ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ମଧ୍ୟପ୍ରଦେଶରେ ପହଞ୍ଚି ରାଜ୍ୟରେ ଅନେକ ବିକାଶମୂଳକ ପ୍ରକଳ୍ପର ମୂଳଦୁଆ ପକାଇଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ରାଜ୍ୟକୁ ୬୦,୦୦୦ କୋଟି ଟଙ୍କା ମୂଲ୍ୟର ଅନେକ ବଡ ଉପହାର ଦେବାକୁ ଯାଉଛନ୍ତି। ସେ ବିନା ରିଫାଇନାରୀରେ ପେଟ୍ରୋକେମିକାଲ କମ୍ପ୍ଲେକ୍ସ ସମେତ ୫୦,୭୦୦ କୋଟିରୁ ଅଧିକ ମୂଲ୍ୟର ପ୍ରକଳ୍ପର ମୂଳଦୁଆ ପକାଇଛନ୍ତି। ତେବେ ଭିତ୍ତି ପ୍ରସ୍ତର ସ୍ଥାପନ କରିବା ପରେ ପ୍ରଧାନମନ୍ତ୍ରୀ ମୋଦୀ ବିରୋଧୀ ଦଳ ନେତାଙ୍କ ଉପରେ ତୀବ୍ର ଅସନ୍ତୋଷ ପ୍ରକାଶ ମଧ୍ୟ କରିଛନ୍ତି। ବିରୋଧୀଙ୍କ ଦ୍ୱାରା ସନାତନ ଧର୍ମର ଅପମାନଠାରୁ ଆରମ୍ଭ କରି ଭାରତର ବିଶ୍ୱାସ ଉପରେ ଉଠିଥିବା ପ୍ରସଙ୍ଗ ଉପରେ ଆଲୋଚନା କରିଛନ୍ତି। ଏହି ସମୟରେ ବିରୋଧୀଙ୍କୁ ମୋଦୀ ଟାର୍ଗେଟ ମଧ୍ୟ କରିଛନ୍ତି। ମଧ୍ୟପ୍ରଦେଶ ପରେ ପ୍ରଧାନମନ୍ତ୍ରୀ ଛତିଶଗଡ ଗସ୍ତ କରିବେ। ମଧ୍ୟପ୍ରଦେଶରେ ଏହି ସମାବେଶକୁ ସମ୍ବୋଧିତ କରିବାବେଳେ ପ୍ରଧାନମନ୍ତ୍ରୀ ମୋଦୀ ବିରୋଧୀ ଦଳ ଇଣ୍ଡିଆକୁ ଟାର୍ଗେଟ କରି କହିଛନ୍ତି ଯେ, କିଛି ଦଳ ଏପରି ଅଛନ୍ତି ଯେଉଁମାନେ ଦେଶ ଏବଂ ସମାଜକୁ ବିଭାଜନ କରିବାକୁ ଚେଷ୍ଟା କରୁଛନ୍ତି। ମିଳିତ ଭାବେ ସେମାନେ ମେଣ୍ଟ କରିଛନ୍ତି। କିଛି ଲୋକ ଏହି ଦଳକୁ ଏକ ଅହଂକାରୀ ଦଳ ବୋଲି ମଧ୍ୟ କହୁଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ ଏହି ଦଳର ନେତା କିଏ ହେବେ ଏପର୍ଯ୍ୟନ୍ତ ନିଷ୍ପତ୍ତି ନିଆଯାଇ ନାହିଁ। ନେତୃତ୍ୱକୁ ନେଇ ଦ୍ୱନ୍ଦ୍ୱ ରହିଛି ଦିଳ। କିନ୍ତୁ ମୁମ୍ବାଇରେ ଅନୁଷ୍ଠିତ ବୈଠକରେ ମିଳିତ ମଞ୍ଚ କିପରି କାର୍ଯ୍ୟ କରିବ ସେଥିପାଇଁ ସେମାନେ ରଣନୀତି ପ୍ରସ୍ତୁତ କରିଛନ୍ତି।ବିରୋଧୀ ଦଳ କିପରି କାର୍ଯ୍ୟ କରିବ ସେନେଇ ପ୍ରଧାନମନ୍ତ୍ରୀ ମୋଦୀ ରାଲିରେ କହିଛନ୍ତି। ସେ କହିଛନ୍ତି ଯେ ଭାରତର ସଂସ୍କୃତି ଉପରେ ଆକ୍ରମଣ କରିବା, ଭାରତର ବିଶ୍ୱାସ ଉପରେ ଆକ୍ରମଣ କରିବା, ହଜାର ହଜାର ବର୍ଷ ଧରି ଭାରତକୁ ଯୋଡିଥିବା ଧାରଣା, ମୂଲ୍ୟବୋଧ ଏବଂ ପରମ୍ପରାକୁ ନଷ୍ଟ କରିବା ଇଣ୍ଡି ଆଲାଇନ୍ସର ନୀତି। ବିରୋଧୀ ଦଳ ସନାତନ ଧର୍ମଙ୍କୁ ହଟାଇବାକୁ ଯୋଜନା କରୁଛି ବୋଲି ପ୍ରଧାନମନ୍ତ୍ରୀ ମୋଦୀ ଅଭିଯୋଗ କରିଛନ୍ତି। ସନାତନକୁ ଶେଷ କରିବାକୁ ଗଠନ ହୋଇଛି ଇଣ୍ଡିଆ ବୋଲି କହିଛନ୍ତି ମୋଦୀ।
