ଦାମନଯୋଡି,୧୭/୮: ୭୪ତମ ପବିତ୍ର ସ୍ୱାଧୀନତା ଦିବସ ଉପଲକ୍ଷେ ଇଂକ୍ ଡିଉ ପବ୍ଲିକେସନ୍ସ ପକ୍ଷରୁ ତ୍ରିଦିବସୀୟ ସାହିତ୍ୟୋତ୍ସବ ଅନୁଷ୍ଠିତ ହୋଇଯାଇଛି। ଅନଲାଇନରେ ଆୟୋଜିତ ଅଧିବେଶନମାନଙ୍କରେ ଅଂଶଗ୍ରହଣ କରିବା ପାଇଁ ପ୍ରାୟ ଦଶଟି ଦେଶର କବିମାନେ ଭାରତୀୟ କବିମାନଙ୍କ ସହିତ ଭାଗ ନେଇଥିଲେ।
ବହୁଭାଷୀ କବିତା ଅଧିବେଶନରେ ଭାରତର ୨୦ରୁ ଅଧିକ ଭାଷାର କବିମାନେ ଭାଗ ନେଇଥିଲେ, ଯାହାକି ଆମ ଦେଶର ବିବିଧତା ମଧ୍ୟରେ ଏକତାକୁ ପ୍ରମାଣିତ କରିଥିଲା ଏବଂ ଆମ ସଂସ୍କୃତି ବିଷୟରେ ଅବଗତ କରିଥିଲା। ଆନ୍ତର୍ଜାତୀୟ କବିତା ଅଧିବେଶନରେ ଦେଶ ଭିତରୁ ଓ ବିଦେଶୀ କବିମାନେ କବିତା ପାଠ କରିବା ସହ ଆମ ଦେଶର ଗୌରବମୟ ସ୍ୱାଧୀନତା ସଂଗ୍ରାମ ବିଷୟରେ ଆଲୋକପାତ କରିଥିଲେ। ଓଡିଆ ଏବଂ ହିନ୍ଦୀ ଭାଷା ପାଇଁ କବିତା ଆସର, ଓଡ଼ିଆ ବ୍ୟଙ୍ଗ କବିତା ଅଧିବେଶନ ଏବଂ କ୍ଷୁଦ୍ର ଗଳ୍ପର ଏକ ମନୋଜ୍ଞ ଅଧିବେଶନ କରାଯାଇଥିଲା।
ଉଦଘାଟନୀ କାର୍ଯ୍ୟକ୍ରମର ମୁଖ୍ୟ ଅତିଥି ଭାବରେ ଝରିଗାଁ ବିଧାୟକ ପ୍ରକାଶ ଚନ୍ଦ୍ର ମାଝୀ, ସମ୍ମାନିତ ଅତିଥି ଭାବେ ପଦ୍ମଶ୍ରୀ ଡ.ଦମୟନ୍ତୀ ବେଶ୍ରା , ରଙ୍ଗବତୀ ଗୀତର ଗାୟକ ପଦ୍ମଶ୍ରୀ ଜିତେନ୍ଦ୍ରିୟ ହରିପାଲ, ପୂର୍ବତନ ବିଧାୟକ ତଥା ଲେଖକ ଡମ୍ବରୁ ସିସା ଏବଂ କିସ୍ ବିଶ୍ୱବିଦ୍ୟାଳୟର ପ୍ରଫେସର ଡ.ଇଶ୍ୱର ଚନ୍ଦ୍ର ନାୟକ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ପରବର୍ତ୍ତୀ ଅଧିବେଶନମାନଙ୍କରେ କବି ଫନି ମହାନ୍ତି, କବି ସ୍ୱପ୍ନା ବେହେରା, କବି ରୋହିଣୀ ବେହେରା, କବି ପଦ୍ମଜା ଆୟାଙ୍ଗର, କବି ଉର୍ମିଳା ଆଚାର୍ଯ୍ୟ ଓ ଗାଳ୍ପିକ ରମେଶ ପଟ୍ଟନାୟକ ଅତିଥି ଭାବେ ନିମନ୍ତ୍ରିତ ଥିଲେ। ସର୍ବୋପରି ବ୍ୟଙ୍ଗକବି ଡ.ଧର୍ମଛଡ଼ା, ଶ୍ରୀମାନ୍ ଗବ, ଆ କୀଲା ଓ ଗିରିଶ ରଞ୍ଜନଙ୍କ ହାସ୍ୟ ବ୍ୟଙ୍ଗ ଆସର କାର୍ଯ୍ୟକ୍ରମ ଚମତ୍କାର ହୋଇଥିଲା।
ବିଶିଷ୍ଟ ଅତିଥିମାନେ ଇ-ବୁକ୍ ଏବଂ ଅଡିଓ ବୁକ୍ ମାଧ୍ୟମରେ ସାହିତ୍ୟର ଡିଜିଟାଇଜେସନ୍ ଲକ୍ଷ୍ୟ ରଖିଥିବା ଇଂକ୍ ଡିଉ ପ୍ରକାଶନକୁ ଭୁୟସୀ ପ୍ରଶଂସା କରିଥିଲେ, ଯାହା ସାହିତ୍ୟ, ସଂସ୍କୃତିକୁ ବିଶ୍ଵ ଦରବାରରେ ଉପସ୍ଥାପିତ କରିବା ସଙ୍ଗେ ସଙ୍ଗେ ଅତି ସହଜରେ ଲୋକଙ୍କ ପାଖରେ ଉପଲବ୍ଧ ହୋଇପାରିବ ତଥା ସ୍ଥାନୀୟ ଆଦିବାସୀ ଲୋକ ସାହିତ୍ୟ, ସଂସ୍କୃତି ଉପରେ ଗୁରୁତ୍ୱ ଦେଇ ଏହାର ବିଶ୍ୱବ୍ୟାପୀ ବିସ୍ତାର କରିବାକୁ ଇ-ବୁକ୍ ଏବଂ ଅଡିଓ ବୁକ୍ ସହାୟକ ହେବ ବୋଲି ମତ ପ୍ରକାଶ କରିଥିଲେ।
ଏହି ଅନଲାଇନ୍ କାର୍ଯ୍ୟକ୍ରମକୁ ଡା.ମନୋଜ କିଶୋର ନାୟକ ଦାମନଯୋଡ଼ି ସହରରୁ ପରିଚାଳନା କରିଥିଲେ। ଲେଖକ ବୁଲୁ ହୋତା ,ଲେଖିକା ସ୍ୱପ୍ନା ବେହେରା, ‘ସୀମାନ୍ତ’ର ସମ୍ପାଦକ ଅଶୋକ ପଟ୍ଟନାୟକ ଏବଂ ଇଂ.ସୁଶୀଲ କୁମାର ଗୋଛାୟତ, ଇଂ.ଶ୍ରୀମା ବାନୁଆ, କବି ଧର୍ମରାଜ ମାଝୀ ପ୍ରମୁଖ ଏହି ତ୍ରିଦିବସୀୟ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ଆଦିବାସୀ ଅଧ୍ୟୁଷିତ କୋରାପୁଟ ଜିଲ୍ଲାରେ ଏଭଳି ଅଭିନବ ଅନଲାଇନ୍ କାର୍ଯ୍ୟକ୍ରମ ଯୋଗେ ଜାତୀୟ ଓ ଆନ୍ତର୍ଜାତିକ ସ୍ତରର ସାହିତ୍ୟ ଉତ୍ସବ ଅନୁଷ୍ଠିତ ହୋଇଥିବାରୁ ସମସ୍ତେ ଡା.ମନୋଜ ନାୟକଙ୍କ ସମେତ ସହଯୋଗୀଙ୍କୁ ପ୍ରସଂଶା କରିଥିଲେ।
ଏଠାରେ ସୂଚନାଯୋଗ୍ୟ ଯେ, ଇଂକ୍ ଡିଉ ପବ୍ଲିକେସନ୍ସ ଏକ ଅସାଧାରଣ ଆନ୍ତର୍ଜାତୀୟ ପତ୍ରିକା ପ୍ରସ୍ତୁତ କରିବାକୁ ଯାଉଛି, ଯେଉଁଥିରେ ଉଭୟ ବିଦେଶ ତଥା ଭାରତୀୟ କବିଙ୍କ କବିତା ରହିଛି। ଏଥିସହ ଓଡ଼ିଆ, ଇଂରାଜୀ, ହିନ୍ଦୀ ମାସିକ ପତ୍ରିକା ଏବଂ ଆଦିବାସୀ ସଂସ୍କୃତି ଓ ପରମ୍ପରାକୁ ନେଇ ଏକ ଚତୁର୍ମାସିକ ପତ୍ରିକା ପ୍ରକାଶ କରି ଉଭୟ ପୁସ୍ତକ ଓ ଡିଜିଟାଲ୍ ମାଧ୍ୟମରେ ସାହିତ୍ୟକୁ ଏକ ସ୍ୱତନ୍ତ୍ର ସ୍ଥାନ ଦେବାର ଲକ୍ଷ୍ୟ ରଖିଛି।
Click here to get 24×7 News & Views alerts
https://facebook.com/odiabarta
