ଓଡ଼ିଆ ବାର୍ତ୍ତା/ ବଲାଙ୍ଗୀର (ମୁନା ଗୌଡ଼): ପାଟଣାଗଡ଼ ବ୍ଲକ ମରୁଆଁ ଗ୍ରାମ ପଞ୍ଚାୟତର ଝୁଲେନବର ଗାଁର ସୁନା ଝିଅ ଚୁମକୀ ମିର୍ଦ୍ଧା ଭାରତୀୟ ସୀମା ସୁରକ୍ଷା ବଳରେ ନିଯୁକ୍ତି ପାଇ ଆଜି ଅଞ୍ଚଳ ପାଇଁ ଗର୍ବ ଆଣି ଦେଇଛନ୍ତି | ଆଦିବାସୀ ପରିବାରରେ ଜନ୍ମ ଗ୍ରହଣ କରି ଏକ ଛୋଟ ଗାଁରୁ ଯାଇ ଦେଶର ସୀମାରେ ସୁରକ୍ଷା ଦେବେ | ଦେଶକୁ ସୁରକ୍ଷା ଦେଇ ଶତ୍ରୁକୁ ସଂହାର କରିବେ | ଛୋଟ ଦିନରୁ ପାଠ ପଢ଼ାରେ କଲମ ଧରୁଥିଲେ ସେ ଏବେ ହାତରେ ବନ୍ଧୁକ ଧରି ଦେଶକୁ ସୁରକ୍ଷା କରିବେ | ବାପା ବନ୍ତ ମିର୍ଦ୍ଧା ଓ ମା ଶ୍ରୀମତୀ ହାରା ମିର୍ଦ୍ଧାଙ୍କ ସୁନା ଝିଅ ଚୁମକୀ ପିଲା ଦିନରୁ ମେଧାବୀ | ପଞ୍ଚମ ଶ୍ରେଣୀରୁ ବେଲପଡା ଜବାହର ନବୋଦୟ ବିଦ୍ୟାଳୟରୁ ଯୁକ୍ତ ଦୁଇ ପଢ଼ି ସୀମା ବାହିନୀରେ ଯୋଗ ଦେବାକୁ ଅଭ୍ୟାସ କରୁଥିଲେ | ଗାଁରେ ଖେଳ ପଡ଼ିଆ ନଥିଲେ ମଧ୍ୟ ରାସ୍ତାରେ ଗାଁର ଝିଅ ମାନଙ୍କ ସହିତ ଦୌଡ଼, ଖେଳ କୁଦ, ଶାରୀରିକ ପରିଶ୍ରମ କରୁଥିଲେ | ଆଜି ବି ଏସ ଏଫ ଟ୍ରେନିଂରୁ ନିଜ ଗାଁକୁ ଫେରିଲା ସମୟରେ ପାଟଣାଗଡ଼ ଠାରେ ଜିଲ୍ଲା ଆଦିବାସୀ କଲ୍ୟାଣ ସଂଘ ତରଫରୁ ବସ ଷ୍ଟେସନ ଠାରେ କଳସ ସ୍ଥାପନ କରି, ଫୁଲ ମାଲ, ପୁଷ୍ପଗୁଚ୍ଛ, ଉପଢୌକନ ଦେଇ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦେଇଥିଲେ ପରେ ବାଜାର ତାଳେ ତାଳେ ସହର ମୁଖ୍ୟ ରାସ୍ତାରେ ଶୋଭାଯାତ୍ରାକରି ବ୍ଲକ ଛକ ପର୍ଯ୍ୟନ୍ତ ପାଛୋଟି ନେଇଥିଲେ | ସ୍ୱାଗତ ସମ୍ବର୍ଦ୍ଧନା ଦେବା ସମୟରେ ଜିଲ୍ଲା ଆଦିବାସୀ କଲ୍ୟାଣ ସଂଘର ଯୁଗ୍ମ ସମ୍ପାଦକ ଗିରିରାଜ ଭୋଇ, ପୂର୍ବତନ ସୈନିକ ଯୋଗେଶ୍ୱର ଭୋଇ, ପରକ୍ଷିତ ମାଝୀ, ପ୍ରକାଶ ସାହୁ, ଯୁଧିଷ୍ଠିର ମିର୍ଦ୍ଧା ଓ ଅନ୍ୟ ମାନେ ଉପସ୍ଥିତ ଥିଲେ | ଗାଁକୁ ପହଂଚିବା ପରେ ଗାଁରେ ଗାଁ ମୁଣ୍ଡରୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ଦେଇ ଗ୍ରାମବାସୀ ଓ ଅଞ୍ଚଳବାସୀ ପାଛୋଟି ନେଇଥିଲେ |
