ଅଧିକ ସଂଖ୍ୟାରେ ବୟୋଜେଷ୍ଠ ନାଗରିକ ବି ଦେଲେ ଭୋଟ୍
କଳାହାଣ୍ଡି,୧୧/୪ : ୨୦୧୯ ସାଧାରଣ ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ ଆଜି ସମାପ୍ତ ହେବାକୁ ଯାଉଛି । ଦେଶର ଏହି ଗଣତନ୍ତ୍ରର ପର୍ବ ଉପଳକ୍ଷେ ସମସ୍ତ ନାଗରିକ ଉତ୍ସାହିତ ରହିଥିବାବେଳେ ଓଡିଶା ବିଧାନସଭାର ୮୧ ନମ୍ବର ଆସନ ନର୍ଲା ନିର୍ବାଚନ ମଣ୍ଡଳୀରେ ମହିଳା ଓ ଯୁବାବର୍ଗ ମଧ୍ୟରେ ପ୍ରବଳ ଉତ୍କଣ୍ଠା ପରିଳକ୍ଷିତ ହେଉଥିଲା । ନୂଆକରି ଭୋଟ ଦେଉଥିବା ଯୁବକ ମାନେ ଅଧିକ ମାତ୍ରାରେ ଉତ୍ସାହିତ ଥିବାବେଳେ ମତଦାନ କରିବାକୁ ଆସୁଥିବା ବରିଷ୍ଠ ନାଗରିକ, ଭିନ୍ନକ୍ଷମ ଓ ମହିଳା ମାନଙ୍କୁ ସେମାନେ ସହଯୋଗ କରୁଥିବା ଦେଖାଯାଇଥିଲା ।
ଅଧିକ ସଂଖ୍ୟାରେ ବୟୋଜେଷ୍ଠ ନାଗରିକ ମାନେ ଆସି ଭୋଟଦାନ କରିଥିବାବେଳେ ସେମାନଙ୍କ ପାଇଁ ହ୍ବିଲ୍ଲ ଚେୟାର, ବିଶ୍ରାମସ୍ଥଳ ଓ ପାନୀୟଜଳର ସୁବ୍ୟବସ୍ଥା କରାଯାଇଥିଲା । ସେହିପରି ଭିନ୍ନକ୍ଷମ ମାନଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଥିବାରୁ ଏଥର ଭୋଟ ହାର ବଢିବ ବୋଲି ଆକଳନ କରାଯାଇପାରେ ।
ନର୍ଲା ନିର୍ବାଚନ ମଣ୍ଡଳୀରେ ୨୫୩ ବୁଥ୍ ରହିଛି । ସକାଳ ୭ ରୁ ଅପରାହ୍ନ ୪ ଘଣ୍ଟା ମଧ୍ୟରେ ମତଦାନ ସାବ୍ୟସ୍ଥ କରିବାର ସମୟ ନିର୍ଘଣ୍ଟ ଥିବାବେଳେ ଅଧିକ ସଂଖ୍ୟାରେ ଭୋଟର ଥିବାବେଳେ କେତେକ ବୁଥ୍ ରେ ଖବର ଲେଖା ହେବା ପର୍ଯ୍ୟନ୍ତ ମତଦାନ ଚାଲିଛି ଓ ଅଳ୍ପ ସମୟ ମଧ୍ୟରେ ଏହା ସମାପନ ହେବ ବୋଲି ଜଣାପଡିଛି ।
