ଓଡ଼ିଆ ବାର୍ତ୍ତା/ ସଇଁତଲା (ଗୋକୁଳା ନନ୍ଦ ବଗର୍ତ୍ତୀ): ବଲାଙ୍ଗୀର ଜିଲ୍ଲା, ସଇଁତଲା ବ୍ଲକ, ଧରପଗଡ଼ ଗ୍ରାମପଞ୍ଚାୟତ ଅନ୍ତର୍ଗତ ମାକ୍ରି ଗାଁରେ ପବିତ୍ର ଶ୍ରୀରାମ ନବମୀ ଉତ୍ସବ ୭୬ ବର୍ଷ ପଦାର୍ପଣ କରିଛି ଏହି ଉତ୍ସବରେ ପାରମ୍ପରିକ ଭାବେ କଳସ ଯାତ୍ରା ବିଶେଷ ଭାବରେ ଆୟୋଜିତ ହୋଇଥାଏ। ଏହିବାର ଉତ୍ସବରେ କର୍ତ୍ତା ଭାବେ ବସନ୍ତ ଭୋଇ ଓ ତାଙ୍କର ଧର୍ମପତ୍ନୀ ସାବିତ୍ରୀ ଭୋଇ ଦାୟିତ୍ୱ ନିଭାଇଥିଲେ। ପୂଜକ ଲମ୍ବୋଦର ଯୋଶୀଙ୍କ ନେତୃତ୍ୱରେ ଗାଁର ସ୍ଥାନୀୟ ପୋଖରୀରୁ ଘଣ୍ଟ, ଖୋଲ ଓ ତାଳ ବାଦ୍ୟର ମଧୁର ଧ୍ୱନି ସହ କଳସ ଯାତ୍ରା ଆରମ୍ଭ ହୋଇଥିଲା। ପରେ ଏହି କଳସକୁ ରାମ ମନ୍ଦିରରେ ବିଧିବତ୍ ସ୍ଥାପନ କରାଗଲା। ଉତ୍ସବରେ ଗାଁର ମା, ମାଉସୀ ଓ ସମସ୍ତ ଭକ୍ତଗଣ ଭାଗ ନେଇଥିଲେ, ଯାହାରେ ଗାଁରେ ଧାର୍ମିକ ଏବଂ ସାମୂହିକ ଏକତାର ପରିବେଶ ସୃଷ୍ଟି ହୋଇଥିଲା। ରାମଜୀ କମିଟିର ସଭାପତିଙ୍କ କହିବା ଅନୁସାରେ, ଏହି ପବିତ୍ର ଅବସରରେ ୧୪ ଦିନ ଧରି ରାମଲୀଳା ନାଟକ ମଞ୍ଚସ୍ଥ ହେବ। ଏହି ନାଟକ ଦ୍ୱାରା ଗାଁର ଲୋକମାନେ ଧାର୍ମିକ ଶିକ୍ଷା ଓ ରାମ କଥାର ସନ୍ଦେଶ ପ୍ରାପ୍ତ କରିବେ। ଉତ୍ସବରେ ସମସ୍ତ ଗ୍ରାମବାସୀଙ୍କ ଉତ୍ସାହ ଓ ଭକ୍ତିଭାବ ଦୃଶ୍ୟମାନ ହୋଇଥିଲା, ଯାହା ଗାଁର ପାରମ୍ପରିକ ଧାର୍ମିକ ସଂସ୍କୃତିକୁ ସୁଦୃଢ଼ କରୁଛି।
