ଓଡ଼ିଆ ବାର୍ତ୍ତା/ ଭୁବନେଶ୍ୱର (ନିଲେଶ କୁମାର ନାଗ): ବିଜେଡ଼ିର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ବଳଭଦ୍ର ମାଝୀ ଦୀର୍ଘ ୫ବର୍ଷରୁ ଉର୍ଦ୍ଧ୍ବ ହେଲା କୋଣଠେଷା ହୋଇ ଦଳରେ ରହୁଥିଲେ। ବିଜେଡ଼ିର ବିଭିନ୍ନ କାର୍ଯ୍ୟକ୍ରମରେ ମଧ୍ୟ ଯୋଗ ଦେଉଥିଲେ। ହେଲେ ବିଜେଡ଼ି ସୁପ୍ରିମୋ ଓ ସ୍ଥାନୀୟ କର୍ମୀ ତାଙ୍କୁ ଅଣଦେଖା କରୁଥିଲେ। ଏହାକୁ ନେଇ ବଳଭଦ୍ରଙ୍କ ସମର୍ଥକ ମହଲରେ ତ୍ରିବ ଅସନ୍ତୋଷ ପ୍ରକାଶ ପାଉଥିଲା। ତଥାପି କଳାହାଣ୍ଡି ବିଜେଡ଼ିର ବରିଷ୍ଠ ନେତା ବଳଭଦ୍ର ମାଝୀ ନିଜ ଦଳକୁ ଛାଡିନଥିଲେ। ହେଲେ ଆଗକୁ ୨୦୨୪ ନିର୍ବାଚନ। ଏହାକୁ ଦୃଷ୍ଟିରେ ରଖି ବଳଭଦ୍ର ମାଝୀ ସୋମବାର ଶଙ୍ଖ ଛାଡିଛନ୍ତି। ଆଜି ରାଜ୍ୟ ବିଜେଡ଼ି ସଭାପତିଙ୍କୁ ତାଙ୍କ ପ୍ରାଥମିକ ସଦସ୍ୟତାରୁ ଇସ୍ତଫା ପତ୍ର ପ୍ରଦାନ କରିଛନ୍ତି। ଏହି ଖବର ଜଣାପଡିବା ପରେ କଳାହାଣ୍ଡିରେ ତିବ୍ର ପ୍ରତିକ୍ରିୟା ପ୍ରକାଶ ପାଇଛି। ବଳଭଦ୍ର ମାଝୀଙ୍କୁ ଏସମ୍ପର୍କରେ ପଚାରିବାରୁ ଦୀର୍ଘ ୫ ବର୍ଷ ହେଲା ବିଜେଡ଼ି ମୋତେ ଅଣଦେଖା କରିଛି। ଶେଷରେ ବାଧ୍ୟହୋଇ ରାଜ୍ୟ ସଭାପତିଙ୍କୁ ମୋର ଇସ୍ତଫା ପ୍ରଦାନ କରିଛି ବୋଲି କହିଛନ୍ତି। ୧୯୯୭ ମସିହାରୁ ବଳଭଦ୍ର ମାଝୀ ଏହି ଦଳରେ ଥାଇ ୫ଥର ବିଧାୟକ ୨ଥର ମନ୍ତ୍ରୀ ହୋଇଥିଲେ। ହେଲେ କ’ଣ ପାଇଁ ଦଳ ତାଙ୍କୁ ଅଣଦେଖା କଲା ତାହା ବିରାଟ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ତେବେ ଆଗକୁ କେଉଁ ଦଳର ସଦସ୍ୟତା ଗ୍ରହଣ କରିବେ ତାହା ଏଯାଏଁ କିଛି ସ୍ପଷ୍ଟ କରିନାହାନ୍ତି ଶ୍ରୀଯୁକ୍ତ ମାଝୀ। ଶ୍ରୀଯୁକ୍ତ ମାଝୀଙ୍କୁ ପଚାରିବାରୁ ସମର୍ଥକଙ୍କ ନିଷ୍ପତ୍ତି ହିଁ ମୋର ଶେଷ ନିଷ୍ପତ୍ତି ବୋଲି ପ୍ରକାଶ କରିଛନ୍ତି। ହେଲେ ବର୍ତମାନ ଲାଞ୍ଜିଗଡ଼ ନିର୍ବାଚନମଣ୍ଡଳୀର ରାଜନୈତିକ ଦୃଶ୍ୟପଟ ବଦଳିଯାଇଛି। ବର୍ତ୍ତମାନ ବିଜେଡ଼ି ଦଳରୁ ବଳଭଦ୍ର ଇସ୍ତଫା ଦେବାପରେ ଲାଞ୍ଜିଗଡ଼ ବିଧାୟକ ପ୍ରଦୀପ ଦିଶାରୀଙ୍କ ଚିନ୍ତା ବଢ଼ିଯାଇଛି। ହେଲେ ଆଗକୁ ଦେଖିବାକୁ ବାକି ରହୁଛି ବଳଭଦ୍ର ମାଝୀ କେଉଁ ଦଳରେ ଯୋଗ ଦେଉଛନ୍ତି। କିନ୍ତୁ ବଳଭଦ୍ର ମାଝୀଙ୍କ ଇସ୍ତଫାକୁ ନେଇ ଶାସକ ଦଳର ହୃସ୍ପଦନ ବଢ଼ିଯାଇଛି।
