ଅନେକ ଦିନ ହେଲା ହଜାରେରୁ ଉର୍ଦ୍ଧ୍ବ ଗଛକଟା ଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ଆଖିଦୃଶିଆ ପଦକ୍ଷେପ ଗ୍ରହଣ କରାଯାଇ ନଥିବାରୁ ଅଞ୍ଚଳରେ ଅସନ୍ତୋଷର ବାତାବରଣ ଦେଖାଦେଇଛି
କୋରାପୁଟ: ଜୟପୁର ବନଖଣ୍ଡ ଅଧୀନରେ ଥିବା କୋଟପାଡ଼ ରେଞ୍ଜ ଅନ୍ତର୍ଗତ ଚାନ୍ଦିଲି ସେକ୍ସନର ମଲଚମା ରିଜର୍ଭ ଫରେଷ୍ଟରୁ ବିପୁଳ ପରିମାଣର ଗଛ କଟାହୋଇଥିବା ଅଭିଯୋଗ ହୋଇଛି। ପ୍ରାୟ ୧୦୦୦ରୁ ଉର୍ଦ୍ଧ କଟା ହୋଇଥିବା ବୃକ୍ଷ ମଧ୍ୟରେ ରହିଛି ଶାଳ, ପିଆଶାଳ, ଶାଗୁଆନ ଆଦି ମୁଲ୍ୟବାନ କାଠ। ଅନେକ ଦିନ ହେଲା ଗଛକଟା ଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ଆଖିଦୃଶିଆ ପଦକ୍ଷେପ ଗ୍ରହଣ କରାଯାଇନଥିବାରୁ ଅଞ୍ଚଳରେ ଅସନ୍ତୋଷର ବାତାବରଣ ଦେଖାଦେଇଛି। ଏ ସମ୍ବନ୍ଧରେ ଉଚ୍ଚ ପଦସ୍ଥ ଅଧିକାରୀ ଏପରିକି ବିଭାଗୀୟ ସଚିବଙ୍କୁ ମଧ୍ୟ ଅବଗତ କରାଯାଇଛି। ତେବେ କୌଣସି ସୁଫଳ ମିଳିନଥିବା ଅଞ୍ଚଳବାସୀ ପ୍ରକାଶ କରିଛନ୍ତି। ଗୋଟିଏ ପଟରେ ରାଜ୍ୟ ସରକାର ଜଙ୍ଗଲ- ସୁରକ୍ଷା ପରିବେଶ ରକ୍ଷା ସ୍ଲୋଗାନ ଦେଇ ବାହାଗିନି ମାରୁଥିବା ବେଳେ ତାହା ଯେ କେତେ ମାତ୍ରାରେ କାର୍ଯ୍ୟକାରୀ ହେଉଛି ଏହି ଚିତ୍ରରୁ ସ୍ପଷ୍ଟ ଅନୁମେୟ। ଅନ୍ୟପକ୍ଷରେ ଅଧିକାରୀମାନଙ୍କ ନିରବତାକୁ ନେଇ ସାଧାରଣରେ ସଂଦେହ ସୃଷ୍ଟି ହୋଇଛି।