ଚାରିଆଡେ ଉତ୍ସବର ମାହୋଲ, ଦେଖା ଦେଇଛି ଟ୍ରାଫିକ ସମସ୍ୟା
ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ପଶ୍ଚିମ ଓଡିଶାର ପ୍ରସିଦ୍ଧ ଗଣପର୍ବ ନୂଆଖାଇ ଆଉ କିଛି ଦିନ ପରେ ଆସିବ । ଏନେଇ ନର୍ଲା ଅଞ୍ଚଳ ଚଳଚଞ୍ଚଳ । ନୂଆଖାଇ ପୂର୍ବଦିନ ଗଣେଶ ପୂଜା । ନର୍ଲା ବଜାର ପୁରା ସରଗରମ । ଚାରିଆଡେ ଉତ୍ସଵର ମାହୋଲ । ନର୍ଲାରେ ଦୁଇଗୋଟି ସାପ୍ତାହିକ ହାଟ ବସିଥାଏ । ରବିବାର ବଡ ହାଟ ଓ ଗୁରୁବାର ଛୋଟ ହାଟ । ବୁଧବାର ଗଣେଶ ପୂଜା ଓ ପରଦିନ ଗୁରୁବାର ନୂଆଖାଇ ପଡ଼ୁଥିବାରୁ ରବିବାର ନୂଆଖାଇ ହାଟ ହୋଇଥିଲା । ଅନ୍ୟ ରବିବାର ଅପେକ୍ଷା ନୂଆଖାଇ ପୂର୍ବରୁ ଏହି ରବିବାର ସାପ୍ତାହିକ ହାଟରେ ପ୍ରବଳ ଭିଡ ପରିଲକ୍ଷିତ ହୋଇଥିଲା । ବଳି ପୂଜା ପାଇଁ କୁକୁଡ଼ା, ବତକ ପ୍ରଭୃତିରୁ ଆରମ୍ଭ କରି ପନି ପରିବା ବିଶେଷ କରି ଧରଣୀ ଦେବୀ ଓ ଅନ୍ନଦାତ୍ରୀ ମା ମହଲକ୍ଷ୍ମୀଙ୍କ ଠାରେ ଖେଡ ସୁଆ ନିମନ୍ତେ ଧାନ କେଣ୍ଡା ଓ ନୂଆ ଧାନର ଚୁଡା ନୂଆଖାଇ ପର୍ବର ମୁଖ୍ୟ ସାମଗ୍ରୀ ହୋଇଥିବାରୁ ସମସ୍ତେ ବଜାରୁ କିଣିଥିଲେ ଏସବୁ ସାମଗ୍ରୀ । ନୂଆଖାଇ ପଶ୍ଚିମ ଓଡିଶାର ମୁଖ୍ୟ ପର୍ବ ହୋଇଥିବାରୁ ନୂଆଖାଇ ପାଇଁ ନୂଆବସ୍ତ୍ର କିଣିବା ନିମନ୍ତେ ଏବଂ ନୂଆଖାଇ ପୂର୍ବଦିନ ଗଣେଷ ପୂଜା ପାଇଁ ମଧ୍ୟ କପଡା, କିରାନା, ଫେନ୍ସି ଓ ପୂଜା ଦୋକାନ ଗୁଡିକରେ ପ୍ରବଳ ଜନ ଗହଳି ରହିଥିଲା । ଏହା ଦିନେ କି ଦୁଇଦିନ ନୁହଁ ଗତ ଗୁରୁବାର ଦିନ ଠାରୁ ନୂଆଖାଇ ବଜାର ପାଇଁ ନର୍ଲା ମାର୍କେଟ ପ୍ରବଳ ଭିଡ । ନର୍ଲା ମୁଖ୍ୟ ରାସ୍ତାର ଦୁଇ ପାର୍ଶ୍ଵ ବସଷ୍ଟାଣ୍ଡ ସ୍ଥିତ ମାର୍କେଟ କମ୍ପ୍ଲେକସ ବାଇକ ଓ ଚାରି ଚକିଆ ଯାନ ବାହନ ଗୁଡିକର ପାର୍କିଂ ଯୋଗୁଁ ଟ୍ରାଫିକ ସମସ୍ୟା ଉପୁଜିଛି । ୧୦ ବର୍ଷ ପୂର୍ବର ନର୍ଲା ଓ ଏବକାର ନର୍ଲା ମଧ୍ୟରେ ଅନେକ ଫରକ ହେଲାଣି । ଆଗରୁ ଏଠାକାର ଲୋକେ କପଡା ତଥା ଅନ୍ୟାନ୍ୟ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପାଇଁ ସଦର ମହକୁମା ଭବାନୀପାଟଣା କିମ୍ବା ନର୍ଲା ନିକଟସ୍ଥ ରୁପ୍ରାରୋଡକୁ ଯାଉଥିଲେ ବଜାର ହାଟ ପାଇଁ । ଏହା ବି ସତ୍ୟ କଥା ଯେ ରୁପ୍ରାରୋଡ ବସ୍ତି ହେଉଛି ନର୍ଲା ଅଞ୍ଚଳର ପ୍ରମୁଖ ବ୍ୟବସାୟୀକ ପେଣ୍ଠସ୍ଥଳି । ରୁପ୍ରାରୋଡ ବସ୍ତିରେ ଏବେ ମଧ୍ୟ ୫୦ ରୁ ଉର୍ଦ୍ଧ୍ବ କପଡା, ନଡିଆ, ମିକ୍ସଶ୍ଚର ପ୍ରଭୃତିର ହୋଲସେଲ କାଉଣ୍ଟର ଗୁଡିକ ରହିଛି । ନର୍ଲାର ବ୍ୟବସାୟୀ ମାନେ ରୁପ୍ରାରୋଡକୁ ସାମଗ୍ରୀ ଅଣିବା ପାଇଁ ଯାଇଥାନ୍ତି । ହେଲେ ଏବେ ଚିତ୍ରପଟରେ ଅନେକ ପରିବର୍ତ୍ତନ ଘଟିଛି । ନର୍ଲା ଆଖପାଖ ଅଞ୍ଚଳର ଏକ ପ୍ରମୁଖ ବ୍ୟବସାୟୀକ ପେଣ୍ଠସ୍ଥଳି ସାଜିଛି । ମ.ରାମପୁରରୁ ଆରମ୍ଭ କରି ଏପଟେ ଲାଞ୍ଜିଗଡରୋଡ଼ ସେପଟେ ଦେପୁର ଠାରୁ ମଧ୍ୟ ଲୋକେ ବିଭିନ୍ନ ସାମଗ୍ରୀ ଓ ବସ୍ତୁକ୍ରୟ କରିବା ପାଇଁ ନର୍ଲା ଆସିଥାନ୍ତି । ନୂଆଖାଇ ଆସି ଉପନୀତ । ଗଣପର୍ବ ନୂଆଖାଇରେ ସମସ୍ତେ ନୂଆ ପୋଷାକ କରିଥାନ୍ତି । ଗଣେଶ ପୂଜା ଓ ନୂଆଖାଇ ବଜାର ବିଶେଷ କରି ଗୋଟିଏ ସପ୍ତାହ ହୋଇଗଲାଣି ଡ୍ରେସ୍ ଓ କପଡା ବଜାର ରେ ସରଗରମ ଭିଡ ଦେଖିବାକୁ ମିଳୁଛି । ଏଥିପାଇଁ ନର୍ଲା ବଜାର ମୁଖ୍ୟ ରାସ୍ତାର ଦୁଇକଡେ ବାଇକ ଓ ଗାଡି ମୋଟର ଭରପୁର ରହୁଥିବାରୁ ସଂଧ୍ୟା ସମୟରେ ଟ୍ରାଫିକ ସମସ୍ୟା ମଧ୍ୟ ପରିଲକ୍ଷିତ ହେଉଛି ।
