କୋକସରା, (ହିରଣ୍ୟ ବେହେରା): କୋକସରା ଥାନା ଜୟନ୍ତପୁର ଗାଁରେ ଏକ ସ୍ପର୍ଶକାତର ଘଟଣା ଦେଖିବାକୁ ମିଳିଛି । ଅବାଞ୍ଛିତ ମାତୃତ୍ୱ ଓ ଲୋକଲଜ୍ଜ୍ୟା ଯୋଗୁଁ କେହି ଜଣେ ହୃଦୟହିନା ମହିଳା ଜନ୍ମିତ ଶିଶୁକୁ କୂଅରେ ଫିଙ୍ଗି ଦେଇଥିବାବେଳେ ପରିତ୍ୟକ୍ତ କୁଅରୁ ନବଜାତ ଶିଶୁର ଗଳିତ ଶବ କୋକସରା ପୁଲିସ ଉଦ୍ଧାର କରିଛି । ଗ୍ରାମରେ ଥିବା ଏକ ପରିତ୍ୟକ୍ତ କୂଅରେ ସୋମବାର ନବଜାତକର ଗଳିତ ମୃତ ଶବ ପଡିଥିବା ଦେଖି ସ୍ଥାନୀୟ ଲୋକେ କୋକସରା ପୁଲିସକୁ ଖବର ଦେଇଥିଲେ । କୋକସରା ଥାନା ଏଏସ୍ଆଇ ଜନ୍ମେଜୟ ବାଗ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ କୋକସରା ଅଗ୍ନିଶମ କର୍ମଚାରୀଙ୍କ ସହାୟତାରେ ମୃତ ଶିଶୁର ଶବକୁ କୁଅରୁ ଉଦ୍ଧାର କରିଥିଲେ । ପରେ ଶବ ବ୍ୟବଛେଦ ପାଇଁ କୋକସରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇ ବ୍ୟବଛେଦ ପରେ ମଶାଣିରେ ପୋତି ଦେଇଥିବା ସୂଚନା ମିଲିଛି । ତେବେ ଅବାଞ୍ଛିତ ମାତୃତ୍ୱ ଓ ଲୋକଲଜ୍ଜ୍ୟା ଭୟରେ କେହି ଜଣେ ହୃଦୟହିନା ମହିଳା ଶିଶୁକୁ କୂଅରେ ଫିଙ୍ଗି ଦେଇଥିବା ସାଧାରଣରେ ଚର୍ଚ୍ଚା ହେଉଛି । ଏନେଇ କୋକସରା ଥାନା ରେ ଏକ ଅପମୃତ୍ୟ ମାମଲା ରୁଜୁ କରି ତଦନ୍ତ ଜାରି ରହିଥିବା କୋକସରା ଥାନା ଏଏସ୍ଆଇ ବାଗ ସୂଚନା ଦେଇଛନ୍ତି ।
