ପୌରାଣିକ ଗାଥା ଅନୁଯାୟୀ, ମୁନିଙ୍କ ଅଭିସାପ ଫଳରେ କ୍ରୋଞ୍ଚ ମୂଷା ହୋଇଗଲା। ସେ ମହର୍ଷି ପରାସରଙ୍କ ଆଶ୍ରମରେ ଆତଙ୍କ ସୃଷ୍ଟି କଲା। ଋଷିମାନେ ମୂଷାକୁ ଘଉଡ଼ାଇବାକୁ ବହୁତ ଚେଷ୍ଟା କଲେ। ହେଲେ ସଫଳ ହେଲେ ନାହିଁ। ଶେଷରେ ଋଷିଗଣ ଭଗବାନ ଶିବଙ୍କ ପାଖକୁ ଯାଇ ସମସ୍ତ ବିଷୟରେ ଜଣାଇଲେ। ମୂଷାକୁ ଧରିବା ପାଇଁ ଭଗବାନ ଶିବ ଗଣେଶଙ୍କୁ ପଠାଇଲେ। ଏକ ରଶି ପକାଇ ଗଣେଶ ମୂଷାକୁ ପାତାଳରୁ ଧରି ଆଣିଲେ। ଗଣେଶ ମୂଷାକୁ କହିଲେ ମୋଠୁ ଯଦି କିଛି ଚାହୁଁଛ କୁହ। କିନ୍ତୁ ମୂଷା ଅତ୍ୟନ୍ତ ଅହଂକାର ସହ କହିଲା ମୋତେ କିଛି ଦରକାର ନାହିଁ ଯଦି ଆପଣଙ୍କର କିଛି ଦରକାର ଅଛି ମୋତେ କହିପାରିବେ। ମୂଷାର ଅହଂକାରକୁ ଦେଖି ଗଣେଶ କହିଲେ ମୁଁ ଥରେ ତୋର ସବାରି କରିବାକୁ ଚାହୁଁଛି। ମୂଷା ଗଣେଶଙ୍କ କଥାରେ ରାଜି ହୋଇଗଲା। କିନ୍ତୁ ଯେମିତି ଗଣେଶ ଉକ୍ତ ମୂଷା ଉପରେ ବସିଲେ ସେ ଗଣେଶଙ୍କ ସ୍ଥୂଳ ଶରୀରରେ ଦବି ଗଲା। ମୂଷାର ଅହଂକାର ଭାଙ୍ଗିଗଲା ସେ କହିଲା ମହାପ୍ରଭୁ ମୋତେ କ୍ଷମା କରି ଦିଅ ଆପଣଙ୍କ ଓଜନରେ ମୁଁ ଦବି ଗଲିଣି। ଗଣେଶ ମୂଷାର କ୍ଷମାକୁ ସ୍ୱିକାର କରି ନିଜର ଓଜନ କମ୍ କଲେ। ଏପରି ଭାବରେ ମୂଷା ଗଣେଶଙ୍କ ବାହନ ହେଲା।
