ଓଡ଼ିଆ ବାର୍ତ୍ତା/ ମୁମ୍ବାଇ: ଏନସିପିର ରାଜନୀତି ଚର୍ଚ୍ଚାରେ। ସ୍ଥିତି ଏପରି ଯେ ଶରଦ କେଉଁ ପଟରେ ତାହା କହିବା ମୁସକିଲ। ଶୁକ୍ରବାର ସକାଳେ ଦଳର ପ୍ରତିଷ୍ଠାତା ଶରଦ ପାୱାର କହିଲେ ଦଳରେ ବିଭାଜନ ନାହିଁ। ଅଜିତ ପାଓ୍ବାର ଆମର ନେତା। ହେଲେ ଏହାକୁ ନେଇ ରାଜନୀତିକ ବୟାନବାଜି ସରଗରମ ହେବା ପରେ ସଂଧ୍ୟାରେ ସେ ନିଜ ବୟାନରେ ପରିବର୍ତ୍ତନ କରିଛନ୍ତି। ଆଉ କହିଛନ୍ତି ଯେ ଅଜିତ ପାୱାର ଆମର ନେତା ନୁହଁନ୍ତି। ସାଂସଦ ଝିଅ ସୁପ୍ରିୟା ସୁଲେଙ୍କ ବିବୃତ୍ତିରେ ଶରଦ ପାୱାର ପ୍ରତିକ୍ରିୟା ପ୍ରକାଶ କରି କହିଥିଲେ ଯେଉଁଥିରେ ସେ ଅଜିତ ପାୱାରଙ୍କୁ ତାଙ୍କ ନେତା ବୋଲି ଶୁକ୍ରବାର ସକାଳେ କହିଥିଲେ। ଏନସିପି ପ୍ରତିଷ୍ଠାତା କହିଛନ୍ତି ଯେ ସେମାନେ ଭାଇ ଓ ଭଉଣୀ ଏବଂ ଏହା ପଛରେ କୌଣସି ରାଜନୈତିକ ଅର୍ଥ ଖୋଜିବାର ଆବଶ୍ୟକତା ନାହିଁ। ତେବେ ଏହାର କିଛି ଘଣ୍ଟା ପୂର୍ବରୁ ସେ ଅଜିତ ପାୱାରଙ୍କୁ ଏନସିପି ନେତା ବୋଲି କହିଥିଲେ।ଶରଦ ପାୱାର କହିଛନ୍ତି, “ମୁଁ କହି ନଥିଲି ଯେ ଅଜିତ ପାୱାର ଆମର ନେତା। ଏହା ତୁମର (ଗଣମାଧ୍ୟମର) ଦୋଷ। ଏହା ସୁପ୍ରିୟା କହିଛନ୍ତି ଏବଂ ଏହା ଖବରକାଗଜରେ ମଧ୍ୟ ପ୍ରକାଶ ପାଇଛି। ସେ ଆମର ନେତା ନୁହଁନ୍ତି ବୋଲି।” ସୁପ୍ରିୟା ସୁଲେ ଗୁରୁବାର (ଅଗଷ୍ଟ ୨୪) କହିଛନ୍ତି ଯେ ଅଜିତ ପାୱାର ଦଳର ଜଣେ ବରିଷ୍ଠ ନେତା ତଥା ବିଧାୟକ। ବାରମତୀର ଲୋକସଭା ସାଂସଦ ସୁପ୍ରିୟା ସୁଲେ ଅଜିତ ପାୱାରଙ୍କ ବିଷୟରେ କହିଥିଲେ, ବର୍ତ୍ତମାନ ସେ ଦଳ ବିରୋଧୀ ଆଭିମୁଖ୍ୟ ଗ୍ରହଣ କରିଛନ୍ତି ଏବଂ ଆମେ ବାଚସ୍ପତିଙ୍କ ନିକଟରେ ଅଭିଯୋଗ କରିଛୁ ଏବଂ ତାଙ୍କ ପ୍ରତିକ୍ରିୟାକୁ ଅପେକ୍ଷା କରିଛୁ। ଉଲ୍ଲେଖନୀୟ କଥା ହେଉଛି, ଜୁଲାଇ ୨ରେ ଅଜିତ ପାୱାର ଏବଂ ଅନ୍ୟ ୮ ଜଣ ଏନସିପି ବିଧାୟକ ଏକନାଥ ଶିନ୍ଦେ ନେତୃତ୍ୱାଧୀନ ଶିବସେନା-ଭାରତୀୟ ଜନତା ପାର୍ଟି (ବିଜେପି) ସରକାରରେ ଯୋଗ ଦେଇଛନ୍ତି। ସରକାରରେ ଯୋଗଦେବା ପରେ ତାଙ୍କୁ ମହାରାଷ୍ଟ୍ରର ଉପ ମୁଖ୍ୟମନ୍ତ୍ରୀ କରାଯାଇଛି। ଏଥି ସହିତ, କ୍ୟାବିନେଟରେ ତାଙ୍କୁ ଅର୍ଥ ମନ୍ତ୍ରଣାଳୟ ପରି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଛି। ଉଦ୍ଧବ ଠାକରେଙ୍କ ସରକାରରେ ମଧ୍ୟ ଅଜିତ ପାୱାର ଉପ ମୁଖ୍ୟମନ୍ତ୍ରୀମ ଥିଲେ ଏବଂ ଅର୍ଥ ମନ୍ତ୍ରଣାଳୟର ଦାୟିତ୍ୱ ତୁଲାଉଥିଲେ। ଏକ ପ୍ରଶ୍ନର ଉତ୍ତରରେ ଶରଦ ପାୱାର ଏହା ମଧ୍ୟ କହିଛନ୍ତି ଯେ ୨୦୨୪ ଲୋକସଭା ନିର୍ବାଚନରେ ମହାରାଷ୍ଟ୍ରରେ ବିଜେପି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ଅପେକ୍ଷା ମହା ବିକାଶ ଆଗାଡି (MVA) ଭଲ ପ୍ରଦର୍ଶନ କରିବ। ଏମଭିଏରେ ଏନସିପି, ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (ୟୁବିଟି) ଏବଂ କଂଗ୍ରେସ ରହିଛି।
