ଓଡ଼ିଆ ବାର୍ତ୍ତା/ କଟକ: ପବିତ୍ର ବାହୁଡ଼ା ଏବଂ ସୁନାବେଶ ଅବସରରେ କୈବଲ୍ୟ ସାହିତ୍ୟ ସଂସଦ ଆନୁକୁଲ୍ୟରେ ” ବାହୁଡା଼ ବ୍ରହ୍ମ ଆଧ୍ୟାତ୍ମିକ ଲୋକ ମହୋତ୍ସବ ଦୋଳ ମୁଣ୍ଡେଇ, ଚାନ୍ଦିନଚୌକ ଏବଂ ରାଣୀହାଟ ଠାରେ ଅନୁଷ୍ଠିତ ହୋଇ ଯାଇଛି । ଏହା ସାହିତ୍ୟ ସେବା ଏବଂ ସଂସ୍କୃତି ସମ୍ମିଳିତ ନିଆରା ପରମ୍ପରାରେ ଆୟୋଜିତ ରାଜ୍ୟସ୍ତରୀୟ ୭୨ ତମ କାର୍ଯ୍ୟକ୍ରମ । ଦୋଳ ମୁଣ୍ଡେଇ ମାଉସୀମା ମନ୍ଦିର ପ୍ରାଙ୍ଗଣରେ ସାହିତ୍ୟିକ ଏବଂ କଣ୍ଠଶିଳ୍ପୀ ମାନେ ତିନି ରଥ ସମ୍ମୁଖରେ ଜଗନ୍ନାଥ ଜଣାଣ ଏବଂ ଭକ୍ତି ସଙ୍ଗୀତ ଗାନ କରିଥିଲେ । କବି କବୟିତ୍ରୀମାନେ କବିତା ପାଠ କରିଥିଲେ । ଅତିଥି ବୃନ୍ଦ ଆଧ୍ୟାତ୍ମିକ ଭବନାରେ ବାହୁଡା଼ ଯାତ୍ରା ଏବଂ ସୁନାବେଶ ମହିମାକୁ ବ୍ୟାଖ୍ୟା କରିଥିଲେ । କୁନି ପ୍ରତିଭା ନୃତ୍ୟ ଏବଂ ଜଗନ୍ନାଥ ଜଣାଣ ଗାନ କରି ଭକ୍ତ ମାନଙ୍କୁ ଆନନ୍ଦ ପ୍ରଦାନ କରିଥିଲେ । ଅନୁଷ୍ଠାନର ପ୍ରତିଷ୍ଠାତା ଓ ସମ୍ପାଦକ ଡ଼କ୍ଟର ସଂଗ୍ରାମ କେଶରୀ ସାମନ୍ତରାୟ ସ୍ବାଗତ ଭାଷଣ ପ୍ରଦାନ କରିଥିଲେ । ଏହି ଅବସରରେ ଅତିଥି ଭାବେ ଡ. ନୀଳକଣ୍ଠ ରାଉତ , ଶିକ୍ଷାବିତ ଶ୍ରୀଯୁକ୍ତ ବ୍ରହ୍ମାନନ୍ଦ ମହାନ୍ତି ସଭାପତି ଉତ୍କଳ ଗ୍ରାମ୍ୟ ସ୍ବରାଜ, ଗୋଦାବରୀଶ ଦାସ, ନବ କିଶୋର ସାମନ୍ତରାୟ , ଡ଼କ୍ଟର ଲକ୍ଷ୍ମଣ ସାହୁ , ବିରେନ୍ଦ୍ର କୁମାର ଜେନା , ଭଗବତୀ ଖଟୁଆ,ଅଜୟ କୁମାର ପଣ୍ଡା , ରଜ କିଶୋର ସ୍ୱାଇଁ , ସୁରେନ୍ଦ୍ର ମହାପାତ୍ର, ଡ଼କ୍ଟର ପ୍ରିୟମ୍ବଦା ଦାସ, ବୈଷ୍ଣବ ଚରଣ ଲେଙ୍କା , କୃଷ୍ଣ ଚନ୍ଦ୍ର ପତି, ସଂହିତା ଜେନା, ଅମିତା ମହାନ୍ତି, ଡ଼କ୍ଟର ବୈଜୟନ୍ତୀ ମାଳା ଶତପଥୀ , ସୁଧାଶ୍ରୀ ପଣ୍ଡା, ଅପରାଜିତା ପରିଡ଼ା ଯୋଗଦାନ କରିଥିଲେ । ଶତାଧିକ ପୋଲିସ ଅଧିକାରୀ ଏବଂ ସାମାଜିକ ସେବା ଅଧିକାରୀଙ୍କୁ ବାହୁଡ଼ା ବ୍ରହ୍ମ ସେବା ସମ୍ମାନ ପ୍ରଦାନ କରାଯାଇଥିଲା । ବିଭିନ୍ନ ଜିଲ୍ଲାରୁ ଆସିଥିବା ସାହିତ୍ୟିକ ସାହିତ୍ୟିକା ମାନଙ୍କୁ ବାହୁଡ଼ା ବ୍ରହ୍ମ ସାରସ୍ବତ ସମ୍ମାନ ପ୍ରଦାନ କରାଯାଇଥିଲା । ଲେଖକ ଅଜୟ କୁମାର ପଣ୍ଡା ଙ୍କ ” ଜୀବନ ଜିଇଁବାକୁ ” ପୁସ୍ତକର ଶୁଭ ଉନ୍ମୋଚନ କରାଯାଇଥିଲା । ଶୁଭବ୍ରତ ମହାପାତ୍ର ଧନ୍ୟବାଦ୍ ଅର୍ପଣ କରିଥିଲେ ।
