଥିତିରେ ବିଦ୍ୟୁତ୍ ବିଭାଗ ଅଧିକାରୀ କ୍ଷତିପୂରଣ ବାବଦକୁ ୩ ଲକ୍ଷ ଟଙ୍କା ସହ ମୃତ ବାଲ୍ମିକୀଙ୍କ ପୁଅକୁ ଚାକିରି ଦେବାପାଇଁ ପ୍ରତିଶ୍ରୁତି ଦେଇଥିଲେ l ଘର ଆଗରେ ଥିବା ତାରକୁ ପ୍ଲାଷ୍ଟିକ କଭର ସହ ଆଗକୁ ତାରକୁ ହଟା ଯିବ ବୋଲି ସୁଚନା ଦେଇଥିଲେ। ସେହିପରି ସହରରେ ତଥା ଗ୍ରାମାଞ୍ଚଳରେ ମୁକୁଳା ହୋଇ ପଡିଥିବା ବିଦ୍ୟୁତ ତାର ତଥା ଟ୍ରାନସଫରମରର ରକ୍ଷଣାବେକ୍ଷଣ ପାଇଁ ବୁଦ୍ଧଜୀବୀମାନେ ଦାବି କରିଛନ୍ତି।
