ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ‘ଅରମାସ୍’ (ORMAS) ବାଲେଶ୍ୱର ତରଫରୁ ରାକ୍ଷୀ ପୂର୍ଣ୍ଣିମା ଅବସରରେ ଏକ ବୈଶିଷ୍ଟ୍ୟପୂର୍ଣ୍ଣ ବ୍ୟବସାୟିକ ପଦକ୍ଷେପ ‘ନିଆରା ରାକ୍ଷୀର ସଂଭାର’ : Happiness is Handmadeକୁ ଗତକାଲି ବାଲେଶ୍ଵର ଜିଲ୍ଲାପାଳ ସୂର୍ଯ୍ୟବଂଶୀ ମୟୂର ବିକାଶ ଉଦଘାଟନ କରି ଶୁଭାରମ୍ଭ କରିଛନ୍ତି । ପ୍ରଥମ ଥର ପାଇଁ ବାଲେଶ୍ଵରରେ ପ୍ରଶାସନ ପକ୍ଷରୁ ଆୟୋଜିତ ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି ଜିଲ୍ଲା ଓ ବଡ଼ ସହରଗୁଡ଼ିକରେ ଅନୁଷ୍ଠିତ ଷ୍ଟଲ/କିଓସ୍କ ମାଧ୍ୟମରେ ସ୍ଥାନୀୟ ଏବଂ ଗ୍ରାମୀଣ ସ୍ଵଂୟ ସହାୟକ ଗୋଷ୍ଠୀ, ଉତ୍ପାଦକ ଗୋଷ୍ଠୀ ଓ ଶିଳ୍ପୀମାନଙ୍କୁ ତାଙ୍କର ହସ୍ତ ନିର୍ମିତ ରାକ୍ଷୀ ଓ ଅନ୍ୟାନ୍ୟ ପର୍ବ ପର୍ବାଣୀ ଉତ୍ସବ ସମୟରେ ଉପକରଣ ବିକ୍ରୟ ପାଇଁ ଏକ ପ୍ଲାଟଫର୍ମ ଦେବା। ଏଥିରେ ବିଭିନ୍ନ ଶସ୍ୟ, ଚାନ୍ଦୁଆ, ସବାଇ ଘାସ, ଟେରାକୋଟା, ସୁନେଲି ଘାସ, ବାଉଁଶ, ଝୋଟ, ହସ୍ତଶିଳ୍ପ (ଡାଳ/କପଡ଼ା) ଆଦି ଜିନିଷରୁ ତିଆରି ପଟ୍ଟଚିତ୍ର, ରାକ୍ଷୀ ଆଦି ବିକ୍ରୟ ହେଉଛି। ଏହି ଉତ୍ପାଦନ ପାଇଁ ବିଭିନ୍ନ ଜିଲ୍ଲାରୁ ଅନେକ ଉତ୍ସ ମାନ ନିର୍ଦ୍ଧାରିତ ହୋଇଛି । ଯଥା : ମୟୂରଭଞ୍ଜ ଓ ବାଲେଶ୍ୱରର ସବାଇ, କେନ୍ଦ୍ରାପଡ଼ା, ଯାଜପୁର ଓ ଜଗତସିଂହପୁରର ସୁନା ଘାସ, ପୁରୀର ପଟ୍ଟଚିତ୍ର, ବରଗଡ଼ବା ଗଞ୍ଜାମର ଟେରାକୋଟା, ରାୟଗଡ଼ାର ବାଉଁଶ, ବାଲେଶ୍ୱରର ପ୍ୟାଡ଼ି କ୍ରାଫ୍ଟ ଆଦି। ଗିଫ୍ଟ ହାମ୍ପର ପ୍ୟାକରେ ରହିଥିବା ଉତ୍ପାଦଗୁଡ଼ିକରେ ଶ୍ରୀଗଣେଶ ମୂର୍ତ୍ତି, ମିଠା (ଚକୋଲେଟ/ମିଲେଟ ଲଡୁ/ସ୍ଵଂୟ ସହାୟକ ଗୋଷ୍ଠୀ ଦ୍ଵାରା ତିଆରି), ୨/୩ ଟି ରାକ୍ଷୀ, ଦୀପ, ମାସ୍କ ଆଦି ଏକ ସଜ୍ଜିତ ବାକ୍ସରେ ଉପଲବ୍ଧ। ଏହି ଉପକ୍ରମରେ ବ୍ୟକ୍ତିଗତ ରାକ୍ଷୀର ମୂଲ୍ୟ ୨୦ ରୁ ୫୦ ଟଙ୍କା ଭିତରେ ରହିଥିଲା ବେଳେ ଗିଫ୍ଟ ପ୍ୟାକର ମୂଲ୍ୟ ଟ୨୫୦ ରୁ ଟ୩୦୦ ମଧ୍ୟରେ ରଖାଯାଇଛି। ପ୍ୟାକେଜିଂ ଓ ବ୍ରାଣ୍ଡିଂ କାମ ଓରମାସ୍ ଦ୍ୱାରା କରାଯାଉଛି। ଏହି ଷ୍ଟଲ ୯ ଅଗଷ୍ଟ ୨୦୨୫ ପର୍ଯ୍ୟନ୍ତ ଚାଲୁ ରହିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ଏକ ପ୍ରେସ ବିଜ୍ଞପ୍ତି ମାଧ୍ୟମରେ ସୂଚନା ଦିଆଯାଇଛି। ଜନସାଧାରଣଙ୍କ ମଧ୍ୟରେ ଏହାକୁ ନେଇ ବେଶ୍ ଆଗ୍ରହ ଓ ଉତ୍ସାହ ଦେଖା ଦେଇଛି।
