ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ଆଗକୁ ଆସୁଛି ଗହ୍ମା ପୂର୍ଣ୍ଣିମା । ଏହି ଦିନ ରକ୍ଷା ବନ୍ଧନ ଉତ୍ସବ । ଭଉଣୀ ଚାତକ ପରି ଚାହିଁ ରହିଥାଏ ଏହି ଦିନଟିକୁ । ଭାଇ ହାତରେ ରାକ୍ଷୀ ବାନ୍ଧିବ । ଭାଇ ଭଉଣୀକୁ ମନ ପସନ୍ଦର ଉପହାର ଦେବ । ରାକ୍ଷୀର ପ୍ରତିବଦଳରେ ଭଉଣୀକୁ ସବୁ ସମୟରେ ରକ୍ଷା କରିବା ପାଇଁ ଭାଇ ବଦ୍ଧ ପରିକର ରହିବ । ରକ୍ଷା ବନ୍ଧନ ଉତ୍ସବକୁ ଦୃଷ୍ଟିରେ ରଖି ରାକ୍ଷୀ ବ୍ୟବସାୟୀ ମାନେ ଭଳିକି ଭଳି, ରଙ୍ଗ ବେରଙ୍ଗର ରାକ୍ଷୀର ସମ୍ଭାର ନେଇ ପସରା ମେଲେଇ ବସିଛନ୍ତି । ରାକ୍ଷୀ ସମ୍ଭାରରେ ନର୍ଲା ମାର୍କେଟ ଝଲସି ଉଠୁଛି । ଜୁଲାଇ ୨୦ରୁ ନର୍ଲା ମାର୍କେଟର ବସଷ୍ଟାଣ୍ଡ, ଚାରିଛକ, ନର୍ଲାରୋଡ ପ୍ରଭୃତି ସ୍ତାନରେ ଭଳିକି ଭଳି ସଜ୍ଜିତ ରାକ୍ଷୀ ଷ୍ଟଲ ଗୁଡିକ ଖୋଲିଥିବା ଏବଂ ସକାଳୁ ସଂଧ୍ୟାଯାଏଁ ରାକ୍ଷୀ ଷ୍ଟଲ ଗୁଡିକରେ ମହିଳା ମାନଙ୍କ ଭିଡ ପରିଲକ୍ଷୀତ ହେଉଥିବା ଦୃଶ୍ୟମାନ ହେଉଛି । ଆଗ ଭଳି ପାରମ୍ପାରିକ ରାକ୍ଷୀ ବ୍ୟତିରେକ ଏବେ ଯୁଗପୋଜୋଗୀ ତଥା ମୟୁର ଚନ୍ଦ୍ରିକା ରାକ୍ଷୀ, ରୁପା ରାକ୍ଷୀ ଭଳି ବହୁମୂଲ୍ୟ ରାକ୍ଷୀ ଗୁଡିକ ମଧ୍ୟ ନର୍ଲାରେ ଉପଲବ୍ଧ ହେଉଥିବା ଦେଖିବାକୁ ମିଳୁଛି । ଅଗଷ୍ଟ ୯ ଶନିବାର ଦିନ ରକ୍ଷା ବନ୍ଧନ ଉତ୍ସବ ରହିଥିବାରୁ ରାକ୍ଷୀ ଦୋକାନ ଗୁଡିକରେ ଭିଡ କ୍ରମଶଃ ବଢିବାରେ ଲାଗିଛି । ରକ୍ଷା ବନ୍ଧନ ଉତ୍ସବ ପାଇଁ ଗୁରୁବାର ଦିନ ଠାରୁ ମିଠା ଦୋକାନ ଗୁଡିକରେ ମଧ୍ୟ ଭିଡ ଆରମ୍ଭ ହୋଇଯାଇଥିବା ଦେଖିବାକୁ ମିଳୁଛି । ଧାରା ଶ୍ରାବଣ ମାସରେ ଭୀଷଣ ଖରା ଓ ପ୍ରବଳ ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରୁଥିବାରୁ ରାକ୍ଷୀ ବଜାରରେ ଏହାର ମଧ୍ୟ ପ୍ରଭାବ ପଡିଥିବା ଜଣାପଡିଛି । ରକ୍ଷା ବନ୍ଧନ ଉତ୍ସବ ପାଇଁ ଚଳ ଚଞ୍ଚଳ ହୋଇ ଉଠିଛି ନର୍ଲା ମାର୍କେଟ ଏଥିପାଇଁ ମିଠା ଦୋକାନ ସାଙ୍ଗକୁ କପଡା ଦୋକାନ ଗୁଡିକରେ ମଧ୍ୟ ଭିଡ ପରିଲକ୍ଷିତ ହୋଇଛି ।
