ଓଡ଼ିଆ ବାର୍ତ୍ତା/ ନୂଆପଡ଼ା (ରାହୁଲ ବାଗ): ନୂଆପଡ଼ା ସହରର ବିଶିଷ୍ଠ ସମାଜସେବୀ ସୁରେଶ ଅଗ୍ରୱାଲଙ୍କ ବାସଭବନରେ ଅଗ୍ରସେନ ଜୟନ୍ତୀ ପ୍ରବଳ ଉତ୍ସାହ ଉଦ୍ଦୀପନା ସହ ଅନୁଷ୍ଠିତ ହୋଇଯାଇଛି । ସମାଜସେବୀ ସୁରେଶ ଅଗ୍ରୱାଲଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ଉତ୍କଳ ପ୍ରାଦେଶିକ ମାରୱାଡ଼ି ସଂଘର ଅଧ୍ୟକ୍ଷ ଗୋବିନ୍ଦ ଚନ୍ଦ୍ର ଅଗ୍ରୱାଲ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବରେ ଜୋନାଲ ସଭାପତି ସୁବାଷ ଚନ୍ଦ୍ର ଅଗ୍ରୱାଲ, ଏବଂ ବିଶିଷ୍ଟ ଅତିଥି ଭାବରେ ଦୀପକ କୁମାର ଗୁପ୍ତା ଓ ନୂଆପଡା ମାରୱାଡ଼ି ସଂଘର କର୍ମକର୍ତ୍ତା ମାନେ ଯୋଗଦେଇଥିଲେ । କାର୍ଯ୍ୟକ୍ରମର ପ୍ରାରମ୍ଭରେ ପ୍ରଥମେ ନୂଆପଡ଼ା ସହରର ସମସ୍ତ ମାରୱାଡ଼ି ସମ୍ପ୍ରଦାୟର ଲୋକେ ସହର ପରିକ୍ରମା କରିବା ସହ ଏକ ସାଧାରଣ ସଭା ଆୟୋଜନ କରାଯାଇଥିଲା । ଏହି ସଭାରେ ଅଗ୍ରେସେନ ମହାରାଜଙ୍କ ଉପରେ ଆଲୋଚନା କରିବା ସହ ମାରୱାଡ଼ି ସଂପ୍ରଦାୟର ଉନ୍ନତି ପାଇଁ ଆଲୋଚନା କରାଯାଇଥିଲା । ପରେ ଦ୍ଵିତୀୟ ପର୍ଯ୍ୟାୟରେ ସଂସ୍କୃତିକ କାର୍ଯ୍ୟକ୍ରମ ମଧ୍ୟ ଅନୁଷ୍ଠିତ ହୋଇଥିଲା |
