ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ପତିବ୍ରତା ସଧବା ନାରୀ ମାନେ ସ୍ୱାମୀର ମଙ୍ଗଳ ମନାସୀ ସାବିତ୍ରୀ ବ୍ରତ ପାଳନ କରିବେ ଆସନ୍ତା କାଲି ଗୁରୁବାରରେ । ଆଉ ସାବିତ୍ରୀ ବ୍ରତ ପୂଜା ପାଇଁ ସମସ୍ତ ପ୍ରକାରର ଫଳର ଆବଶ୍ୟକତା ରହୁଥିବାରୁ ଫଳ ବଜାରରେ ଏବେ ନିଆଁ ଲାଗିଛି । ସାବିତ୍ରୀ ଙ୍କୁ ପୂଜା କରି ସନ୍ତୁଷ୍ଟ କରିବା ପାଇଁ ସତ୍ୟବାନ ରୁପୀ ପତିଦେବ ବାପୁଡା ଫଳ ବଜାରର ଫଳ ସବୁର ଦର ଦେଖି ଛାନିଆ । ସତ୍ୟବାନ ଭାବରେ ପୂଜା ପାଇଁ ପତ୍ନୀ ଦେବୀଙ୍କୁ ସନ୍ତୁଷ୍ଟ କରିବା ନିମନ୍ତେ ପ୍ରୟାସ କରୁଥିବା ପତିଦେବ ଫଳ ସବୁର ଅତ୍ୟଧିକ ଚଢାଦର ଯୋଗୁଁ ଫଳ ବଜାର ମଧ୍ୟରେ ଅଣ ନିଶ୍ୱାସୀ ହୋଇଯାଉଥିବା ନର୍ଲାର ବଜାରରେ ପ୍ରତୀୟମାନ ହେଉଥିଲା । ନର୍ଲା ବୋଲି ନୁହଁ ସାରା ଜିଲ୍ଲାରେ ଫଳ ବଜାରର ଏହି ସ୍ଥିତି । ଗତକାଲି ପର୍ଯ୍ୟନ୍ତ କିଲୋ ପ୍ରତି ୭୦ ରୁ ୧୦୦ ଟଙ୍କା ରହିଆସିଥିବା ଲିଚୁ ଆଜି ବଜାରରେ ଗୋଟାକୁ ୧୦ ଟଙ୍କା, ସେହିଭଳି ତରଭୁଜ ଗତକାଲି ପର୍ଯ୍ୟନ୍ତ ଯାହା ଗୋଟାକୁ ୩୦ ରୁ ୫୦ ଟଙ୍କାରେ ମିଳୁଥିଲା ଆଜି ତାହାରି ଦର ୧୨୦ ଟପି ଯାଇଛି । ସେଓ ଓ ଅଙ୍ଗୁର ୩୦୦ ଟଙ୍କା ପର୍ଯ୍ୟନ୍ତ କିଲୋ ହୋଇଛି । ସାବିତ୍ରୀ ବ୍ରତ ଯୋଗୁଁ ଫଳ ବଜାରରେ ନିଆଁ ଲାଗିଥିବା ବେଳେ ସାବେତ୍ରୀ ବ୍ରତ ପାଇଁ ଫଳ ଦରକୁ ଆଳ କରି ପରିବା କୁ ମଧ୍ୟ ଛୁଇଁ ହେଉନାହିଁ । ପରିବା ଦର ମଧ୍ୟ ଆଜି ଗତକାଲି ଠାରୁ କିଲୋ ପ୍ରତି ଦୁଇଗୁଣା ହୋଇଯାଇଥିବା ପ୍ରତୀୟ ମାନ ହେଉଥିଲା । ସବୁଠୁ ଆଶ୍ଚର୍ଯ୍ୟ ଦୃଶ୍ୟ ଦେଖିବାକୁ ମିଳିଛି ପାଚିଯାଇ ଶଢି ଯାଇଥିବା ଓ କେତେଦିନରୁ ଶୁଖିଲା ହୋଇ ପଡିରହିଥିବା କେନ୍ଦୁ, ଚାହାଁର, ଜାମୁକୋଳି, କୁସୁମ ଫଳ, ତାଳ, ନାରଜୀ, କମଳା, ଖଜୁରୀ, ସପେଟା ମଧ୍ୟ ବାଦ୍ ପଡିନଥିଲେ । କେଉଁ ଫଳ ମଧ୍ୟ ଆଉ କିଲୋ ହିସାବରେ ବିକ୍ରୀ ହୋଇ ନଥିଲା । ସବୁ ପିସ୍ ଆକାରରେ ଚାଲିଥିଲା ବିକ୍ରୟ । ଚଢାଦରରେ ବିକ୍ରୀ ହେଉଥିବା ଏହି ଶୁଖିଲା ଓ ପଚିଯାଇଥିବା ଫଳ ସବୁ ମଧ୍ୟ ଫଳ ଭେରାଇଟି ପୁରଣ କରିବା ପାଇଁ ସତ୍ୟବାନ ସାଜିବାକୁ ରହିଥିବା ପତିଦେବ ମାନେ ଜୀବନ ବିକଳରେ ଚଢାଦରରେ ଅନ୍ୟ ଦିନ ମାନଙ୍କରେ ଅଲୋଡା ସାଜିଥିବା ଫଳ ଗୁଡିକୁ କିଣିନେବା ପାଇଁ ବାଧ୍ୟ ହୋଇଥିଲେ । ଶାଡୀ କିମ୍ବା ପ୍ରସାଧନ ସାମଗ୍ରୀ କିଣିବାରେ ଯେତେଟା କଷ୍ଟକର ହୋଇ ନଥିଲା ଫଳ କିଣିବା ସମୟରେ ସତ୍ୟବାନ ରୁପୀ ପତିଦେବ ମାନେ ଭୀତତ୍ରସ୍ତ ହୋଇପଡିଥିବା ଦେଖିବାକୁ ମିଳିଥିଲା । ଅନିଚ୍ଛା ସତ୍ୱେ ହେଉ ପଛକେ କାରଣ ରହିଥିଲା ସାବିତ୍ରୀ ବ୍ରତ ପାଇଁ ପତ୍ନୀଙ୍କ ଇଚ୍ଛା ପୁରଣ କରି ପତ୍ନୀଙ୍କୁ ସନ୍ତୁଷ୍ଟ କରିବା । ଆଗାମୀ କାଲି ପବିତ୍ର ସାବିତ୍ରୀ ବ୍ରତ । ସତୀ ନାରୀ ମାନେ ସ୍ୱାମୀଙ୍କ ମଙ୍ଗଳ ଓ ଦୀର୍ଘାୟୁ କାମନା କରିବେ, ଉପାସରେ ରହି ବ୍ରତ କରି ସାବିତ୍ରୀ ଦେବୀଙ୍କ ଭଳି ଜମ ଦେବତାଙ୍କ ଠୁଁ ମଧ୍ୟ ସ୍ୱାମୀଙ୍କ ଆୟୁସ କଳେବଳେ କୌଶଳେ ଫେରାଇ ଆଣିବାର ଦକ୍ଷତା ହାସିଲ କରି ଶାଶୁ, ଶ୍ୱଶୁର ଓ ପରିବାର ସ୍ୱଜନଙ୍କ ମଙ୍ଗଳ କାମନାର ମାଧ୍ୟମ ସାଜି ସମସ୍ତଙ୍କର ପ୍ରୀୟ ଭାବଜନ ହୋଇପାରିବେ ବୋଲି ହିନ୍ଦୁ ନାରୀ ମାନଙ୍କ ଏହି ବ୍ରତ ପାଳନର ଉଦ୍ଦେଶ୍ୟ ରହିଥିବା ଜଣାପଡେ । ସବୁକଥା ଓ ଉଦ୍ଦେଶ୍ୟ ଠିକ୍ । ହେଲେ ଅତ୍ୟଧିକ ଚଢାଦର ଯୁକ୍ତ ଫଳ ବଜାର ଯେ ସତ୍ୟବାନ ରୁପୀ ସ୍ୱାମୀ ମାନଙ୍କର ମନୋସ୍କାମନା ପୁରଣରେ ବ୍ୟାଘାତ ସାଜୁଛି ଏଥିରେ ତିଳେହେଲେ ସନ୍ଦେହ ନାହିଁ । ଏଥିରେ ରାଜ୍ୟ କିମ୍ବା କେନ୍ଦ୍ର ସରକାରଙ୍କର ମଧ୍ୟ ଆୟତ ନାହିଁ । ଏବଂ ଏହାର ବିକଳ୍ପ ମଧ୍ୟ କିଛି ନାହିଁ ବୋଲି ବୁଦ୍ଧିଜିବୀ ମାନେ ମତବ୍ୟକ୍ତ କରିଛନ୍ତି ।
