ଓଡ଼ିଆ ବାର୍ତ୍ତା/ ଟିକ୍ରାପଡ଼ା (ରମାକାନ୍ତ ରାଜପଲିଆ): ସଇଁତଲା ବ୍ଲକ ଟିକ୍ରାପଡ଼ାରେ ହର୍ଷ ଉଲ୍ଲାସର ସହ ସଧବା ମହିଳା ମାନେ ସାବିତ୍ରୀ ବ୍ରତ ପାଳନ କରିଛନ୍ତି | ଗାଁର ଜଗନ୍ନାଥ ମନ୍ଦିର, ମହାଦେବ ମନ୍ଦିର, ମହାଲକ୍ଷ୍ମୀ ମନ୍ଦିର ସମେତ ୧୦ରୁ ଉର୍ଦ୍ଧ୍ୱ ପୂଜା ମଣ୍ଡପରେ ମହିଳା ଏକତ୍ରିତ ହୋଇ ଏହି ବ୍ରତ ପାଳିଥିଲେ | ମହିଳାମାନେ ପ୍ରତ୍ୟୁଷରେ ପବିତ୍ର ସ୍ନାନ ସାରି ନୂତନ ବସ୍ତ୍ର ପରିଧାନ ପୂର୍ବକ ଉପବାସ ରଖିଥିଲେ | ପୂଜା ମଣ୍ଡପରେ ଲକ୍ଷ୍ମୀ ନାରାୟଣ ଏବଂ ମା’ ସାବିତ୍ରୀଙ୍କ ପୂଜା କରିବା ସହ ସ୍ୱାମୀଙ୍କ ସୁସ୍ଥତା ଏବଂ ଦୀର୍ଘ ଜୀବନ କାମନା କରିଥିଲେ | ପୂଜନ ଅବସରରେ ଦେବୀ ସାବିତ୍ରୀଙ୍କୁ ୨୧ ପ୍ରକାରର ଫଳ ଅର୍ପଣ କରିଥିଲେ | ମଦ୍ର ଦେଶର ରାଜା ଅଶ୍ୱପତିଙ୍କ କନ୍ୟା ସାବିତ୍ରୀ ପତିବ୍ରତା ଧର୍ମ ବଳରେ ନିଜ ମୃତ ସ୍ୱାମୀ ସତ୍ୟବାନ (ଶାଲ୍ୱ ଦେଶ ନୃପତି ସୂର୍ଯ୍ୟବଂଶଜ ଦ୍ୟୁମତସେନ ଓ ରାଣୀ ଶୈବ୍ୟାଙ୍କ ପୁତ୍ର)ଙ୍କ ଜୀବନ ଫେରାଇ ଆଣିଥିବା ପ୍ରସଙ୍ଗ ଉପରେ ଆଧାରିତ ‘ସାବିତ୍ରୀ ବ୍ରତ କଥା’ ପାଠ କରାଯାଇଥିଲା । ଅପରାହ୍ନରେ ପୂଜାର ସମସ୍ତ ଆନୁଷ୍ଠାନିକ କାର୍ଯ୍ୟ ସମାପ୍ତ ହେବା ପରେ ମହିଳାମାନେ ନିଜ ନିଜ ସ୍ୱାମୀ ଏବଂ ବୟସ୍କଙ୍କ ନିକଟରେ ମଥାନତ କରି ଆଶୀର୍ବାଦ ପ୍ରାପ୍ତ ହୋଇଥିଲେ | ଅକ୍ଷୟ ସୁଆର, ଗୌର ସୁଆର, ଗଣେଶରାମ ଠାକୁର, ଭଗବାନ ମିଶ୍ର, ହରିଶଙ୍କର ଶତପଥି ପୂଜକ ଦାୟିତ୍ୱ ନିର୍ବାହ କରିଥିଲେ |
