ଓଡ଼ିଆ ବାର୍ତ୍ତା/ ସୁନ୍ଦରଗଡ଼: ଗଣପର୍ବ ନୂଆଖାଇକୁ ନେଇ ପଶ୍ଚିମ ଓଡ଼ିଶା ଉତ୍ସବ ମୁଖର ହୋଇଉଠିଛି। ଗାଁ ଗାଁରେ ଆରମ୍ଭ ହୋଇଛି ଭେଟଘାଟ କାର୍ଯ୍ୟକ୍ରମ। ଏହି କ୍ରମରେ ସୁନ୍ଦରଗଡର ବଣ ଜଙ୍ଗଲ ଘେରା ଗାଁ ଅବନକେଲା ମଧ୍ୟ ଭାବର ତିହାର ନୂଆଁଖାଇକୁ ଭିନ୍ନ ଭାବାବେଗରେ ପାଳନ କରୁଛି। ଅନେକ ବର୍ଷରୁ ଗାଁରେ ଗଣେଶ ପୂଜା ହୋଇ ଆସୁଥିଲେ ମଧ୍ୟ ୧୧ବର୍ଷ ହେଲା ଗାଁର ଯୁବକମାନଙ୍କ ପ୍ରୟାସରେ ଏବେ ନୂଆଖାଇ ସଂଧ୍ୟାରେ ନୂଆଖାଇ ଭେଟ କାର୍ଯ୍ୟକ୍ରମ ଯୋଡ଼ି ହେଇଯାଇଛି। ଗୁରୁବାର ସନ୍ଧ୍ୟାରେ ଗଣେଶ ପୁଜା କମିଟିର କର୍ମକର୍ତ୍ତା ମାଁ ସମଲେଇଙ୍କୁ ପୁଜା କରିବା ପରେ ନୂଆଖାଇ ଭେଟଘାଟର ମଞ୍ଚ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଏନେଇ ଆୟୋଜିତ କାର୍ଯ୍ୟକ୍ରମରେ ଅତିଥି ଭାବେ ସୁନ୍ଦରଗଡ ବିଧାୟକ ଯୋଗେଶ କୁମାର ସିଂ, ଗେଲବତି ପଟେଲ, ଅମିତ ପଟେଲ, ଜଟିଆ ମୁଣ୍ଡା ପ୍ରମୁଖ ଯୋଗ ଦେଇ ଗାଁ ମାଁକୁ ନିଜ ନିଜର ନୂଆଁଖାଇ ବାର୍ତ୍ତା ଦେଇଥିଲେ। ଯୁବକବି ଫିରୋଜ କୁମାର ପଟେଲ ଓ ମିରାନନ୍ଦ ସେଟ କାର୍ଯ୍ୟକ୍ରମ ପରିଚାଳନା କରିଥିଲେ। ପରେ ପରେ ଗାଆଁର କୁନି କୁନି ଶିଶୁ ମାନଙ୍କୁ ନେଇ ନୃତ୍ୟ ପ୍ରତିଯୋଗିତା ଆୟୋଜିତ ହୋଇଥିଲା ଓ ସମସ୍ତଙ୍କୁ ପୁରସ୍କାର ପ୍ରଦାନ କରାଯାଇଥିଲା। ରାତିରେ ସୁଦୂର ଦୁଲମପୁର ବରଗଡ଼ରୁ ଆସିଥିବା ଶ୍ରୀ ଶ୍ରୀ ଗିରିଗୋବର୍ଦ୍ଧନ କୃଷ୍ଣଗୁରୁ ଭଜନ ମଣ୍ଡଳୀର କଳାକାରମାନେ କଳା ପରିବେଷଣ କରି ଦର୍ଶକଙ୍କୁ ବିମୋହିତ କରିଥିଲେ।
