ଓଡିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ନର୍ଲା ରାଜରାସ୍ତା ଉପରେ ପ୍ରତ୍ୟହ ଗୋରୁପଲ ଭିଡ ପରିଲକ୍ଷିତ ହେଉଛି । ଭବାନୀପାଟଣା- ଭୁବନେଶ୍ୱର ରାଜ୍ୟପଥ ନର୍ଲାଦେଇ ଯାଇଛି । ଭୁବନେଶ୍ୱର ବସ୍ ଓ ଟ୍ରେନ୍ ଯୋଗେ ଯିବାପାଇଁ ନର୍ଲା ବ୍ଲକ୍ ର ୨୬ ଗୋଟି ଗ୍ରାମ ପଞ୍ଚାୟତ ମଧ୍ୟରୁ ପ୍ରାୟତଃ ୧୮ ଗୋଟି ଗ୍ରାମ ପଞ୍ଚାୟତ ଅଧିନସ୍ଥ ଜନସାଧାରଣ ନିର୍ଭର କରିଥାନ୍ତି । ମ.ରାମପୁର, ଭବାନୀପାଟଣା ଭୁବନେଶ୍ୱର ଯିବାପାଇଁ ଏହି ରାସ୍ତା ଉପରେ ଅହରହ ଯାନବାହନ ଯାତାୟତ କରିଥାଏ । ଏହି ପରିପ୍ରେକ୍ଷୀରେ ନର୍ଲା ବସଷ୍ଟାଣ୍ଡ, ବ୍ଲକ୍ ଛକ ଓ ନର୍ଲା ପଞ୍ଚାୟତ ମାର୍କେଟ କମ୍ପେ୍ଲକ୍ସ ସମ୍ମୁଖସ୍ଥ ରାସ୍ତା ଉପରେ ସଂଧ୍ୟା ସମୟରେ ଗୋରୁପଲ ରାସ୍ତା ଉପରେ ଶୋଇ ରହିଥିବା ଏବଂ ବେଳେ ବେଳେ ଝଗଡା କରୁଥିବା ଦେଖିବାକୁ ମିଳିଥାଏ । ରାସ୍ତା ରେ ଯାଉଥିବା ବାଇକ ଆରୋହୀ, ଚାରିଚକିଆ ଯାନବାହନ ଓ ଭାରିଯାନ ଗୁଡିକ ଏହି ଗୋରୁପଲ ଯୋଗୁଁ ନାହିଁନଥିବା ଅସୁବିଧାର ସମ୍ମୁଖିନ ହେଉଥିବା ପରିଲକ୍ଷିତ ହେଉଛି । ଏହି ଗୋରୁପଲ ଯୋଗୁଁ ଅନେକ ସମୟରେ ନର୍ଲା ବସଷ୍ଟାଣ୍ଡ ସମ୍ମୁଖରେ ଦୁର୍ଘଟଣା ମଧ୍ୟ ଘଟୁଥିବାର ନଜୀର ରହିଛି । ଗୋରୁ ମାଲିକ ମାନେ ଗୋରୁ ସବୁକୁ ବେପରୁଆ ଭାବରେ ଖୋଲା ଛାଡି ଦେଉଛନ୍ତି । ଆୟତ୍ତ କରି ରଖୁ ନାହାନ୍ତି । ଯାହା ଫଳରେ ରାସ୍ତାରେ ଚଳ ପ୍ରଚଳ କରୁଥିବା ଯାନ ବାହନ ଚାଳକ ମାନେ ଟ୍ରାଫିକ ସମସ୍ୟାର ସମ୍ମୁଖୀନ ହେଉଛନ୍ତି ଓ ଦୁର୍ଘଟଣା ମଧ୍ୟ ଘଟୁଛି। ଏଣୁ ପ୍ରଶାସନ ଏଥିପ୍ରତି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରନ୍ତୁ ବୋଲି ସାଧାରଣରେ ଦାବୀ ହେଉଛି।
