କଳାହାଣ୍ଡି,୨୯/୭ : ଏବର୍ଷର ପ୍ରଥମ ବର୍ଷାରେ ଭାଙ୍ଗିଲା କାଳିଗଙ୍ଗା ନଦୀ କୂଳର ଗାଡୱାଲ୍ । କାର୍ଯ୍ୟ ସମାପ୍ତିର ୬ ମାସ ନପୁରୁଣୁ ଏହା ଭାଙ୍ଗି ଯାଇଥିବାରୁ ଗାର୍ଡୱାଲ୍ କାର୍ଯ୍ୟକୁ ନେଇ ଉଠିଛି ପ୍ରଶ୍ନବାଚୀ । ଏହା ଠିକାଦାର ଓ ସରକାରୀ ବାବୁଙ୍କ ମଧୁ ଚନ୍ଦ୍ରିକା ଫଳ ବୋଲି ସାଧାରଣରେ ଚର୍ଚ୍ଚା ଚାଲିଛି । ପ୍ରାପ୍ତ ସୂଚନାରୁ ପ୍ରକାଶଯେ, କଳାହାଣ୍ଡି ଜିଲ୍ଲା ମ. ରାମପୁର ବ୍ଳକ ମୋହନଗିରି ପଞ୍ଚାୟତ ଅଧିନସ୍ଥ ଦେଉଳଶୁଳିଆ କାଳିଗଙ୍ଗା ନଦୀ କୂଳରେ ଗାର୍ଡୱାଲ ନିର୍ମାଣ କରିବା ପାଇଁ ମ.ରାମପୁର ପଞ୍ଚାୟତ ସମିତି ପକ୍ଷରୁ ୫ ଲକ୍ଷ ଟଙ୍କା ମଞ୍ଜୁର ହୋଇଥିବା ନେଇ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ତରଫରୁ ଏନେଇ ସୂଚନା ଫଳକରେ ଉଲ୍ଲେଖ ରହିଛି । ଏହିକାର୍ଯ୍ୟ ୪ ଜାନୁୟାରୀ ୨୦୧୯ ରୁ ଆରମ୍ଭ ହୋଇ ୧୪ ମାର୍ଚ୍ଚ ୨୦୧୯ ଏମିତି ୭୦ ଦିନରେ ସରିଥିବା ସୂଚନା ଫଳକ ସୂଚିତ କରୁଛି। କିନ୍ତୁ ନିମ୍ନ ମାନର କାମ ହୋଇଥିବା ହେତୁ ଗାର୍ଡୱାଲଟି ଭୁଷୁଡି ପଡ଼ିଥିବା ସ୍ଥାନୀୟ ଜନତା ଅଭିଯୋଗ କରିଛନ୍ତି । ଗାର୍ଡୱାଲ୍ ଭାଙ୍ଗିଲା ପରେ ନଦୀ କୂଳରେ ଥିବା ଅନେକ ଚାଷୀ ଏବେ ଚିନ୍ତାରେ ପଡିଯାଇଛନ୍ତି, କାରଣ ସେମାନଙ୍କ ଚାଷ ଜମି ନଷ୍ଟ ହେବାର ଆଶଙ୍କା ରହିଛି । ତେଣୁ ଏଥି ପ୍ରତି ବ୍ଲକ୍ ପ୍ରଶାସନ ଦୃଷ୍ଟି ଦେବାସହ ମରାମତି କରିବାକୁ ଦାବି ହେଉଛି ।