ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): ଛାତ୍ରଛାତ୍ରୀମାନଙ୍କୁ ଶିକ୍ଷା ଗ୍ରହଣ ତଥା ଆହରଣର ନୂତନ ସୁଯୋଗ ପ୍ରଦାନ କରିବା ଉଦ୍ଦେଶ୍ଯରେ ଫକୀରମୋହନ ବିଶ୍ୱବିଦ୍ୟାଳୟ ସହ ପୁନେ ସ୍ଥିତ ଆପ୍ଲାଏଡ ଏନଭାର୍ଣ୍ଣମେନ୍ଟ ରିସର୍ଚ୍ଚ ଫାଉଣ୍ଡେସନ (ଏ.ଇ.ଆର.ଏଫ) ନାମକ ଏକ ଅଣ ସରକାରୀ ସଂଗଠନ ସହ ବୁଝାମଣାପତ୍ର ସ୍ବାକ୍ଷର ହୋଇଅଛି। ବିଶ୍ୱବିଦ୍ୟାଳୟର କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଏକ ବୈଠକ ଆୟୋଜିତ କରାଯାଇ କୁଳସଚିବ କୁକୁମୀନା ଦାସଙ୍କ ଦ୍ବାରା ଏହି ବୁଝାମଣାପତ୍ର ସ୍ବାକ୍ଷରିତ କରାଯାଇଥିଲା। ଏ.ଇ.ଆର.ଏଫ୍. ହେଉଛି ପୁନେ ଠାରେ ଅବସ୍ଥିତ ଏକ ପଞ୍ଜୀକୃତ ଅଣ-ସରକାରୀ ସଂଗଠନ (ଏନଜିଓ)। ୧୯୯୪ ରେ ଆରମ୍ଭ ଏହି ସଂଗଠନ ଭୂମିରେ ଜୈବ ବିବିଧତା ସଂରକ୍ଷଣ ଦିଗରେ କାର୍ଯ୍ୟ କରିଆସୁଛି। ଫାଉଣ୍ଡେସନ ‘ଗୋଷ୍ଠୀ ଭିତ୍ତିକ ସଂରକ୍ଷଣ’ର ନୀତି ପ୍ରୟୋଗ କରିବା ସହ ପ୍ରାକୃତିକ ସମ୍ପଦ ପରିଚାଳନା ମଡେଲଗୁଡିକୁ ବିକଶିତ କରେ ଯାହା ସଂରକ୍ଷଣକୁ ଲାଭଦାୟକ କରିବା ଏବଂ ସମସ୍ତ ହିତାଧିକାରୀଙ୍କ ପାଇଁ ଏକ ବିଜୟ ପରିସ୍ଥିତି ସୃଷ୍ଟି କରିବା ପାଇଁ ଜଙ୍ଗଲ ସୁରକ୍ଷା କାର୍ଯ୍ୟରେ ସ୍ଥାନୀୟ ସମ୍ପ୍ରଦାୟକୁ ସକ୍ରିୟ ଭାବରେ ଜଡିତ କରିଥାଏ। ଉତ୍ତର ପଶ୍ଚିମ ଘାଟରେ ଏ.ଇ.ଆର.ଏଫ୍.ର ପ୍ରକଳ୍ପଗୁଡିକ କାର୍ଯ୍ୟକାରୀ ହୋଇଛି ଯାହା ଭାରତରେ ଏକ ବିଶ୍ୱ ଜୈବ ବିବିଧତା ହଟସ୍ପଟର ଏକ ଅଂଶବିଶେଷ ଅଟେ। ଏଥିସହ ଏହି ସଂଗଠନ ବିଭିନ୍ନ ଗବେଷଣା, ତାଲିମ, ଦକ୍ଷତା ବିକାଶ ଏବଂ ସଂରକ୍ଷଣ ପାଇଁ ନେଟୱାର୍କିଂ ପାଇଁ ମଧ୍ୟ ଦେଶରେ କାମ କରିଆସୁଛି।
ଦାରିଦ୍ର୍ୟ ଦୂରୀକରଣ, ନିରନ୍ତର ଉତ୍ସ ଗୁଡ଼ିକର ବ୍ୟବହାର ଏବଂ ଅଂଶଗ୍ରହଣକାରୀ ସଂରକ୍ଷଣ ପାଇଁ ଅନୁସନ୍ଧାନ ଏବଂ ବିକାଶ ପ୍ରକ୍ରିୟାରେ ଏହାର ପ୍ରଭାବଶାଳୀ ବ୍ୟବହାର ମଧ୍ୟରେ ଏକ ଦୃଢ ସଂଯୋଗ ସ୍ଥାପନ କରିବାର ଲକ୍ଷ୍ୟ ନେଇ ତଥା ଫକୀରମୋହନ ବିଶ୍ୱବିଦ୍ୟାଳୟର ବିଭିନ୍ନ ବିଭାଗର ଛାତ୍ରଛାତ୍ରୀଙ୍କୁ ଗବେଷଣାତ୍ମକ ସହଯୋଗ ଯୋଗାଇ ଦେବାର ପ୍ରୟାସ ନେଇ ଏହି ବୁଝାମଣାପତ୍ରଟି ସ୍ବାକ୍ଷରିତ ହୋଇଛି। କାର୍ଯ୍ୟକ୍ରମରେ ଏ.ଇ.ଆର.ଏଫ ର ନିର୍ଦ୍ଦେଶକ ଡ଼କ୍ଟର ଅର୍ଚ୍ଚନା ଗୋଡବୋଲେ ଉପସ୍ଥିତ ହୋଇ ଏହି ବୁଝାମଣାପତ୍ରର ସୁଯୋଗ ସଂପର୍କରେ ଅବଗତ କରାଇଥିଲେ। ଏଥିସହ କୁଳପତି ପ୍ରଫେସର ତ୍ରିପାଠୀ ଏହି ପାରସ୍ପରିକ ସହଯୋଗ ଦ୍ବାରା ମିଳିତ ଭାବରେ ଇଷ୍ଟର୍ଣ୍ଣ ଘାଟ ଓ ୱେଷ୍ଟର୍ଣ୍ଣ ଘାଟର ପରିବେଶ ସଂରକ୍ଷଣ ଦିଗରେ ସାମୂହିକ ଗବେଷଣା ସମ୍ଭବ ହୋଇପାରିବ ବୋଲି ଆଶାବ୍ୟକ୍ତ କରିଥିଲେ। କାର୍ଯ୍ୟକ୍ରମରେ ସ୍ନାତକୋତ୍ତର ପରିଷଦର ଅଧ୍ୟକ୍ଷ ପ୍ରଫେସର ଭାସ୍କର ବେହେରା, ଡ଼କ୍ଟର ରୋଜାଲିନ ଦାସ, ଡ଼କ୍ଟର ପଙ୍କଜ କୁମାର ପାଢୀଙ୍କ ସମେତ ସମସ୍ତ ବିଭାଗ ମୁଖ୍ଯ, ଅଧ୍ୟାପକ ଅଧ୍ୟାପିକା, ଅଣଶିକ୍ଷକ କର୍ମଚାରୀ ଓ ଛାତ୍ରଛାତ୍ରୀମାନେ ଉପସ୍ଥିତ ରହିଥିଲେ।
