ବର୍ତମାନ ସୁଦ୍ଧା ମାତ୍ର ୫୦୧୩ ହେକ୍ଟର ଚାଷ ଜମିରେ ଧାନ ବୁଣା ଓ ରୁଆ ସରିଛି
ରାୟଗଡ ଜିଲ୍ଳାରେ ୨ମାସ ମଧ୍ୟରେ ୬୦ପ୍ରତିଶତ ସ୍ୱଳ୍ପବୃଷ୍ଟି
ରାୟଗଡ,୨୩/୭ : ଓଡିଶାର ଉପକୂଳ ରୁ ପଶ୍ଚିମ, ଉତ୍ତର କିମ୍ବା ଦକ୍ଷିଣ ଓଡିଶା ହେଉ ମରୁଡିର ପଦଧ୍ୱନି ସବୁଠି ଏବେ ଶୁଣିବାକୁ ମିଳିଲାଣି । ଜୁନ ମାସ ଶେଷ ହୋଇ ଜୁଲାଇ ମାସର ଧାରା ଶ୍ରାବଣରେ ମୈାସୁମୀ ଲୁଚକାଳି ଖେଳୁଥିବା ବେଳେ ଜୁଲାଇରେ ସାଧାରଣତଃ ଯେତିକି ବର୍ଷା ହେବା କଥା ତା’ଠାରୁ କମି ଯାଇଛି ବର୍ଷାର ପରିମାଣ । ଏପଟେ ବର୍ଷାର ଦେଖା ନ ଥିବା ବେଳେ ଚେକଡ୍ୟାମ ଗୁଡିକର ମରାମତି ବର୍ଷା ପୂର୍ବରୁ ନ ହୋଇଥିବାରୁ ଅନାବନା ଗଛ ତଥା ମାଟି ପୋତି ହୋଇ ପାଣି ନ ଥିବାରୁ କେନାଲ ଗୁଡିକ ମଧ୍ୟ ଶୁଖିଲା ପଡିଥିବାରୁ ପାଣି ଚାଷୀର ଚାଷଜମିକୁ ପଂହଚି ପାରୁନି ଫଳରେ ଚଳିତ ବର୍ଷ ମରୁଡି ଆଶଙ୍କାରେ ମୁଣ୍ଡ ଦେଇ ବସିଲେଣି ରାୟଗଡା ଜିଲ୍ଳାର ଚାଷୀକୂଳ ।
ଶ୍ରାବଣ ମାସରେ ମୂଷଳ ଧାରାରେ ବର୍ଷା ହେବା କଥା କିନ୍ତୁ ଏବେ ଟାଇଁ ଟାଇଁ ଖରା ଯୋଗୁଁ ଜିଲ୍ଳାରେ ଥିବା ସମସ୍ତ ନଦୀ ନାଳ, ଝରଣା ସହ କୂପଗୁଡିକରେ ପାଣି ଶୁଖିଲା ହୋଇପଡିଛି । ଫଳରେ ଚାଷଜମି ଫାଟି ଆଁ କରି ସାରିଲାଣି । ବେଉଷଣ ସମୟରେ ବିଲରେ ହଳ ବୁଲାଇ ପାରୁନି ଚାଷୀ । ପାଣିପାଗ ବିଭାଗର ସୂଚନାକୁ ବିଶ୍ୱାସ କରି ଖରିଫ ଋତୁରେ ଭଲ ଧାନ ଫସଲ କରି କିଛି ଦୁଇ ପଇସା ରୋଜଗାର କରିଥିବା ଚାଷୀ ଏବେ ବର୍ଷା ଆଉ କେନାଲରେ ପାଣି ଅଭାବରୁ ଜମିରେ ଲଗାଇଥିବା ତଳି ମଧ୍ୟ ନଷ୍ଟ ହେବାକୁ ବସିଲାଣି । ଚାଷ କାମ ଆରମ୍ଭରୁ ଏପରି ସ୍ଥିତି ଦେଖି ଚାଷି ମୁଣ୍ଡ କାମ କରୁନି । ରାୟଗଡ ଜିଲ୍ଳା କୃଷି ବିଭାଗ ଠାରୁ ମିଳିଥିବା ସୂଚନା ପ୍ରକାରେ ଚଳିତ ମାସର ୨୧ତାରିଖ ସୁଦ୍ଧା ଜିଲ୍ଳାରେ ବର୍ଷା ପରିମାଣ ୬୦ପ୍ରତିଶତ କମିଯାଇଛି । କୃଷି ପ୍ରାଧନ୍ୟ ରାୟଗଡା ଜିଲ୍ଳାରେ ଧାନଚାଷ ପୂରା ଉଜୁଡିଗଲାଣି କହିଲେ ଚଳେ । କେତେକ ବ୍ଳକରେ ଧାନବୁଣା କାମ ସରିଥିବା ବେଳେ ପାଣି ଅଭାବରୁ ରୁଆ ଓ ବେଉଷଣ ହୋଇପାରୁନାହିଁ । ବର୍ଷାକୁ ଅପେକ୍ଷା କରି ବିଲରେ ଧାନତଳି ଏବେ ହଳଦିଆ ପଡିଗଲାଣି । ପ୍ରବଳ ଟାଣ ଖରାରେ ଜମି ଫାଟି ଆଁ କରିିଛି । କିଛି ବିଲରେ ତ ଗାଈଗୋରୁ ଚରିବା ଆରମ୍ଭ କଲେଣି ।
ଏଭଳି ସ୍ଥିତିରେ ମରୁଡିର ସଙ୍କେତ ମିଳିଥିବା ଚାଷୀ ନିଜ ଭାଗ୍ୟକୁ ଆଦିରି ବସିଛି ତଥାପି ଇନ୍ଦ୍ରଦେବଙ୍କ ଉପରୁ ଭରସା ହରେଇନି ଚାଷୀ । ଆକାଶକୁ ଚାତକ ପରି ଦେଖି ନିଜ ବିଲରେ ଦିନ ତମାମ ବସି ରହୁଥିବା ପରି ଦୃଶ୍ୟ ଦେଖିବାକୁ ମିଳୁଛି । ଅପରପକ୍ଷେ ଜୁଲାଇ ମାସ ୨୧ତାରିଖ ସୁଦ୍ଧା ଜିଲ୍ଳାରେ ମାତ୍ର ୧୫୪.୯ ମିଲିମିଟର ବର୍ଷା ହୋଇଥିବା ବିଭାଗୀୟ ରିପୋର୍ଟ କହୁଛି । ରାୟଗଡ ଜିଲ୍ଳାରେ ଚଳିତ ବର୍ଷ ୧ଲକ୍ଷ ୭୪ ହଜାର ହେକ୍ଟର ଚାଷ ଜମିରୁ ୫୫୪୭୭ ହେକ୍ଟରରେ ଧାନଚାଷ କରିବା ଲକ୍ଷ୍ୟ ରହିଥିବା ବେଳେ ବର୍ତମାନ ସୁଦ୍ଧା ମାତ୍ର ୫୦୧୩ହେକ୍ଟର ଚାଷ ଜମିରେ ଧାନ ବୁଣା ଓ ରୁଆ କାର୍ଯ୍ୟ ଶେଷ ହୋଇଥିବା ସୂଚନା ମିଳିଛି ।
ରାୟଗଡ ଜିଲ୍ଲାର କେଉଁ ବ୍ଲକରେ କେତେ ପରିମାଣରେ ହୋଇଛି ବୃଷ୍ଟିପାତ
ସେହିପରି ଜିଲ୍ଳାର କାଶିପୁରରେ ସର୍ବାଧିକ ୩୪୩.୪ମିମି., ଗୁଣପୁରରେ ୧୦୪ମିମି, ବିଷମକଟକରେ ୧୨୯.୯ମିମି, ମୁନିଗୁଡାରେ ୧୬୭.୨ମିମି , ରାମନାଗୁଡାରେ ୧୧୨.୪ମିମି, କଲ୍ୟାଣସିଂହପୁରରେ ୧୫୩.୯ମିମି, ଚନ୍ଦ୍ରପୁରରେ ୨୩୮.୪ମିମି, କୋଲନରାରେ ୮୬ମିମି, ଗୁଡାରୀରେ ୧୧୬.୮ମିମି, ରାୟଗଡାରେ ୧୦୭ମିମି ଓ ଜିଲ୍ଳାର ଭାତହାଣ୍ଡି ବୋଲାଉଥିବା ପଦ୍ମପୁର ବ୍ଳକରେ ସର୍ବନିମ୍ନ ୧୪.୧ମିମି ବର୍ଷା ହୋଇଥିବା ବିଭାଗୀୟ ରିପୋର୍ଟ ଦର୍ଶାଉଛି ।
ଆଗାମୀ ସପ୍ତାହକ ମଧ୍ୟରେ ବର୍ଷା ନ ହେଲେ ଉପୁଜିବ ମରୁଡି ସମସ୍ୟା – କୃଷି ଉପନିର୍ଦ୍ଦେଶକ
ଏବେ ଚାଷଜମିରେ ମାଟିରେ ଆଦ୍ରତା ଭଲ ରହିଥିବା ବେଳେ ଯଦି ଆଗାମୀ ସପ୍ତାହକ ମଧ୍ୟରେ ବର୍ଷା ନହୁଏ ତେବେ ଜିଲ୍ଳାରେ ମରୁଡି ପରିସ୍ଥିତି ଉପୁଜିପାରେ ବୋଲି ଭାରପ୍ରାପ୍ତ ଜିଲ୍ଳା କୃଷି ଉପ ନିର୍ଦ୍ଦେଶକ କୃଷ୍ଣଚନ୍ଦ୍ର ସିଂ ସୂଚନା ଦେଇଛନ୍ତି । ସେହିପରି ନର୍ସରୀରେ ୮୦ପ୍ରତିଶତ ଧାନ ବିହନ ପର୍ଯ୍ୟାପ୍ତ ପରିମାଣରେ ଗଚ୍ଛିତ ଥିବା ବେଳେ ଜିଲ୍ଳାର ୧୮୨ଟି ପଂଚାୟତ ସମେତ ୩ଟି ୟୁଏଲବିରେ ପୋଷ୍ଟର,ବ୍ୟାନର ମାଧ୍ୟମରେ କୃଷି ଓ ବୀମା କମ୍ପାନୀ ଦ୍ୱାରା ଫସଲ ବୀମା ସମ୍ବନ୍ଧରେ ସଚେତନ କରାଯାଉଥିବା ଜିଲ୍ଳା କୃଷି ଉପନିର୍ଦ୍ଦେଶକ ଶ୍ରୀ ସିଂ କହିଛନ୍ତି ।
ରାୟଗଡରୁ ଶିବ ନାରାୟଣ ଗୌଡଙ୍କ ରିପୋର୍ଟ odiabarta.in
For latest news & updates, click on bell button and subscribe to notifications.
Like us on Facebook👇
http://facebook.com/odiabarta
