କଳାହାଣ୍ଡି: କଳାହାଣ୍ଡି ଜିଲ୍ଲା ମ.ରାମପୁର ବ୍ଲକ ମୋହନଗିରୀ ପୋଲିସ ଫାଣ୍ଡି ସାମ୍ନା ମୁଖ୍ୟରାସ୍ତାରେ ଗତ କିଛି ମାସହେଲା ପାଣି ଜମୁଥିବା ଦେଖିବାକୁ ମିଳୁଛି । ଏହି ଫାଣ୍ଡିରେ ସିଆରପିଏଫ୍ କ୍ୟାମ୍ପ ରହିଥିବାବେଳେ ଏହି କ୍ୟାମ୍ପ ଏବଂ ମୋହନଗିରୀ ପଂଚାୟତର ୨ନମ୍ବର ୱାର୍ଡ଼ରୁ ନିର୍ଗତ ଏହି ପାଣି ଏବେ ମୁଖ୍ୟ ରାସ୍ତାରେ ଜମି ରହିଥିବା କାରଣରୁ ଅଂଚଳବାସୀଙ୍କ ମୁଣ୍ଡବ୍ୟଥାର କାରଣ ପାଲଟିଛି । ଏହି ରାସ୍ତାଟି ମୋହନଗିରୀର ପ୍ରସିଦ୍ଧ ଶୈବପୀଠକୁ ସଂଯୋଗ କରୁଥିବାରୁ ଭକ୍ତମାନେ ଏହି ପାଣି ଉପର ଦେଇ ଶୈବପୀଠ ସମେତ ପଡ଼ୋଶୀ କନ୍ଧମାଳ ଜିଲ୍ଲାକୁ ଯାତାୟତ କରିଥାନ୍ତି । ତେବେ ଏନେଇ ଅଂଚଳବାସୀ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ହେଁ କିଛି ସୁଫଳ ମିଳିପାରୁନାହିଁ । ତେଣୁ ତୁରନ୍ତ ଏହି ରାସ୍ତାର ପାଣିକୁ ଡ଼୍ରେନେଜ କରାଯାଇ ରାସ୍ତାକୁ ଶୁଖିଲା ରଖିବାକୁ ଅଂଚଳବାସୀ ଦାବୀ କରିଛନ୍ତି ।