ଓଡ଼ିଆ ବାର୍ତ୍ତା/ ୱାଶିଂଟନ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିରୋଧରେ ୨୦୨୦ ନିର୍ବାଚନରେ ପରାଜୟକୁ ଲୁଚାଇବା ପାଇଁ ଷଡଯନ୍ତ୍ର ମାମଲାର ଶୁଣାଣି ୱାଶିଂଟନ୍ ଡିସି କୋର୍ଟରେ ହୋଇଛି। ଶୁଣାଣି ସମୟରେ ନିଜକୁ ନିର୍ଦ୍ଦୋଷ ବୋଲି କହିଥିଲେ ଟ୍ରମ୍ପ। ପରେ ସେ ଗଣମାଧ୍ୟମକୁ କହିଥିଲେ ଯେ ଏହା ଏକ ‘ରାଜନୈତିକ ପ୍ରତିଦ୍ୱନ୍ଦ୍ୱୀଙ୍କ ଦ୍ୱାରା ଚାଲିଥିବା ଷଡ଼ଯନ୍ତ୍ର’। ଆମେରିକାର ପୂର୍ବତନ ରାଷ୍ଟ୍ରପତି ଚାରିମାସ ମଧ୍ୟରେ ଅପରାଧିକ ମାମଲାରେ ତୃତୀୟ ଥର ପାଇଁ କୋର୍ଟରେ ହାଜର ହୋଇଛନ୍ତି।
ଗଣମାଧ୍ୟମର ରିପୋର୍ଟ ଅନୁଯାୟୀ, ଗୁରୁବାର ଦିନ ୱାଶିଂଟନ କୋର୍ଟର ପଛ ଦ୍ୱାର ଦେଇ ଟ୍ରମ୍ପଙ୍କୁ ଭିତରକୁ ଅଣାଯାଇଥିଲା। ଜାନୁଆରୀ ୬, ୨୦୨୧ ରେ ଟ୍ରମ୍ପ ସମର୍ଥକମାନେ ଆମେରିକା କଂଗ୍ରେସ ଉପରେ ଆକ୍ରମଣ କରିଥିଲେ। କୋର୍ଟରେ ହାଜର ହେବା ପାଇଁ ଟ୍ରମ୍ପ ତାଙ୍କ ବ୍ୟକ୍ତିଗତ ବିମାନରେ ନ୍ୟୁ ଜର୍ସିରେ ଥିବା ତାଙ୍କ ବାସଭବନରୁ ୱାଶିଂଟନରେ ପହଞ୍ଚିଥିଲେ। ଏହି ଅଭିଯୋଗରେ ଟ୍ରମ୍ପଙ୍କ ବିରୋଧରେ ଚାରୋଟି ଅଭିଯୋଗ ରହିଛି। ଏଥି ମଧ୍ୟରେ କୌଣସି ସରକାରୀ କାର୍ଯ୍ୟରେ ବାଧା ସୃଷ୍ଟି, ଆମେରିକାକୁ ଠକିବା ଷଡଯନ୍ତ୍ର, ନାଗରିକଙ୍କ ବିରୁଦ୍ଧରେ ଷଡଯନ୍ତ୍ର ଅନ୍ତର୍ଭୁକ୍ତ।
ମାଜିଷ୍ଟ୍ରେଟ୍ ଜଜ୍ ମୋକ୍ସିଲା ଉପାଧ୍ୟାୟ ପୂର୍ବତନ ରାଷ୍ଟ୍ରପତିଙ୍କୁ ଏହି ଘଟଣାର ସତ୍ୟତା ଉପରେ କୌଣସି ମନ୍ତବ୍ୟ ନଦେବାକୁ କହିଥିଲେ। ଏହାକୁ ପାଳନ ନକରିବା ଦ୍ୱାରା ଗିରଫ ୱାରେଣ୍ଟ, ମୁକ୍ତ ସର୍ତ୍ତ ବାତିଲ କିମ୍ବା କୋର୍ଟର ଅବମାନନା ହୋଇପାରେ ବୋଲି ସେ ଚେତାବନୀ ଦେଇଛନ୍ତି। ସେହିପରି କୋର୍ଟରେ ଟ୍ରମ୍ପଙ୍କ ବ୍ୟତୀତ ପ୍ରାୟ ୧୦୦୦ ଅପରାଧୀ ହାଜର ହୋଇଥିଲେ। ଏମାନଙ୍କ ବିରୋଧରେ ଜାନୁଆରୀ ୬ରେ ଆମେରିକାର କ୍ୟାପିଟାଲରେ ପ୍ରବେଶ କରି ସେଠାରେ ଦଙ୍ଗା କରିଥିବା ଅଭିଯୋଗ ହୋଇଥିଲା।
