ଓଡ଼ିଆ ବାର୍ତ୍ତା/ ଜୁନାଗଡ଼ (ସ୍ବାସ୍ତିଦୀପ ଆଦିତ୍ୟ): ନିକଟରେ ରାଜ୍ୟ ସରକାର ନୂତନ ଏନଏସି ଓ ମୁନସିପାଲଟି ଘୋଷଣା କରିଛନ୍ତି । ତେବେ ଆଶା ଥିଲା ଜୁନାଗଡ଼ ମୁନସିପାଲଟି ମାନ୍ୟତା ପାଇବ କିନ୍ତୁ ସହରବାସୀଙ୍କ ଆଶା ନିରାଶାରେ ପରିଣତ ହେଲା । ଏହାକୁ ନେଇ ଜୁନାଗଡରେ ଅଶାନ୍ତିର ବାତାବରଣ ଖେଳିଯାଇଛି । ସହରବାସୀ, ବିଭିନ୍ନ ସଂଗଠନ, ବ୍ୟକ୍ତି ବିଶେଷ ଓ ରାଜନୈତିକ ଦଳମାନେ ଜୁନାଗଡ଼କୁ ମୁନସିପାଲଟି ମାନ୍ୟତା ଦାବି କରିଛନ୍ତି । ଯଦି ନିର୍ବାଚନ ପୂର୍ବରୁ ମୁନସିପାଲଟି ଘୋଷଣା ନହୁଏ ତେବେ ଆନ୍ଦୋଳନ ଜୋରଦାର ହେବ ବୋଲି ସୂଚନା ରହିଛି ।
ଐତିହାସିକ ତଥ୍ୟ ଅନୁଯାୟୀ କଳାହାଣ୍ଡି ମହାରାଜା ଯୁଗସାଇଦେବଙ୍କ ସମୟରେ ୧୭୧୮ମସିହାରେ ଜୁନାଗଡ଼ କଳାହାଣ୍ଡି ନଗର ଓ ପରବର୍ତ୍ତୀ ସମୟରେ ଜେନାବଳୀ ପାଟଣା ନାମରେ ପରିଚିତ ଥିଲା । ଏହା ଜୁନାଗଡ଼ର ଦଧିବାମନ ମନ୍ଦିରର ଶିଳାଲିପିରେ ଲେଖା ହୋଇଥିବା ଅକ୍ଷରରୁ ଜଣାପଡେ । ପରବର୍ତ୍ତୀ ସମୟରେ ୧୮୪୯ ମସିହାରେ କଳାହାଣ୍ଡି ମହାରାଜା ଫତେ ନାରାୟଣ ଦେଓଙ୍କ ସମୟରେ କଳାହାଣ୍ଡିର ରାଜଧାନୀ ଭବାନୀପାଟଣାକୁ ସ୍ଥାନାନ୍ତରିତ କରାଯାଇଥିଲା । ହଜାରେ ବର୍ଷର ମନ୍ଦିର ମାଳିନୀ ସହର ଜୁନାଗଡ଼ କଟକ ସହର ପରି ଏହାର ଐତିହାସିକ ମହତ୍ଵ ରହିଛି। ଛଅକୋଡ଼ି ବନ୍ଧକୁ ନଅ କୋଡ଼ି ତୋଟା ଏବେ ମଧ୍ୟ ମୂକସାକ୍ଷୀ ଅଛି ।
ଜୁନାଗଡ଼ କଳାହାଣ୍ଡିର ପ୍ରଥମ ରାଜଧାନୀ ଭାବରେ ରାଜା ଅମଳରୁ ଥିଲା । ୧୯୭୦ମସିହା ମାର୍ଚ୍ଚ ୧୮ ତାରିଖ ରେ ଜୁନାଗଡ଼ ଏନଏସି ଗଠନ ହେଇଛି ଆଜିକୁ ୫୪ବର୍ଷ ହେଇଗଲାଣି । ଜୁନାଗଡ଼ ସହରରେ ପ୍ରାୟ ୨୫ହଜାର ଲୋକ ବସବାସ କରୁଛନ୍ତି । ଜୁନାଗଡ଼କୁ ଲାଗି କିଛି ରହିଥିବା କିଛି ଗ୍ରାମକୁ ନେଇଗଲେ ଏହାର ଜନସଂଖ୍ୟା ପ୍ରାୟ ୩୫ହଜାର ରୁ ଉର୍ଦ୍ଧ ହେଇଯିବ । ଏତେଦିନ ବିତିଗଲେ ମଧ୍ୟ ଆଜିପଯ୍ୟନ୍ତ ଜୁନାଗଡ଼ ଏନଏସିର ନିଜସ୍ୱ ଘର ଗୋଟାଏ ମଧ୍ୟ ନାହିଁ । ପାଠାଗାରରେ ଚାଲିଛି ଅଫିସ ଗୃହ । ଲଗାତାର ୧୯୯୫ ରୁ ୧୯୯୯ ଚାରି ବର୍ଷ ଧରି ଓଡିଶା ରେ ଶ୍ରେଷ୍ଠ ଏନଏସି ଭାବରେ ମଧ୍ୟ ଆଖ୍ୟା ପାଇଛି । ଏହା ସହିତ ଗତବର୍ଷ ଦ୍ରୁତଗାମୀ ସହର ଭାବରେ ମହାମହିମ ରାଷ୍ଟ୍ରପତି ମଧ୍ୟ ଦିଲ୍ଲୀ ଠାରେ ପୁରସ୍କିତ କରିଛନ୍ତି । ଦୀର୍ଘ ଦିନର କୋଠା ରେ ଅଫିସ ଗୃହ ଚାଲି ଥିବାରୁ ଏହା ଯୋଗୁ କୋଠାର ଅବସ୍ଥା ମଧ୍ୟ ଶୋଚନୀୟ ଅଛି ।
ତେଣୁ ଏହି ଏନଏସିକୁ ମୁନ୍ସିପାଲିଟି ଘୋଷଣା ଦାବି ନେଇ ପୂର୍ବତନ ନଗରପାଳ ସୁଧାଂଶୁ ଶେଖର ବରାଡ଼, କଂଗ୍ରେସ ଜିଲ୍ଲା ସାଧାରଣ ସମ୍ପାଦକ ପ୍ରଭାତ କୁମାର ଦାଶ, ଯୁବ ନେତା ସାଉଲ ମଙ୍ଗରାଜ ପ୍ରମୁଖ ଦାବିପତ୍ର ଦେବା ସହିତ ଚେତାବନୀ ଦେଇଛନ୍ତି । ନିର୍ବାଚନ ପୂର୍ବରୁ ଯଦି ମୁନ୍ସିପାଲଟି ମାନ୍ୟତା ନ ଦିଅନ୍ତି ତାହେଲେ ଆନ୍ଦୋଳନର ପନ୍ଥା ଆପଣେଇବେ ବୋଲି ସରକାରକୁ ଲିଖିତ ଭାବେ ଜଣାଇଛନ୍ତି ।
