ଓଡ଼ିଆ ବାର୍ତ୍ତା/ ନୂଆପଡା (ମହେନ୍ଦ୍ର ବାଗ): ନୂଆପଡା ସଦର ବ୍ଲକ କର୍ମେଲି ଗାଁର ତିନିଜଣ ଯୁବକ ଯୁବତୀ ଅମିତ ମାଝୀ, କୁନ୍ତୀ ମାଝୀ ଓ ନମିତା ମାଝୀ କିଛିଦିନ ତଳେ ତେଲେଙ୍ଗାନା ରାଜ୍ୟର ଇଟାଭାଟିକୁ କାମ କରିବାପାଇଁ ଯାଇଥିଲେ l ପରିବାରର ଆର୍ଥିକ ଦୁର୍ବଳତା ହେତୁ ସେମାନେ ନିଜର ଭିଟାମାଟି ଛାଡି ତେଲେଙ୍ଗାନା ରାଜ୍ୟର ମେଡକାଲ ଜିଲ୍ଲା ରାବଲକୋଳ ଗାଁ ଏମଭିଏସ ଇଟା ଭାଟିକୁ କାମ କରିବା ପାଇଁ ଯାଇଥିଲେ l ଯିବା ସମୟରେ ଇଟାଭାଟି ମାଳିକ ବିଭିନ୍ନ ପ୍ରଲୋଭନ ଦେଖାଇ ସେମାନଙ୍କୁ ନେଇଥିଲା l ସେଠାରେ କିଛିଦିନ ଭଲରେ ସେମାନେ କାମ କରି ରହିଥିଲେ l ସେମାନେ ବେଶ ଖୁସିରେ କାମ କରି ଦୁଇ ପଇସା ଘରକୁ ନେବାପାଇଁ ସ୍ବପ୍ନ ଦେଖୁଥିଲେ କିନ୍ତୁ ଧୀରେ ଧୀରେ ମାଳିକ ସେମାନଙ୍କୁ ବିଭିନ୍ନ ପ୍ରକାର ନିର୍ଯାତନା ଦେବାର ଆରମ୍ଭ କରିଥିଲା l କାମ କଲେ ଖାଇବାକୁ ଦେଉଥିଲା ନଚେତ ସେମାନେ ଭୋକରେ ରହୁଥିଲେ l ଏପରିକି ଜ୍ୱର ହେଲେ ନିଜ ପଇସାରେ ସେମାନେ ଚିକିତ୍ସିତ ହେଉଥିଲେ l ଏହିପରି ଅନେକ ପ୍ରକାର ନିର୍ଯାତନା ସହୁଥିବା ନେଇ ଫେସବୁକରେ ସଂଜୀବ ମିଶ୍ର ନାମକ ଜଣେ ବ୍ୟକ୍ତି ପୋଷ୍ଟ କରିଥିଲେ l ଏହାକୁ ସ୍ବେଛାସେବୀ ଯଶୋବନ୍ତ ରଣା ଦେଖିବା ପରେ ତୁରନ୍ତ ଟ୍ୱିଟର ଯୋଗେ ଲେବର କମିଶନର, ମୁଖ୍ୟମନ୍ତ୍ରୀ ନବୀନ ପଟନାୟକ, ନୂଆପଡା ଜିଲ୍ଲା ପ୍ରଶାସନ, ତେଲେଙ୍ଗାନା ମୁଖ୍ୟମନ୍ତ୍ରୀ, ମେଡକାଲ ଜିଲ୍ଲା ପୋଲିସ ଓ ପ୍ରଶାସନଙ୍କୁ ଜଣେଇ ଏହି ଦାଦନ ଶ୍ରମିକମାଳଙ୍କ ଉଦ୍ଧାର କରିବାପାଇଁ ନିବେଦନ କରିଥିଲେ l ଟ୍ୱିଟ କରିବାର କିଛି ଘଣ୍ଟା ଭିତରେ ମେଡକାଲ ଜିଲ୍ଲା ପୋଲିସ ପହଞ୍ଚି ତିନିଜଣଙ୍କୁ ଉଦ୍ଧାର କରି ଟ୍ରେନିଂ ଯୋଗେ ନିଜ ଗାଁକୁ ପଠେଇଛନ୍ତି l ସେମାନେ ଗାଁକୁ ପହଞ୍ଚି ଖୁସି ବ୍ୟକ୍ତ କରିବା ସହ ସେମାନଙ୍କୁ ଉଦ୍ଧାର କରିବାରେ ସହଯୋଗ କରିଥିବା ସମସ୍ତଙ୍କୁ ଧନ୍ୟବାଦ ଜଣେଇଛନ୍ତି l
