ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ନର୍ଲା ବ୍ଲକ ସରିଆଁ ଗ୍ରାମ ପଞ୍ଚାୟତ ଟୋଲବ୍ରାହ୍ମଣୀ ଗ୍ରାମର ହେମନ୍ତ ମାଝୀ ଆଗ୍ନିଶମ ବିଭାଗରେ ଫାୟାର ମ୍ୟାନ ଭାବେ ନିଯୁକ୍ତି ପାଇ ଅଞ୍ଚଳ ପାଇଁ ଗୌରବ ଆଣି ଆସିଛନ୍ତି। ଆଦିବାସୀ ପରିବାରରେ ଜନ୍ମ ଗ୍ରହଣ କରି ଏକ ଛୋଟ ଗାଁରୁ ଯାଇ ସେ ଦୁର୍ଗତ ମାନବମାନଙ୍କ ସେବା କରିବେ। ଦୀର୍ଘ ବର୍ଷ ପରେ ଏହି ଗାଁର ପୁଅ ଫାୟାର ମ୍ୟାନ ଭାବେ ନିଯୁକ୍ତି ପାଇଥିବାରୁ ଗ୍ରାମବାସୀ ବେଶ୍ ଉତ୍ସାହିତ ଥିବା ଦେଖିବାକୁ ମିଳିଛି। ବରୁଣ ମାଝୀ ଓ ବନିତା ମାଝୀଙ୍କ ସୁପୁତ୍ର ହେମନ୍ତ ପିଲା ଦିନରୁ ପରିଶ୍ରମୀ ଓ ମେଧାବୀ। ବୁଧବାର ଟ୍ରେନିଂରୁ ନିଜ ଗାଁକୁ ଫେରିବା ପରେ ତାଙ୍କୁ ତ୍ରିମୂର୍ତ୍ତି ଯୁବକ ସଂଘ ଓ ଟୋଲବ୍ରାହ୍ମଣୀ ଗ୍ରାମବାସୀ ପକ୍ଷରୁ ପୁଷ୍ପଗୁଚ୍ଛ ଓ ଉପଢୌକନ ଦେଇ ଭବ୍ୟ ସ୍ୱାଗତ ସମ୍ବର୍ଦ୍ଧନା କରାଯାଇ ଘରକୁ ପାଛୋଟି ନିଆଯାଇଥିଲା। ସ୍ୱାଗତ ସମ୍ବର୍ଦ୍ଧନା ଦେବା ସମୟରେ ଗଣେଶ ଶବର, ଭୀମରାଜ ଶବର, କୁଞ୍ଜ ଭୋଇ, ରୁଦ୍ର ଶବର, କନ୍ଦର୍ପ ମାଝୀ ଓ ଅନ୍ୟମାନେ ଉପସ୍ଥିତ ଥିଲେ।
