ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ନର୍ଲାରେ ପ୍ରତି ରବିବାର ଓ ଗୁରୁବାର ଦିନ ସାପ୍ତାହିକ ହାଟ ବସିଥାଏ । ହେଲେ ବିଡମ୍ବନା ଏଇୟା ଯେ ଉକ୍ତ ଦୁଇ ଗୋଟି ସାପ୍ତାହିକ ହାଟ ଭବାନୀପାଟଣା- ଭୁବନେଶ୍ୱର ରାଜ୍ୟ ରାଜପଥ ଉପରେ ସକାଳ ୬ ଘଣ୍ଟାରୁ ଦିନ ୨ ଟା ଯାଏଁ ବସିଥାଏ । ଫଳରେ ବଜାର ଭିଡକୁ ଭାରିଯାନ ଯିବା ଆସିବା ଯୋଗୁଁ ନାହିଁ ନଥିବା ଟ୍ରାଫିକ ସମସ୍ୟା ସୃଷ୍ଟି ହୋଇଥାଏ । ଏହା ଆଜିକାର ସମସ୍ୟା ନୁହଁ । ଦୀର୍ଘ ୫୦ ବର୍ଷରୁ ଉର୍ଦ୍ଧ୍ବ ହୋଇଗଲାଣି ନର୍ଲାର ସାପ୍ତାହିକ ହାଟ ରବିବାର ଦିନ ନର୍ଲା ମୁଖ୍ୟ ରାଜରାସ୍ତା କଡରେ ଚାଲି ଆସୁଛି । ଏହି ସାପ୍ତହିକ ବଜାର ପାଇଁ କୌଣସୀ ନିର୍ଦ୍ଦିଷ୍ଟ ସ୍ଥାନ ନଥିବାରୁ ନର୍ଲା ସାପ୍ତାହିକ ହାଟ ମୁଖ୍ୟ ରାଜ ରାସ୍ତା କଡରେ ହୋଇ ଆସୁଛି । ଗତ ୨୦୦୭ ମସିହାରେ ତତ୍କାଳୀନ ବିଡିଓ ନିହାର ରଞ୍ଜନ ଦାସ ଏହି ସାପ୍ତାହିକ ହାଟରେ ଉପୁଜୁଥିବା ଟ୍ରାଫିକ ସମସ୍ୟାକୁ ଦେଖି ଏହି ହାଟକୁ ନର୍ଲା ହାଇସ୍କୁଲ ପଡିଆ ଓ କଲେଜ ରାସ୍ତାକୁ ଘୁଞ୍ଚାଇଥିଲେ । ହେଲେ ମାସଟେ ଏଭଳି ହାଇସ୍କୁଲ ପଡିଆରେ ଚାଲିବା ପରେ ଓ ଉକ୍ତ ବିଡିଓଙ୍କ ବଦଳୀ ପରେ ପୁଣି ନର୍ଲାର ସାପ୍ତାହିକ ରବିବାର ହାଟ ନର୍ଲା ମୁଖ୍ୟ ରାସ୍ତା କଡକୁ ଚାଲି ଆସିଥିଲା । ଏହି
ରବିବାର ସାପ୍ତାହିକ ହାଟଟି ନର୍ଲା ପୋଲିସ ଷ୍ଟେସନ ସମ୍ମୁଖସ୍ଥ ରାଜ ରାସ୍ତା କଡରେ ବସି ଆସୁଥିଲେ ମଧ୍ୟ ପୋଲିସ୍ ଏଥିପାଇଁ କୌଣସୀ କାର୍ଯ୍ୟାନୁଷ୍ଠାନ ଗ୍ରହଣ କରୁ ନଥିବାରୁ ସାଧାରଣାରେ କ୍ଷୋଭ ପ୍ରକାଶ ପାଇଛି । କେବଳ ନର୍ଲା ସାପ୍ତାହିକ ବଜାର ବୋଲି ନୁହଁ ସପ୍ତାହ ବ୍ୟାପୀ ନର୍ଲା ମୁଖ୍ୟ ରାଜରାସ୍ତା କଡରେ ଆମିସ ବଜାର ( ମାଛ, ମାଂସ) ପ୍ରଭୃତି ବିକ୍ରୟ ହୋଇ ଆସୁଛି । ଏହି ରାସ୍ତା ଦେଇ ସ୍କୁଲ, କଲେଜ ଛାତ୍ରଛାତ୍ରୀ ମାନେ ପାଠପଢିବା ପାଇଁ ଯାଉଛନ୍ତି । ଏଣୁ ମୁଖ୍ୟ ରାସ୍ତା କଡରେ ମାଂସ କାଡିବା ଭଳି କାର୍ଯ୍ୟକୁ ତକ୍ରାଳୀନ ବିଡିଓ ଶ୍ରୀ ଦାସ୍ କଲେଜ ରାସ୍ତାକୁ ଘୁଞ୍ଚାଇଥିଲେ । ତାହା ମଧ୍ୟ ଅଳ୍ପ କେଇଦିନ ମଧ୍ୟରେ ପୁଣି ରାଜ ରାସ୍ତା କଡକୁ ଚାଲି ଆସିଥିଲା ।
ଗତ ରବିବାର ସାପ୍ତାହିକ ହାଟରେ ପ୍ରବଳ ଜନସମାଗମ ରହିଥିବା ବେଳେ ମୁଖ୍ୟ ରାସ୍ତା ଦେଇ ହାଇୱା ଭଳି ଅନେକ ଭାରିଯାନ ଚଳ ପ୍ରଚଳ ଓ ବ୍ୟକ୍ତିଗତ ଚାରିଚକିଆ ଲଘୁ୍ ଯାନ ଗୁଡିକର ଗମନା ଗମନ ଯୋଗୁଁ ପ୍ରବଳ ଟ୍ରାଫିକ ସମସ୍ୟା ଦେଖା ଦେଇଥିଲା । ନର୍ଲାରେ ଗୁରୁବାର ସାପ୍ତାହିକ ହାଟ ଛୋଟ ହାଟ ହୋଇଥିବା ବେଳେ ରବିବାର ହାଟ ରେ କିନ୍ତୁ ପ୍ରବଳ ଜନ ଗହଳି ହୋଇଥାଏ । ଏଣୁ ହାଟ ଦିନ ସକାଳ ୬ ରୁ ୨ ଟା ଯାଏଁ ଯେଉଁ ଭଳି ଭାବରେ ଭାରିଯାନ ଗମନା ଗମନ ଯୋଗୁଁ ଟ୍ରାଫିକ ସମସ୍ୟା ସୃଷ୍ଟି ହେଉଛି କେତେବେଳେ ଯେ ଅଘଟଣ ଘଟିବ ତାହା କହି ହେବନାହିଁ । ଏଣୁ ଏଥିପ୍ରତି ପୋଲିସ ପ୍ରଶାସନ ଗୁରୁତ୍ୱ ଦେଇ ଏହାର ସମାଧାନ କରିବା ପାଇଁ ସାଧାରଣରେ ଦାବୀ ହେଉଛି ।
