ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ଆଜି ଫକୀରମୋହନ କଲେଜର ମୃତା ଛାତ୍ରୀ ସୌମ୍ୟାଶ୍ରୀ ବିଶିଙ୍କ ଏକାଦଶାହ। ୧୧ ଦିନ ବିତି ଯାଇଥିଲେ ମଧ୍ୟ ଲୋକଙ୍କ ମନରୁ ଝିଅଟିର କରୁଣ ମୃତ୍ୟୁ କାହାଣୀ ଲିଭି ନାହିଁ ଅନେକ ଏହାକୁ ଜୀବନ ସାରା ମନେ ରଖିବେ। ଝିଅଟି ନିର୍ଯାତନା ବିରୋଧରେ ସଂଗ୍ରାମ କରିଥିଲା। ଶେଷ ପର୍ଯ୍ୟନ୍ତ ତେବେ ଲଢୁଆ ଝିଅ ଦେହରେ କିପରି ନିଆଁ ଲାଗିଲା ତାକୁ ନିଆଁ ଲଗାଇ ଦିଆଯାଇଛି ନା ଏହା କରିବାକୁ ବାଧ୍ୟ କରାଯାଇଛି ତାହା ଏଯାଏ ସନ୍ଦେହ ଘେରରେ ରହିଛି। ତେଣୁ ଏହି ଘଟଣା ପରେ ପ୍ରଥମ ଦିନରୁ କଂଗ୍ରେସ ଦଳ ଝିଅକୁ ନ୍ୟାୟ ଲାଗି ଆନ୍ଦୋଳନ କରୁଛି। ପର୍ଯ୍ୟାୟ କ୍ରମେ ଆନ୍ଦୋଳନ କରି ଚାଲି ଥିଲାବେଳେ ପ୍ରଦେଶ କଂଗ୍ରେସ କମିଟିର ନିର୍ଦ୍ଦେଶରେ ଆଜି ସୌମ୍ୟାଶ୍ରୀଙ୍କ ଏକାଦଶାହ ଅବସରରେ ଲାଞ୍ଜିଗଡ଼ ବ୍ଲକ କଂଗ୍ରେସ ପକ୍ଷରୁ ଜଗନ୍ନାଥପୁର ଠାରେ ଅନୁଷ୍ଠିତ ଶ୍ରଦ୍ଧାଞ୍ଜଳି ଶୋକସଭା ଅନୁଷ୍ଠିତ ହୋଇଯାଇଛି। ସୌମ୍ୟାଶ୍ରୀ ଆତ୍ମାର ସଦଗତି ଲାଗି ତାଙ୍କ ଫଟୋ ଚିତ୍ର ନିକଟରେ ଦୀପ ପ୍ରଜ୍ବଳନ ସହ ପୁଷ୍ପ ଧୂପ ପ୍ରଦାନ କରା ଯାଇଥିଲା। କ୍ୟାଣ୍ଡେଲ ଜଳାଇ ଏକ ମିନିଟ୍ ନୀରବ ପ୍ରାର୍ଥନା କରାଯାଇଥିଲା। ଲାଞ୍ଜିଗଡ଼ ବ୍ଲକ କଂଗ୍ରେସ କମିଟି ସଭାପତି ବିଜୟ ନାଏକଙ୍କ ସଭାପତିତ୍ବରେ ଅନୁଷ୍ଠିତ ଏହି ଶୋକ ଶ୍ରଦ୍ଧାଞ୍ଜଳି ସଭାରେ ପୂର୍ବତନ ମନ୍ତ୍ରୀ ବଳଭଦ୍ର ମାଝୀ,ନିର୍ବାଚନ ମଣ୍ଡଳୀ ସଭାପତି ମନୋଜ କୁମାର ରାଉତ, ଜିଲ୍ଲା ସମ୍ପାଦକ ସଭ୍ୟ ପ୍ରଦିପ ମାଝୀ, କଂଗ୍ରେସ ନେତା ପୂର୍ଣ୍ଣଚନ୍ଦ୍ର ଗଉଡ଼, କର୍ଣ୍ଣ ସାହୁ, ସଦା ନାଏକ, ଯୁବନେତା ସନ୍ତୋଷ ତୁଳ, ଭାସ୍କର ଚନ୍ଦନ, ମୁଲୁ ମାଝୀ, ଗୋପାଳ ଖୁରାଙ୍କ ସମେତ କଂଗ୍ରେସ କର୍ମୀମାନେ ଉପସ୍ଥିତ ଥିଲେ।
