ଓଡ଼ିଆ ବାର୍ତ୍ତା/ ଝାରସୁଗୁଡ଼ା: ବହୁ ପ୍ରତିକ୍ଷାର ଅନ୍ତ ଘଟିଛି । ଝାରସୁଗୁଡ଼ା ଉପନିର୍ବାଚନରେ ବିଜେଡି ପ୍ରାର୍ଥୀ ଦୀପାଳି ଦାସ ୪୮ ହଜାରୁ ଅଧିକ ଭୋଟରେ ବିପକ୍ଷ ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀଙ୍କୁ ପରାସ୍ତ କରିଛନ୍ତି । ଆଜି ଝାରସୁଗୁଡା ଉପନିର୍ବାଚନ ଫଳାଫଳ ପାଇଁ ହୋଇଥିବା ଭୋଟ ଗଣତିର ପ୍ରତି ରାଉଣ୍ଡରେ ଆଗରେ ଥିଲେ ଦୀପାଳି । ପ୍ରଥମରୁ ଶେଷ ରାଉଣ୍ଡ ଯାଏ ବଢି ବଢି ଚାଲିଥିଲା ବିଜେଡି ପ୍ରାର୍ଥିନୀଙ୍କ ଭୋଟ ବ୍ୟବଧାନ । ଦୀପାଳି ତାଙ୍କର ନିକଟତମ ପ୍ରତିଦ୍ବନ୍ଦ୍ବୀ ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀଙ୍କଠାରୁ ୪୮ହଜାର ୭୨୧ ଅଧିକ ଭୋଟ ପାଇ ବିଜୟୀ ହୋଇଛନ୍ତି । ଦୀପାଳିଙ୍କୁ ୧ ଲକ୍ଷ ୭ହଜାର ୧୯୮ ଖଣ୍ଡ ଭୋଟ ମିଳିଛି । ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀଙ୍କୁ ୫୮, ୪୭୭ ଭୋଟ ମିଳିଥିବା ବେଳେ କଂଗ୍ରେସ ପ୍ରାର୍ଥୀ ତରୁଣ ପାଣ୍ଡେ ମାତ୍ର ୪,୪୯୬ ଖଣ୍ଡ ଭୋଟ ପାଇଛନ୍ତି ।
ସବୁଠାରୁ ବଡ଼ କଥା ହେଲା ଦୀପାଳି ତାଙ୍କ ବାପା ସ୍ବର୍ଗତ ନବକିଶୋର ଦାସଙ୍କ ରେକର୍ଡ ଭାଙ୍ଗିଛନ୍ତି । ଏଠାରେ ପ୍ରକାଶଯୋଗ୍ୟ ଯେ, ୨୦୧୯ରେ ବିଜେଡ଼ିରୁ ପ୍ରାର୍ଥୀ ହୋଇଥିଲେ ଦୀପାଳି ଦାସ ବାପା ତଥା ଦିବଂଗତ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ । ଯେଉଁଥିରେ ସେ ୯୮, ୬୨୦ ଖଣ୍ଡ ଭୋଟ୍ ପାଇଥିଲେ । ପ୍ରାୟ ୪୫ ହଜାରରୁ ଉର୍ଦ୍ଧ୍ୱ ଭୋଟରେ ସେ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀ ତଥା ବିଜେପି ପ୍ରାର୍ଥୀ ଦିନେଶ କୁମାର ଜୈନ ପରାସ୍ତ କରିଥିଲେ । ତେଣୁ ପ୍ରାୟ ନିଜ ବାପାଙ୍କଠୁ ପ୍ରାୟ ୩ ହଜାର ଅଧିକ ଭୋଟରେ ଜିତି ବାପା ନବ ଦାସଙ୍କ ରେକର୍ଡ ଭାଙ୍ଗିଛନ୍ତି ଦୀପାଳି ।
ତେବେ ଝାରସୁଗୁଡ଼ା ଉପନିର୍ବାଚନରେ ବିଜେଡି ପ୍ରାର୍ଥୀ ଦୀପାଳି ଦାସଙ୍କ ବିପୁଳ ବିଜୟ ପରେ ତାଙ୍କ ସହ ମୁଖ୍ୟମନ୍ତ୍ରୀ ଫୋନ ଯୋଗେ କଥାବାର୍ତ୍ତା ହୋଇ ଅଭିନନ୍ଦନ ଜଣାଇଛନ୍ତି । ଏହି ବିଜୟ ସହ ଝାରସୁଗୁଡ଼ାର ବିକାଶ ପ୍ରକ୍ରିୟାକୁ ତ୍ବରାନ୍ବିତ କରିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି । ବିଜେଡି ପ୍ରାର୍ଥୀଙ୍କୁ ବିପୁଳ ଭୋଟରେ ବିଜୟ କରାଇଥିବାରୁ ଝାରସୁଗୁଡ଼ାବାସୀଙ୍କୁ ମଧ୍ୟ ମୁଖ୍ୟମନ୍ତ୍ରୀ କୃତଜ୍ଞତା ଜ୍ଞାପନ କରିଛନ୍ତି । ଅନ୍ୟପକ୍ଷରେ ଝାରସୁଗୁଡ଼ା ଉପନିର୍ବାଚନ ଜିତିବା ପରେ ପ୍ରତିକ୍ରିୟା ରଖିଛନ୍ତି ଦୀପାଳି ଦାସ । ସେ କହିଛନ୍ତି ଯେ, ‘ଆଜି ସମସ୍ତେ ମୋ ବାପାଙ୍କ ବ୍ୟକ୍ତିତ୍ୱ, ଅସ୍ଥିତ୍ୱ ଓ ତାଙ୍କ ନାଁକୁ ଝାରସୁଗୁଡ଼ା ମାଟିକୁ ଫେରାଇ ଆଣିଛନ୍ତି । ମୋ ବାପା ପୁଣି ଥରେ ଝାରସୁଗୁଡ଼ାକୁ ଫେରିଛନ୍ତି। ବାପାଙ୍କୁ ଲୋକେ ବିଶ୍ୱାସ କରୁଥିଲେ, ଏଥର ତାଙ୍କ ଝିଅ ଉପରେ ଆସ୍ଥା ପ୍ରକଟ କରିଛନ୍ତି ।’ ସେ କହିଛନ୍ତି ଝାରସୁଗୁଡ଼ାରେ ବିକାଶ ପୁରୁଷ ନବୀନ ପଟ୍ଟନାୟକଙ୍କ ପାଦ ପଡ଼ିଛି । ସମସ୍ତଙ୍କୁ ହୃଦୟରୁ ଧନ୍ୟବାଦ, ବାପାଙ୍କୁ ସମସ୍ତେ କେତେ ଭଲ ପାଉଥିଲେ ତା’ ଉତ୍ତର ଆଜି ମିଳିଗଲା । ଝାରସୁଗୁଡାରେ ବିକାଶର ଦୀପାବଳି ଜଳିବା ପାଇଁ ଆଉ କେହି ଅଟକାଇ ପାରିବେ ନାହିଁ । ଝାରସୁଗୁଡାବାସୀ ମାନ୍ୟବର ମୁଖ୍ୟମନ୍ତ୍ରୀ ଏବଂ ମୋ ଉପରେ ଭରସା କରିଛନ୍ତି । ବାପାଙ୍କ ପରି କାମ କରିକି ଦେଖେଇବାର ଅଛି ବୋଲି ମଧ୍ୟ କହିଛନ୍ତି ଦୀପାଳି ଦାସ ।
