କେସିଙ୍ଗା, (ମଧୂସୁଦନ ଠାକୁର): କଳାହାଣ୍ଡି ଜିଲ୍ଲା କେସିଙ୍ଗା ବ୍ଲକ ଜୋଲକୋ-ବୋରିଆ ମଧ୍ୟ ଦେଇ ବୋହିଯାଉଥିବା ରେତନଦୀ ଗର୍ଭରେ ଚେକ ଡ୍ୟାମ ନିର୍ମାଣ ପାଇଁ ପ୍ରକ୍ରିୟା ଆରମ୍ଭ ହୋଇଛି । ଏହି କାର୍ଯ୍ୟ କରିବା ପାଇଁ ବାହାର ରାଜ୍ୟର ଜଣେ ଠିକାଦାର କାର୍ଯ୍ୟାଦେଶ ପାଇଥିବା ଜଣାପଡିଛି । ଏହି ପ୍ରକଳ୍ପ ୪୦ କୋଟି ଟଙ୍କାରେ ନିର୍ମିତ ହେବ ବୋଲି ସମ୍ପୃକ୍ତ ଠିକାଦାରଙ୍କ ଜଣେ କର୍ମଚାରୀ ପ୍ରକାଶ କରିଛନ୍ତି ।ବର୍ତ୍ତମାନ ରେତନଦୀ ମଧ୍ୟରେ କାମ ଚାଲୁ ରଖିବା ପାଇଁ ପ୍ରଥମେ ଚେକିଂ ପ୍ରକ୍ରିୟା ଆରମ୍ଭ ହୋଇଛି । ଖୁବଶୀଘ୍ର ଏହି କାମ ଜୋରସୋରରେ ଆଗାମୀ ଦିନରେ ଚାଲୁରହିବ । ଏହା ସମ୍ପୂର୍ଣ୍ଣ ହେଲେ ଆଗାମୀ ଦିନରେ ଅଞ୍ଚଳର ଜମି ମାନଙ୍କରେ ଉଭୟ ରବି ଏବଂ ଖରିଫ ଋତୁରେ ଚାଷ ହୋଇପାରିବ ବୋଲି ଚାଷୀମାନେ ଆଶାବାନ୍ଧି ବସିଛନ୍ତି । ଏନେଇ ଅଞ୍ଚଳର ଚାଷୀ ମହଲରେ ଆନନ୍ଦ ପ୍ରକାଶ ପାଇଛି ।
ଏଠାରେ ପ୍ରକାଶଯୋଗ୍ୟ ଯେ, ଚାଷୀଙ୍କ ପାଇଁ ଜଳସେଚନର ଲକ୍ଷ୍ୟ ନେଇ ରାଜ୍ୟ ସରକାର ଲଇତରା ନାମରେ ଜୋଲକୋ ଗାଁ ରେତନଦୀ କୂଳରେ ଏକ ବୃହତ ଉଠା ମେଗା ଜଳସେଚନ ପ୍ରକଳ୍ପ ନିର୍ମାଣ କରିଛନ୍ତି । ୨୦୧୫ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜୋଲକୋ ଖେଳ ପଡ଼ିଆରେ ଏକ ଚାଷୀ ସମାବେଶ କରି ଉକ୍ତ ପ୍ରକଳ୍ପକୁ ଉଦଘାଟନ କରିଥିଲେ । ଯେଉଁଦିନ ଏହି ପ୍ରକଳ୍ପ ଉଦଘାଟିତ ହେଲା ସେହିଦିନ କୌଣସି ଯାନ୍ତ୍ରିକ ତ୍ରୁଟି ଯୋଗୁଁ ଠିକ ଭାବରେ ଚାଲିନଥିଲା । ପରେ ପରେ ଏହି ପ୍ରକଳ୍ପ ବର୍ଷାଦିନେ କିଛି ମାତ୍ରାରେ ଚାଲିଥାଏ ଏବଂ ଅନ୍ୟ ମାସ ଗୁଡ଼ିକରେ ନଦୀରେ ଜଳ ପରିମାଣ କମ ରହୁଥିବାରୁ ଏହି ପ୍ରକଳ୍ପ ବନ୍ଦ ପ୍ରାୟ ରହିଥାଏ । ଏଣୁ ଚାଷ କାମରେ ଚାଷୀମାନେ ଜଳସେଚନ ଲାଗି ପ୍ରତ୍ୟେକ ସମୟ ଅସୁବିଧାର ସମ୍ମୁଖୀନ ହେଉଥିଲେ । ଏଥିପାଇଁ ଲଇତରା ପଞ୍ଚାୟତର ଚାଷୀମାନେ ସମ୍ପୃକ୍ତ ବିଭାଗ ଏବଂ ଜିଲ୍ଲା ପ୍ରଶାସନଙ୍କ ନିକଟରେ ବାରମ୍ବାର ରେତନଦୀ ଗର୍ଭରେ ଏକ ଚେକଡ୍ୟାମ ନିର୍ମାଣ ପାଇଁ ଦାବିକରି ଆସୁଥିଲେ । ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ପଦକ୍ଷେପ ନେଇ ଅର୍ଥ ମଞ୍ଜୁର କରିଥିବା ସୂଚନା ମିଳିଛି ।
