ଖାଦ୍ୟର ମାନ ଯାଞ୍ଚ କଲେ, ଛାତ୍ରଛାତ୍ରୀଙ୍କ ରାତ୍ରି ଭୋଜନ ଖାଇଲେ
ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକରେ ବିଭିନ୍ନ ଆବାସିକ ବିଦ୍ୟାଳୟ ରହିଥିବାବେଳେ ପିଲାଙ୍କ ଖାଦ୍ୟପେୟକୁ ନେଇ ଅନେକ ସମୟରେ ଅଭିଯୋଗ ହୋଇ ଆସୁଛି। ଆବାସିକ ହଷ୍ଟେଲ କର୍ତ୍ତୃପକ୍ଷ ମେନୁ ହିସାବରେ ଖାଦ୍ୟ ହେଉନଥିବା ଅଭିଯୋଗ ମଧ୍ୟ ବାରମ୍ବାର ଆସୁଥିଲା। ଏହାକୁ ଦୃଷ୍ଟିରେ ରଖି ଲାଞ୍ଜିଗଡ଼ ଗୋଷ୍ଠୀ ଶିକ୍ଷାଧିକାରୀ ଋଷିଆ ମେହେର ରାତିରେ ବିଭିନ୍ନ ଆବାସିକ ବିଦ୍ୟାଳୟକୁ ଗସ୍ତ କରି ତଦାରଖ କରୁଛନ୍ତି। ଶ୍ରୀ ମେହେର ଲାଞ୍ଜିଗଡ଼ ଗୋଷ୍ଠୀ ଶିକ୍ଷାଧିକାରୀ ଭାବେ ଯୋଗଦେବା ଦିନଠାରୁ ଶିକ୍ଷା କ୍ଷେତ୍ରରେ କିଭଳି ଆହୁରି ଉନ୍ନତି ଆସିପାରିବ ସେନେଇ ପ୍ରତିଦିନ କିଛି ନା କିଛି ସ୍କୁଲକୁ ଗସ୍ତ କରି ପିଲାଙ୍କ ସହ ପାଠ ପଡ଼ାକୁ ନେଇ ଆଲୋଚନା କରିବା, ଶିକ୍ଷକ, ଶିକ୍ଷୟିତ୍ରୀ ମାନେ ଠିକ ସମୟରେ ସ୍କୁଲ ଆସୁଛନ୍ତି କି ନାହିଁ ତଦାରଖ କରିବା, ଭଲି ସ୍କୁଲର ବିଭିନ୍ନ ସମସ୍ୟାକୁ ନେଇ ଛାତ୍ରଛାତ୍ରୀମାନଙ୍କ ସହ ଆଲୋଚନା କରୁଛନ୍ତି। ଶ୍ରୀ ମେହେର ଗତ ୫ ତାରିଖ ଦିନ ରାତିରେ ବିଶ୍ଵନାଥପୁର ଉଚ୍ଚ ପ୍ରାଥମିକ ଆବାସିକ ବିଦ୍ୟାଳୟକୁ ଗସ୍ତ କରି ପିଲାଙ୍କ ସ୍ଵାସ୍ଥ୍ୟବସ୍ଥା, ମେନୁ ଅନୁଯାୟୀ ଖାଦ୍ୟ ଠିକ ଭାବରେ ଦିଆଯାଉଛି କିନାହିଁ ବିଭିନ୍ନ ପ୍ରକାର ଆନୁଷ୍ଠାନିକ ବ୍ୟବସ୍ତା ଉପରେ ତଦାରଖ କରିଥିବା ବେଳେ ୬ ତାରିଖ ରାତିରେ ଆଦର୍ଶ ବିଦ୍ୟାଳୟ ଓ ଭଯୋଡ଼ାବନ୍ଦ ଛାତ୍ରୀ ନିବାସକୁ ମଧ୍ୟ ଗସ୍ତ କରି ହଷ୍ଟେଲ ଅନ୍ତେବାସୀଙ୍କ ସହ ରାତ୍ରି ଭୋଜନ କରି ଖାଦ୍ୟର ମାନ ପରଖି ଥିଲେ। ହଷ୍ଟେଲ କର୍ତ୍ତୃପକ୍ଷ ଝିଅ ମାନଙ୍କୁ ଆବଶ୍ୟକ ସାମଗ୍ରୀ ଯୋଗାଇ ଦେଉଛନ୍ତି କି ନାହିଁ ସେ ନେଇ ଆଲୋଚନା କରଥିଲେ। ଏହି ପରିଦର୍ଶନ ରେ ପୂର୍ବତନ ଏବିଇଓ ଲଷ୍ମୀପ୍ରିୟା ମୁଦୁଲି ମଧ୍ୟ୍ୟ ସାମିଲ ଥିବାବେଳେ ବ୍ଲକ ଶିକ୍ଷା ଅଧିକାରୀଙ୍କ ରାତ୍ରି ଗସ୍ତକୁ ନେଇ ହଷ୍ଟେଲ କର୍ତ୍ତୃପକ୍ଷଙ୍କ ମଧ୍ୟରେ ଭୟର ବାତାବରଣ ଦେଖାଦେଇଥିବା ବେଳେ ଅବିଭାବକ ମହଲରେ ଏହାକୁ ଉଚିତ ପଦକ୍ଷେପ ବୋଲି ପ୍ରଶଂସା କରାଯାଇଛି।
