ଓଡିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ଭବାନୀପାଟଣା ସ୍ଥିତ ମୁଖ୍ୟ ଜଗନ୍ନାଥ ମନ୍ଦିରରେ ପାରମ୍ପରିକ ବିଧି ବିଧାନ ଅନୁକ୍ରମେ ମହାପ୍ରଭୁଙ୍କ ଦେବସ୍ନାନ ଉତ୍ସବ ଅନୁଷ୍ଠିତ ହୋଇଛି। ବାଡିଭୋରରୁ ମଙ୍ଗଳ ଆରତୀ ଓ ଅବକାଶ ନୀତି ପରେ ଚତୁର୍ଦ୍ଧା ମୂର୍ତ୍ତିଙ୍କୁ ଗୋଟି ପହଣ୍ଡିରେ ସ୍ନାନ ମଣ୍ଡପକୁ ଅଣାଯାଇଥିଲା। ସ୍ନାନ ମଣ୍ଡପରେ ପଣ୍ଡିତ ମଙ୍ଗଳୁ ମିଶ୍ରଙ୍କ ଦ୍ଵାରା ସ୍ୱତନ୍ତ୍ର ପୂଜାର୍ଚ୍ଚନା ପରେ ଶ୍ରୀ ଜୀଉ ମାନଙ୍କୁ ଦହି, କ୍ଷୀର, ଘିଅ ଓ ଗଙ୍ଗାଜଳରେ ସ୍ନାନ କରାଯାଇଥିଲା। ତା’ପରେ ସୁବାସିତ ଓ ସଂସ୍କାରିତ ଜଳରେ ସୁଦର୍ଶନ ମହାପ୍ରଭୁଙ୍କୁ ୧୮ କଳସ, ବଳଭଦ୍ରଙ୍କୁ ୩୫ କଳସ, ଜଗନ୍ନାଥଙ୍କୁ ୩୩ କଳସ ଓ ଦେବୀ ସୁଭଦ୍ରାଙ୍କୁ ୨୨ କଳସ ଜଳରେ ସ୍ନାନ କରାଯାଇଥିଲା। ମନ୍ଦିରର ପୂଜକ ଅଜୟ ମହାପାତ୍ର, ସହଯୋଗୀ ସେବାୟତ ଧବଳେଶ୍ବର ମହାପାତ୍ର, ବିଜୟ ମହାପାତ୍ର, ସୁବୋଧ ତ୍ରିପାଠୀ ସମେତ ଅନ୍ୟାନ୍ୟ ସେବାୟତ ମାନଙ୍କ ଦ୍ୱାରା ଦେବସ୍ନାନ ନୀତିକାନ୍ତ ସମ୍ପାଦନ ହୋଇଥିଲା। ପରେ ଶ୍ରୀ ଜୀଉ ମାନଙ୍କୁ ଗଜାନନ ବେଶରେ ସଜ୍ଜିତ କରାଯାଇଥିଲା। ଦେବସ୍ନାନ ଓ ଶ୍ରୀ ଜୀଉଙ୍କ ଗଜାନନ ବେଶ ଦେଖିବା ପାଇଁ ମନ୍ଦିରରେ ଶ୍ରଦ୍ଧାଳୁ ମାନଙ୍କ ଭିଡ଼ ଲାଗିରହିଥିଲା।