ଓଡ଼ିଆ ବାର୍ତ୍ତା/ ବାଲେଶ୍ବର (କୃଷ୍ଣ କୁମାର ମହାନ୍ତି): ରାଜ୍ୟର ଯେତେ ସଂଗଠନ ସଂପର୍କରେ ଆସିଛି, ବାଲେଶ୍ବର ରକ୍ତଦାତା ସଂଘ ରକ୍ତ ସଂଗ୍ରହ କ୍ଷେତ୍ରରେ ସବୁବେଳେ ଆଖିଦୃଶିଆ ହୋଇ ରହିଛି। ରକ୍ତଦାତା ହେଉଛନ୍ତି ଈଶ୍ବରଙ୍କ ପ୍ରତିନିଧି। ଈଶ୍ବରଙ୍କ ଆଶୀର୍ବାଦ ମିଳିଛି ବୋଲି ରକ୍ତଦାତା ଏହା ଭାବିବା ଉଚିତ। ବିଜ୍ଞାନ ଯୁଗରେ ସବୁକଥା ମଣିଷ କରିପାରିଛି, କିନ୍ତୁ ରକ୍ତ ତିଆରି କାରଖାନା କରିପାରିନାହିଁ। ଯେତେ ବଡ଼ ଲୋକ ହୁଅନ୍ତୁ ନା କାହିଁକି, ସେ ରକ୍ତ ପାଇଁ ଆଉ ଜଣଙ୍କ ଉପରେ ନିର୍ଭର କରିବାକୁ ପଡ଼ିଥାନ୍ତି। ନିଜର ଅହଙ୍କାରକୁ ଦମନ କରିବା ପାଇଁ ଈଶ୍ବର ବି ଏଭଳି ଏକ ଉଦାହରଣ ତିଆରି କରିଛନ୍ତି। ତେଣୁ ବିନା ରକ୍ତରେ ଚିକିତ୍ସା ଅସମ୍ଭବ ବୋଲି ବାଲେଶ୍ବର ସହର ସ୍ଥିତ ଭେନିଆ ପାରାଡାଇଜ୍ କଲ୍ୟାଣ ମଣ୍ଡପରେ ଅନୁଷ୍ଠିତ ବାଲେଶ୍ବର ଜିଲ୍ଲା ରକ୍ତଦାତା ସଂଘର ବାର୍ଷିକ ସମ୍ମିଳନୀରେ ଅତିଥିମାନେ ଯୋଗ ଦେଇ ମତବବ୍ୟକ୍ତ ଅରିଛନ୍ତି। ସଂଘର ସଭାପତି କମଲ ଚକ୍ରବର୍ତ୍ତୀଙ୍କ ସଭାପତିତ୍ବରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏଥିରେ ମୁଖ୍ୟଅତିଥି ଭାବେ ‘ସମ୍ବାଦ’ର ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ ଯୋଗ ରକ୍ତଦାତାଙ୍କୁ ଈଶ୍ବରଙ୍କ ପ୍ରତିନିଧି ବୋଲି କହିଥିଲେ। ମା’ମାନେ ନିଜ ପିଲାଙ୍କୁ ରକ୍ତ ଦେବାକୁ ମନା ନକରି ସେମାନଙ୍କୁ ଉତ୍ସାହିତ କରନ୍ତୁ, ଗୋଟିଏ ୟୁନିଟ୍ ରକ୍ତଦାନ କଲେ କେମିତି ତିନୋଟି ଖୁସି ମିଳିଥାଏ, ସେ ସଂପର୍କରେ ମଧ୍ୟ ବୁଝାଇଥିଲେ। ସେ ଆହୁରି କହିଥିଲେ, ରକ୍ତଦାନ ଅଭିଯାନ ସେଇଦିନ ସଫଳ ହେବ, ଯେଉଁଦିନ ବାଲେଶ୍ବର ମୁସଲମାନ ବ୍ୟକ୍ତି ପୁରୀର ଦଇତାପତିଙ୍କ ପୁଅକୁ ରକ୍ତଦେଇ ଜୀବନ ରକ୍ଷା କରିବ। ରକ୍ତଦାନ ସହିତ ଭୋଟ୍ ଦାନ କରିବାକୁ ଶ୍ରୀ ପଟ୍ଟନାୟକ ଆହ୍ବାନ ମଧ୍ୟ ଦେଇଥିଲେ। ଏଥିରେ ଅନ୍ୟତମ ଅତିଥି ଭାବେ ବାଲେଶ୍ଵର ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ ଯୋଗ ଦେଇ କହିଥିଲେ, ରକ୍ତର ବିକଳ୍ପ କିଛି ନାହିଁ। ଯେଉଁମାନେ ରକ୍ତ ଦେଉଛନ୍ତି, ସେମାନେ ଏକ ପ୍ରକାର ତପସ୍ୟା କରୁଛନ୍ତି ବୋଲି କହିଥିଲେ। ସରକାରୀ ଦଳର ଉପମୁଖ୍ୟ ସଚେତକ ତଥା ରେମୁଣା ବିଧାୟକ ଗୋବିନ୍ଦ ଚନ୍ଦ୍ର ଦାସ ଯୋଗ ଦେଇ ରକ୍ତ ବିନା କାହାକୁ ମରିବାକୁ ଦେବା ନାହିଁ ବୋଲି ସମସ୍ତଙ୍କୁ ଆହ୍ବାନ ଦେଇଥିଲେ। ବାହାନଗା ଟ୍ରେନ୍ ଦୁର୍ଘଟଣାରେ ବାଲେଶ୍ବରର ରକ୍ତଦାତାଙ୍କ ଅବଦାନକୁ ମନେ ପକାଇ ସେମାନଙ୍କୁ ଧନ୍ୟବାଦ ଜଣାଇଥିଲେ। ନୀଳଗିରି ବିଧାୟକ ସନ୍ତୋଷ ଖଟୁଆ ଯୋଗଦେଇ ରକ୍ତ ଦେଇ ରକ୍ତଦାତା କିଭଳି ଶାରୀରିକ ଭାବେ ଲାଭବାନ୍ ହୋଇଥାନ୍ତି ସେସଂପର୍କରେ ବୁଝାଇଥିଲେ। ଜଳେଶ୍ବର ବିଧାୟକ ଅଶ୍ବିନୀ କୁମାର ପାତ୍ର ଯୋଗ ଦେଇ ପ୍ରକୃତ ରକ୍ତର ବନ୍ଧୁ ସିଏ, ଯିଏ ରକ୍ତଦେଇ ଜଣଙ୍କର ଜୀବନ ବଂଚାଇଥାନ୍ତି ବୋଲି କହିଥିଲେ। ବସ୍ତା ବିଧାୟିକା ସୁବାସିନୀ ଜେନା ଯୋଗ ଦେଇ ପୁରୁଣା ରକ୍ତଦାତାଙ୍କ ସହିତ କିଭଳି ଅଧିକ ନୂଆ ରକ୍ତଦାତା ସୃଷ୍ଟି କରାଯିବ ସେ ସଂପର୍କରେ ଗୁରୁତ୍ବ ଦେଇଥିଲେ। ଭୋଗରାଇ ବିଧାୟକ ଗୌତମବୁଦ୍ଧ ଦାସ ଯୋଗ ଦେଇ ‘ସମ୍ବାଦ-ଆମଓଡ଼ିଶା’ ରକ୍ତଦାନ ଅଭିଯାନକୁ ସାକାର କରିପାରିଛି ବୋଲି କହିଥିଲେ। ଏହି ଅଭିଯାନକୁ ତତ୍କାଳୀନ ସରକାର ଅନୁସରଣ କରି ଜୀବନ ବିନ୍ଦୁ ଅଭିଯାନ ଆରମ୍ଭ କରିଥିଲେ। ତେଣୁ ସବୁ ଶ୍ରେୟ ଶ୍ରୀ ପଟ୍ଟନାୟକଙ୍କୁ ସେ ଦେଇଥିଲେ। ସେହିପରି ଜିଲ୍ଲା ମୁଖ୍ୟ ଚିକିତ୍ସାଳୟ ପରି ଫକୀରମୋହନ ମେଡିକାଲ କଲେଜ ଓ ହସ୍ପିଟାଲରେ ଏକ ରକ୍ତକେନ୍ଦ୍ର ଖୋଲିବାକୁ ଦାବି କରିବା ସହିତ ଏଥିପାଇଁ ଉଦ୍ୟମ ହେବା ଦରକାର ବୋଲି କହିଥିଲେ। ଜିଲ୍ଲା ରକ୍ତକେନ୍ଦ୍ରର ଡା. ବସନ୍ତ କୁମାର ଉପାଧ୍ୟାୟ ଯୋଗ ଦେଇ ବକ୍ତବ୍ୟ ରଖିଥିଲେ। ଏହି ଅବସରରେ ରକ୍ତଦାନ କ୍ଷେତ୍ରରେ ଉଲ୍ଲେଖନୀୟ ସଫଳତା ପାଇଁ ଜିଲ୍ଲାର ବିଭିନ୍ନ ସଂଗଠନକୁ ସମ୍ବର୍ଦ୍ଧିତ କରାଯାଇଥିଲା। ଏହି ଉପଲକ୍ଷେ ପଦ୍ମଲୋଚନ ଦତ୍ତ ସଂଘକୁ ୫୦ ହଜାର ଟଙ୍କା ସହାୟତା ପ୍ରଦାନ କରିଥିଲେ। ଗୌରାଙ୍ଗ ପାଣିଗ୍ରାହୀ ମଞ୍ଚ ଆହ୍ବାନ କରିଥିଲେ। ଶ୍ରୀ ଚକ୍ରବର୍ତ୍ତୀ ସ୍ବାଗତ ସମ୍ବାଷଣ ରଖିଥିବା ବେଳେ ଡା. କୁମାର ଗୋପାଲ ଅତିଥି ପରିଚୟ ଦେଇଥିଲେ। ସାଧାରଣ ସଂପାଦକ ଇଂ. ହୃଷିକେଶ ସାହୁ ବାର୍ଷିକ ବିବରଣୀ ପାଠ କରିଥିଲେ। ଏହି ଅବସରରେ ସଂଘର ସ୍ମରଣିକା ଅତିଥିମାନେ ଉନ୍ମୋଚନ କରିଥିଲେ। ସହଯୋଗୀ ମନୋରଂଜନ ଦାସ, ଦେବାଶିଷ ପାଣି ପୁରସ୍କାର ଓ ସମ୍ବର୍ଦ୍ଧନା ପର୍ବକୁ ପରିଚାଳନା କରିଥିଲେ। ଶ୍ରୀ ଦାସ ଧନ୍ୟବାଦ ଦେଇଥିଲେ। ସମ୍ମିଳନୀକୁ ରକ୍ତଦାତା ସଂଘର ଉପ ସଭାପତି ସୁବ୍ରତ କୁମାର ରଣା, ଲକ୍ଷ୍ମୀଧର ବାରିକ, ସୋମିକ ବାବୁ, ସୁମନ୍ତ କୁମାର ଜେନାଙ୍କ ସହ ସଂଘର ସମସ୍ତ କର୍ମକର୍ତ୍ତା ପରିଚାଳନାରେ ସହଯୋଗ କରିଥିଲେ।
