ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): ‘ଓଡ଼ିଆ ଭାଷା ବିକାଶ ଆନ୍ଦୋଳନ’ ତରଫରୁ ‘ସ୍ରଷ୍ଟା’ ନାଟ୍ୟାଳୟ ପରିସରରେ ଏକ ମନୋଜ୍ଞ ହାସ୍ୟବ୍ୟଙ୍ଗ କବିତା ଆସର ଅନୁଷ୍ଠିତ ହୋଇଯାଇଛି। ଏହି ଉତ୍ସବରେ ପୌରୋହିତ୍ଯ କରିଥିଲେ ବିଶିଷ୍ଟ ଲେଖକ ଓ ଭେଷଜ ବିଶେଷଜ୍ଞ ଡାକ୍ତର ଚୌଧୁରୀ ସତ୍ୟବ୍ରତ ନନ୍ଦ। ସେ ତାଙ୍କ ଅଭିଭାଷଣରେ ହାସ୍ୟକୁ ଏକ ଶକ୍ତିବର୍ଦ୍ଧନକାରୀ ଔଷଧ ରୂପେ ଅଭିହିତ କରିଥିଲେ। ମନ ମଧ୍ଯରେ କୌଣସି ଚିନ୍ତା ରହିଥିଲେ ତଥା ମନ ଅସ୍ଥିର ଓ ଅଥୟ ହେଉଥିଲେ ତାହାକୁ ସୁସ୍ଥ କରିବା ପାଇଁ ମନକୁ ପ୍ରଫୁଲ୍ଲିତ କରିବା ଆବଶ୍ୟକ। ସେଇଥିପାଇଁ ମଣିଷକୁ ବିଭିନ୍ନ ସାଂସ୍କୃତିକ ଅନୁଷ୍ଠାନରେ ଯୋଗ ଦେଇ ମାନସିକ ସୁସ୍ଥତାକୁ ବଜାୟ ରଖିବା ଦରକାର। ମନକୁ ପ୍ରଫୁଲ୍ଲ ରଖିବାର ସର୍ବଶ୍ରେଷ୍ଠ ଉପାଦାନ ହେଲା ହାସ୍ୟ ଓ ବ୍ୟଙ୍ଗ ରସାତ୍ମକ ନାଟକ ଦେଖିବା କିମ୍ବା ହାସ୍ୟ କବିତା ଶ୍ରବଣ କରିବା। ବରିଷ୍ଠ ସାରସ୍ଵତ ସାଧକମାନଙ୍କର ମନକୁ ପ୍ରଫୁଲ୍ଲ ରଖିବା ପାଇଁ ‘ଓଡ଼ିଆ ଭାଷା ବିକାଶ ଆନ୍ଦୋଳନ’ ତରଫରୁ ଏହିପରି କାର୍ଯ୍ୟକ୍ରମର ଆୟୋଜନ କରାଯାଇଛି ବୋଲି ସେ କହିଥିଲେ । ସବୁଠାରୁ ଆକର୍ଷଣୀୟ ଥିଲା ଭୁବନେଶ୍ବରରୁ ଆସିଥିବା ଚମକ ଚାନ୍ଦିନୀ ଦାଶ ନାମକ ଜଣେ ବ୍ୟଙ୍ଗ କବୟିତ୍ରୀଙ୍କର ଏକାଧିକ କବିତା ପାଠ। ତାଙ୍କର ମନୋମୁଗ୍ଧକର କବିତା ପାଠ ଶ୍ରୋତାଗଣଙ୍କୁ ଆପ୍ୟାୟିତ କରିଥିଲା। ଏହାବ୍ୟତୀତ ଏହି ଆସରରେ ହାସ୍ୟକବି ବ୍ରହ୍ମନାଥ ରଥ, ପ୍ରଭାକର ସାହୁ (ରେମୁଣୀ), ପ୍ରତିଷ୍ଠିତ ହାସ୍ୟକବି ପଦ୍ମଲୋଚନ ପ୍ରଧାନ, ବାଲେଶ୍ଵରର ଅନ୍ୟତମ କବି ସୁବାସ ସ୍ଵାଇଁ ମଧ୍ଯ ସ୍ଵରଚିତ ହାସ୍ୟବ୍ୟଙ୍ଗ କବିତା ପାଠ କରି ଶ୍ରୋତାଗଣଙ୍କୁ ମୁଗ୍ଧ କରିଥିଲେ। ସମସ୍ତ ହାସ୍ୟବ୍ୟଙ୍ଗ କବିତାର ସଂଯୋଜନା କରିଥିଲେ ଡକ୍ଟର ଲକ୍ଷ୍ମୀକାନ୍ତ ତ୍ରିପାଠୀ। ଅନୁଷ୍ଠାନର ସଂଗଠନ ସମ୍ପାଦକ ତପନ ରାୟ ଓଡ଼ିଆ ଚଳଚ୍ଚିତ୍ର ଜଗତ ପ୍ରୟୋଗ କରାଯାଇଥିବା ବହୁ ହାସ୍ୟରସାତ୍ମକ କବିତାର ଉପସ୍ଥାପନ କରିଥିଲେ । ଏକ ସ୍ୱତନ୍ତ୍ର ନାଟକୀୟ ଶୈଳୀରେ ବ୍ୟଙ୍ଗକବିମାନଙ୍କୁ ମଞ୍ଚକୁ ଆବାହନ କରିଥିଲେ ଜୁମରନାଥ ପାତ୍ର ଓ ଶାନ୍ତିଲତା ପଣ୍ଡା। ଅନ୍ୟମାନଙ୍କ ମଧ୍ୟରେ ଶରତ କୁମାର ମହାପାତ୍ର, ଡକ୍ଟର ଶିରୀଶଚନ୍ଦ୍ର ଜେନା, ନିବାରଣ ଜେନା, ସଂଜୟ କୁମାର ପଣ୍ଡା, ହେମେନ୍ଦ୍ର ମହାପାତ୍ର, ପ୍ରସନ୍ନ କୁମାର ଦାସ, ଡକ୍ଟର ହେମମାଳା ଦାଶ, ସୁବ୍ରତା ମହାନ୍ତି, ପ୍ରତିମା ପଣ୍ଡା, ଡକ୍ଟର ସମର ବଲ୍ଲଭ ଭୋଇ, ଗୌରୀଶଙ୍କର ସାହାଣୀ, ଊର୍ମିଳା ନାୟକ, ତୃପ୍ତିରାଣୀ ପାତ୍ର, ପ୍ରଫୁଲ୍ଲ କୁମାର ଦାସ, ସ୍ନିଗ୍ଧା ସାମନ୍ତରାୟ, କବି ସଂଜୟ ପଣ୍ଡା, ଲମ୍ବୋଦର ନାୟକ, କାହ୍ନୁଚରଣ ଲେଙ୍କା, ବିଦ୍ୟାଧର ସାହୁ, ଇଂ ଚିନ୍ମୟ ରକ୍ଷିତ, ମଧୁସୂଦନ ମାଝୀ, ଗଗନ କୁମାର ସେଠୀ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ ।
