ଓଡ଼ିଆ ବାର୍ତ୍ତା/ ବାଲେଶ୍ବର (କୃଷ୍ଣ କୁମାର ମହାନ୍ତି): ଫକୀରମୋହନ ବିଶ୍ୱବିଦ୍ୟାଳୟର ଟି.ବି.ଆଇ. ସହିତ ଉପଭୋକ୍ତା-ଅନୁକୂଳ ଖୁଚୁରା ଅଟୋମେସନ୍ ଆପ୍ କମ୍ପାନୀ ‘ବାଜାରସାଇଡ୍ ପ୍ରାଇଭେଟ୍ ଲିମିଟେଡ୍’ର ଏକ ବୁଝାମଣାପତ୍ର ସ୍ଵାକ୍ଷରିତ ହୋଇଯାଇଛି। ଏହି ସହଯୋଗିତା, ରାଜ୍ୟ ମଧ୍ୟରେ ଏକ ନୂତନ ଷ୍ଟାର୍ଟଅପ୍ ଇକୋସିଷ୍ଟମ୍ ପ୍ରତିପୋଷଣ ପାଇଁ ବିଶେଷ ଦୃଢ ପ୍ରତିବଦ୍ଧତାର ଉଦ୍ଦେଶ୍ଯ ନେଇ ସ୍ବାକ୍ଷର କରାଯାଇଥିଲା। ଅନୁଷ୍ଠିତ ହୋଇଥିବା ବୁଝାମଣାପତ୍ର ସ୍ୱାକ୍ଷର ସମାରୋହରେ ବିଶ୍ୱବିଦ୍ୟାଳୟର କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀଙ୍କ ଉପସ୍ଥିତିରେ, ରେଜିଷ୍ଟ୍ରାର କୁକୁମୀନା ଦାସ ଏହାକୁ ସ୍ୱାକ୍ଷର କରିଛନ୍ତି। ଏଥିସହ ଟି.ବି.ଆଇ.ର ସଂଯୋଜକ ପ୍ରଫେସର ପଙ୍କଜ କୁମାର ପାଢୀ ଏବଂ ଏଫଏମୟୁ-ଟି.ବି.ଆଇ.ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ସୁନେନ୍ଦୁ ନାୟକ ଏହି ବୁଝାମଣାପତ୍ରର ସାକ୍ଷୀ ଭାବେ ଦସ୍ତଖତ କରିଛନ୍ତି।
ଉଲ୍ଲେଖଯୋଗ୍ୟ ଯେ, ବଜାରସାଇଡ୍ର ଅନ୍ୟତମ ନିର୍ଦ୍ଦେଶକ ଶ୍ରୀ କୁଲଦୀପ ପ୍ରଧାନ ଏହି କାର୍ଯ୍ୟକ୍ରମରେ କମ୍ପାନୀକୁ ପ୍ରତିନିଧିତ୍ୱ କରିଥିଲେ। ଏହି ବୁଝାମଣାପତ୍ର ଫକୀର ମୋହନ ବିଶ୍ୱବିଦ୍ୟାଳୟ-ଟିବିଆଇର ମାର୍ଗଦର୍ଶିକା, ମାର୍ଗଦର୍ଶନ ଏବଂ ଉତ୍ସ ସମେତ ବଜାରସାଇଡ୍ ପାଇଁ ମୂଲ୍ୟବାନ ସହାୟତା ଯୋଗାଇ ଦେବା ପାଇଁ ପ୍ରତିଶ୍ରୁତି ପ୍ରଦାନ କରିଛି, ଯାହା ଦ୍ବାରା ସେମାନେ ସେମାନଙ୍କର କାର୍ଯ୍ୟକଳାପକୁ ବିସ୍ତାର କରିବା ସହ ମାପଦଣ୍ଡ ନିର୍ମାଣରେ ସାହାଯ୍ୟ କରିବେ ଏବଂ ଏହାସହିତ ଭାରତର ୨, ୩, ଏବଂ ୪ ଟାୟାର୍ ଅନ୍ତର୍ଭୁକ୍ତ ସହରରେ ସ୍ଥାନୀୟ ଖୁଚୁରା ବ୍ୟବସାୟୀଙ୍କୁ ସଶକ୍ତ କରିବାର ଦୃଷ୍ଟିକୋଣ ହାସଲ କରିବେ।ବଜାରସାଇଡ୍ ହେଉଛି ଏକ ଷ୍ଟାର୍ଟ ଅପ୍ କମ୍ପାନୀ ଯାହା ଏକ ଉପଭୋକ୍ତା-ଅନୁକୂଳ ଖୁଚୁରା ଅଟୋମେସନ୍ ଆପ୍ ଏବଂ ଏକ ବିସ୍ତୃତ ଫ୍ରାଞ୍ଚାଇଜ୍ କମ ପାର୍ଟନର ପ୍ରୋଗ୍ରାମର ଡିଜାଇନ୍ ପାଇଁ ଅଗ୍ରଗାମୀ ଅନୁଷ୍ଠାନ। ଏହା ସ୍ଥାନୀୟ, ସ୍ଵାଧୀନ ଖୁଚୁରା ବ୍ୟବସାୟୀଙ୍କୁ ସଶକ୍ତ କରିବା ପାଇଁ ଡିଜାଇନ୍ କରାଯାଇଛି, ବିଶେଷ ଭାବରେ ଭାରତର ୨, ୩ ଏବଂ ୪ ଟାୟାର୍ ଅନ୍ତର୍ଭୁକ୍ତ ସହରକୁ ଲକ୍ଷ୍ଯ କରି ଏହାର ଯୋଜନା କରାଯାଇଛି ବୋଲି କୁଳଦୀପ ପ୍ରଧାନ ଉଲ୍ଲେଖ କରିଥିଲେ। କାର୍ଯ୍ୟକ୍ରମରେ ବିଶ୍ବବିଦ୍ୟାଳୟର ଉନ୍ନୟନ ଅଧିକାରୀ ପ୍ରଫେସର ପବିତ୍ରମୋହନ ନାୟକ, ବିତ୍ତ ନିୟନ୍ତ୍ରକ କରନ ସୋରେନ, ପରୀକ୍ଷା ନିୟନ୍ତ୍ରକ ରଞ୍ଜନ କୁମାର ରାୟ ତଥା ବିଭାଗ ମୂଖ୍ଯମାନେ ଉପସ୍ଥିତ ରହିଥିଲେ।
