ଇଞ୍ଜାମାମ କହିଲେ ହରଭଜନ ଇସଲାମ ଧର୍ମ ଗ୍ରହଣ କରିବାକୁ ଚାହୁଁଥିଲେ

ଓଡ଼ିଆ ବାର୍ତ୍ତା/ ଚଣ୍ଡୀଗଡ: ପାକିସ୍ତାନ କ୍ରିକେଟ ଟିମର ପୂର୍ବତନ ଅଧିନାୟକ ଇଞ୍ଜାମାମ ଉଲ ହକଙ୍କ ଏକ ବୟାନ ଏବେ ଭାଇରାଲ ହେବାରେ ଲାଗିଛି । ଏଥିରେ ସେ ଭାରତର ଅଫ ସ୍ପିନର ହରଭଜନ ସିଂ ଇସଲାମ ଧର୍ମ ଗ୍ରହଣ କରିବାକୁ ଚାହୁଁଥିଲେ ବୋଲି କହିଛନ୍ତି । ଯାହାକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହେବାରେ ଲାଗିଛି । ଭଜି ଏହି ବୟାନରେ କ୍ଷୁବ୍ଧ ହୋଇ କହିଛନ୍ତି ସେ କେଉଁ ନିଶା ସେବନ କରି ଏ ଭଳି କହୁଛନ୍ତି । ମୁଁ ଭାରତୀୟ ଭାବେ ନିଜକୁ ଗର୍ବ ଅନୁଭବ କରେ । ମୁଁ ଏକ ଭାରତୀୟ ଶିଖ ଅଛି ଓ ରହିବି । ମୂର୍ଖଲୋକମାନେ ସବୁବେଳେ ଏ ଭଳି ମୂର୍ଖାମୀ କଥା କହିବେ ବୋଲି ଭଜି କହିଛନ୍ତି । ମୌଲାନା ତାରିକ ଜମୀଲଙ୍କୁ ଭେଟିବା ପରେ ହରଭଜନ ଇସଲାମ ଧର୍ମ ପ୍ରତି ଆକୃଷ୍ଟ ହୋଇଥିଲେ । ଏପରିକି ସେ ଧର୍ମ ପରିବର୍ତନ କରିବାକୁ ଚାହୁଁଥିଲେ ବୋଲି ହକ କହିଛନ୍ତି । ମୌଲାନା ପାକିସ୍ତାନ ଟିମ ସହିତ ଅଧିକାଂଶ ସମୟ ନମାଜ ପଢ଼ିବାକୁ ଆସିଥାନ୍ତି ।