ଓଡ଼ିଆ ବାର୍ତ୍ତା/ ରାୟଗଡ଼ା (ପଦ୍ମନ ଭତ୍ରା): ରାୟଗଡ଼ା ସଦର ମହକୁମା କଂଗ୍ରେସ୍ ଭବନ ଠାରେ ଏକ ସାମ୍ବାଦିକ ସମ୍ମିଳନୀ ଆୟୋଜିତ ହୋଇଯାଇଛି । ଏଥିରେ ଲକ୍ଷ୍ମୀପୁର ନିର୍ବାଚନ ମଣ୍ଡଳୀର ବିଧାୟକ ପବିତ୍ର ସାଉନ୍ତା ଏବଂ ରାୟଗଡ଼ା ନିର୍ବାଚନ ମଣ୍ଡଳୀ ବିଧାୟକ ଆପାଲ୍ଲା ସ୍ଵାମୀ କାଡ୍ରାକା ଯୋଗ ଦେଇଥିଲେ । ଏହି ସାମ୍ୱାଦିକ ସମ୍ମିଳନୀରେ ଦୁଇ ବିଧାୟକ ଇଲେକ୍ସନ୍ କମିଶନର ପକ୍ଷପାତିତା ଏବଂ ଭୋଟ ଚୋରି ହୋଇଛି ବୋଲି କହିଛନ୍ତି । ୨୦୧୪ରେ କେନ୍ଦ୍ରରେ ବିଜେପି ଶାସନକୁ ଫେରିବା ପରଠାରୁ ବିଭିନ୍ନ ନିର୍ବାଚନ ଫଳାଫଳ ଅତ୍ୟନ୍ତ ଅପ୍ରତ୍ୟାଶିତ ହେଉଥିବାରୁ ସମଗ୍ର ନିର୍ବାଚନ ପ୍ରକ୍ରିୟାରେ ହେରଫେର ହୋଇଥିବା ଆଶଙ୍କା କରିଛି କଂଗ୍ରେସ । ମହାରାଷ୍ଟ୍ର ପରି ଗୋଟିଏ ରାଜ୍ୟରେ ଆଡ଼ିସନ୍ ଯୋଗେ ବିଜେପିକୁ ଜିତାଇ ଦିଆଗଲା ଓ ଆଉ ଏକ ଜାଗାରେ ଡିଲିସନ୍ ଯୋଗେ କଂଗ୍ରେସକୁ ହରାଇବାର ଚକ୍ରାନ୍ତ କରାଗଲା । ନିର୍ବାଚନୀ ରାଲିରେ କଂଗ୍ରେସ୍ ପ୍ରତି ଲୋକଙ୍କ ଆଗ୍ରହ, ବୁଥ ବାହୁଡ଼ା ମତ, କଂଗ୍ରେସର ଆଭ୍ୟନ୍ତରୀଣ ସର୍ବେ ବିଷୟ ଗୁଡ଼ିକ ବିଚାରକୁ ନେଇ ଜିତିବା ଆଶା କରାଯାଇଥିଲା । କଂଗ୍ରେସ୍ ପକ୍ଷରୁ ଅଭିଯୋଗ ହୋଇଛି ଯେ ଘର ଲୋକଙ୍କ ନାମ ନ ଲେଖି ABCDEF ବୋଲି ରଖାଯାଇଛି । ଗୋଟିଏ ଠିକଣାରେ ବହୁ ଭୋଟର ରହୁଥିବା ଏବଂ ଗୋଟିଏ ଘରେ ୬୦ଜଣ ରହୁଥିବା ଦର୍ଶାଇଥିଲା । ଏହିଭଳି ବିଭିନ୍ନ ପ୍ରକାର ଚଞ୍ଚକତା କରି ବିଜେପି ଭୋଟ ଚୋରି କରିଛି ବୋଲି ଅଭିଯୋଗ କରିଛନ୍ତି ଏହି ତଥ୍ୟ ଲୁଚାଇଛନ୍ତି ଇଲେକ୍ସନ କମିଶନ | ରାହୁଲ ଗାନ୍ଧିଙ୍କ କହିବା ଅନୁସାରେ ରାଜ ନେତାମାନଙ୍କ ଭଳି ଇଲେକ୍ସନ କମିଶନ୍ କହୁଛନ୍ତି । ଇଲେକ୍ସନ କମିଶନକୁ କଂଗ୍ରେସ କହିଛି ରାଜ ନେତାଙ୍କ ଭଳି ମନ୍ତବ୍ୟ ଦିଅନାହିଁ, ଆମ ତଥ୍ୟ ଭୁଲ ବୋଲି ପ୍ରମାଣିତ କର । ଦିବା ଲୋକରେ ଗଣତନ୍ତ୍ରର ଅପହରଣ ହେଉଛି । ଓଡ଼ିଶାରେ ମୋଟ ୪୨ଲକ୍ଷ ଭୋଟ ଚୋରି ହୋଇଛି ଅର୍ଥାତ୍ ୨୧ଗୋଟି ନିର୍ବାଚନ ମଣ୍ଡଳୀରେ ୨ଲକ୍ଷ ଲେଖାଏଁ ଭୋଟ ଚଞ୍ଚକତା ହୋଇଛି ବୋଲି ଏହି ସାମ୍ବାଦିକ ସମ୍ମିଳନୀରେ କହିଛନ୍ତି କଂଗ୍ରେସ ନେତା ।
