କୃତଜ୍ଞତା ଜଣାଇଲେ ଅଭିଭାବକ ଓ ଅଂଚଳବାସୀ
ଓଡ଼ିଆ ବାର୍ତ୍ତା/ ରାୟଗଡା (ଶିବ ନାରାୟଣ ଗୈାଡ): ୧୩ ବର୍ଷ ବୟସରେ ହୃଦରୋଗ ଭଳି ମାରାତ୍ମକ ରୋଗରେ ପୀଡିତ ହୋଇ ମୃତ୍ୟୁ ସହ ସଂଗ୍ରାମ କରୁଥିଲେ ରାୟଗଡା ଜିଲ୍ଳା କାଶିପୁର ବ୍ଳକର ସୁଙ୍ଗେର ଗ୍ରାମ ପଂଚାୟତ ଅନ୍ତର୍ଗତ ସାଗବାରୀ ଗ୍ରାମର ସୁଶାନ୍ତ ନାୟକଙ୍କ ୧୩ ବର୍ଷିୟ ନାବାଳକ ପୁଅ ଭବାନୀଶଙ୍କର ନାୟକ । ଆଉ ପୁଅର ଅସ୍ତ୍ରୋପଚାର ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରିବାରେ ବାପା ସୁଶାନ୍ତ ସକ୍ଷମ ହୋଇ ନ ପାରି ଭାଙ୍ଗି ପଡିଥିଲେ । ତେବେ ଗତ ଦୁଇ ଦିନ ତଳେ ସୁଙ୍ଗେର ଗ୍ରାମ ପଂଚାୟତର ବିଭିନ୍ନ ଗ୍ରାମଗୁଡିକ ପରିଦର୍ଶନରେ ଯାଇଥିବା ବେଳେ ନାବାଳକର ହୃଦରୋଗ ବିଷୟରେ ଖବର ପାଇବା ପରେ ତୁରନ୍ତ ଅସ୍ତ୍ରୋପଚାର ପାଇଁ ତଥା ସମସ୍ତ ଆବଶ୍ୟକୀୟ ମେଡିକଲ ଖର୍ଚ୍ଚ ବହନ କରିବାର ପ୍ରତିଶୃତି ଦେଇ ପ୍ରତିଶୃତି ପାଳନ କରିଛନ୍ତି ଘରୋଇ ମୈତ୍ରୀ କମ୍ପାନୀର ଅଧ୍ୟକ୍ଷ ଶ୍ରୀନିବାସ । ଆନ୍ଧ୍ର ପ୍ରଦେଶର ବିଶାଖାପାଟଣମ୍ ସ୍ଥିତ ଇନଡୁସ୍ ହସ୍ପିଟାଲରେ ଭବାନୀଶଙ୍କରଙ୍କ ସଫଳ ଅସ୍ତ୍ରୋପଚାର ହୋଇଥିବା ଜଣାପଡିଛି । ଆଉ ଏଭଳି ସହୃଦୟ ବ୍ୟକ୍ତିର ଗରୀବ ପରିବାର ପ୍ରତି ସହାୟତାର ହାତ ବଢେଇଥିବାରୁ ଶ୍ରୀନିବାସଙ୍କ ଏହି ବଦାନ୍ୟତା ପାଇଁ ହୃଦରୋଗୀ ନାବାଳକ ଭବାନୀଶଙ୍କରଙ୍କ ଅଭିଭାବକଙ୍କ ସହ ସାଗବାରୀ ଗ୍ରାମବାସୀ କୃତଜ୍ଞତା ଜଣାଇଥିବା ବେଳେ ସୁଙ୍ଗେର ପଂଚାୟତର ଅଂଚଳବାସୀମାନେ ମଧ୍ୟ ଧନ୍ୟବାଦ ଜଣାଇଛନ୍ତି । ଯେ ହେତୁ ମୈତ୍ରୀ କମ୍ପାନୀ ପକ୍ଷରୁ ସୁଙ୍ଗେର ଅଂଚଳରେ ଖଣି ଉତୋଳନ କରାଯିବା ପାଇଁ ସ୍ୱୀକୃତି ମିଳିଛି ନିଜର ସିଏସଆର ନିୟମ ପ୍ରକାରେ ପ୍ରଭାବିତ ଅଂଚଳବାସୀଙ୍କ ସମସ୍ତ ସୁଖଦୁଃଖ ଓ ବିକାଶରେ କମ୍ପାନୀ ସହଯୋଗ କରିବ ବୋଲି କମ୍ପାନୀ କର୍ତୁପକ୍ଷ ସୂଚନା ପ୍ରଦାନ କରିଛନ୍ତି ।
