ସନାତନ ଧର୍ମ ବିଶ୍ବର ଏକ ପ୍ରାଚୀନ ଧର୍ମ। ଏହି ଧର୍ମ ବିଶ୍ବ ଭାତୃତ୍ବର ଭାବ ଶିଖାଇଥାଏ। ତେବେ ସନାତନ ଧର୍ମ ବା ହିନ୍ଦୁ ଧର୍ମକୁ ନେଇ ଅନେକ ଲୋକ ଅଶୋଭନୀୟ ବକ୍ତବ୍ୟ ପ୍ରଦାନ କରିବା ଏକ ଅଭ୍ୟାସରେ ପରିଣତ ହୋଇଗଲାଣି। ଭାରତ ଏକ ଧର୍ମ ନିରପେକ୍ଷ ରାଷ୍ଟ୍ର। ଏଥିରେ ହିନ୍ଦୁ ଧର୍ମାବଲମ୍ବୀଙ୍କ ସଂଖ୍ୟା ସର୍ବାଧିକ। ତେବେ ହିନ୍ଦୁ ଦେବାଦେବୀଙ୍କୁ ନେଇ ଅନେକ ଲୋକ ଆପତ୍ତିଜନକ ମନ୍ତବ୍ୟ ପ୍ରଦାନ କରିଥାନ୍ତି, ଯାହା ଅନ୍ୟ ଧର୍ମକୁ ନେଇ ପ୍ରାୟତଃ ଦେଖାଯାଏ ନାହିଁ। ହିନ୍ଦୁ ଦେବାଦେବୀଙ୍କୁ କୁତ୍ସିତ ଭାବେ ଅବତରଣ କରି ଏହି ଧର୍ମକୁ ନ୍ୟୁନ ଦେଖାଇବାର ଅନେକ ପ୍ରୟାସ ହୋଇଛି ମଧ୍ୟ। ତେବେ ସନାତନ ଧର୍ମଧାରାର ଉଦାର ଭାବ ଏହି ଧର୍ମକୁ ମହାନ ଭାବେ ଗଢ଼ି ତୋଳିଛି। ଭାରତରରେ ହିନ୍ଦୁ ଧର୍ମକୁ ନେଇ ଅନେକ ଲୋକ ଅପମାନ ସୂଚକ ମନ୍ୟବ୍ୟ ଦେଉଥିବାବେଳେ ମୁସଲିମ ବହୁଳ ଇଣ୍ଡୋନେସିଆରେ ହିନ୍ଦୁ ଧର୍ମକୁ ଦିଆ ଯାଉଥିବା ସମ୍ମାନକୁ ଦେଖିଲେ ଯେ କୌଣସି ହିନ୍ଦୁ ଆଶ୍ଚର୍ଯ୍ୟ ହୋଇଯିବେ। ଇଣ୍ଡୋନେସିଆରେ ହିନ୍ଦୁ ଧର୍ମର ସଂସ୍କୃତି ପରମ୍ପରା ଅନ୍ୟ ଯେକୌଣସି ହିନ୍ଦୁ ବହୁଳ ଦେଶ ଠାରୁ ଅଧିକ ପ୍ରତିଫଳିତ ହୋଇଥାଏ। ଇଣ୍ଡୋନେସିଆରେ ପ୍ରଚଳିତ ମୁଦ୍ରା ତା’ର ନିର୍ଦ୍ଧିଷ୍ଟ ଛାପ ପାଇଁ ଯେ କୌଣସି ହିନ୍ଦୁ ଲୋକ ପାଇଁ ବିସ୍ମୟ ସୃଷ୍ଟି କରିବାକୁ ଯଥେଷ୍ଟ। ହିନ୍ଦୁ ବହୁଳ ରାଷ୍ଟ୍ର ଭାରତର ମୁଦ୍ରାରେ ଜାତିର ଜନକ ମହାତ୍ମା ଗାନ୍ଧୀଙ୍କ ମୁଣ୍ଡ ରହିଥାଏ। ଏପଟେ ଇଣ୍ଡୋନେସିଆ ଏକ ମୁସଲିମ ବହୁଳ ରାଷ୍ଟ୍ର ହୋଇଥିଲେ ମଧ୍ୟ ଏ ଦେଶର ନୋଟ୍ ରେ ବିଘ୍ନରାଜ ଗଣେଶଙ୍କ ଚିତ୍ର ଦେଖିବାକୁ ମିଳେ। କେବଳ ଗଣେଶଙ୍କ ଚିତ୍ର ନୁହଁ ଇଣ୍ଡୋନେସିଆର ନୋଟ୍ ମାନଙ୍କରେ ଦେବୀ ପାର୍ବତୀ, ଭଗବାନ ଶ୍ରୀରାମ ଓ ଅନେକ ହିନ୍ଦୁ ଦେବତାଙ୍କ ଚିତ୍ର ରହି ଆସିଛି। କେବଳ ଇଣ୍ଡୋନେସିଆର ନୋଟ୍ ରେ ନୁହଁ ଏ ଦେଶର ବିମାନ ସେବାରେ ମଧ୍ୟ ହିନ୍ଦୁତ୍ବର ଛାପ ରହିଛି। ଇଣ୍ଡୋନେସିଆର ଏୟାରଲାଇନ୍ସର ନାମ ‘ଗରୁଡ଼ ଏୟାରଲାଇନ୍ସ’। ଏହି ଏୟାରଲାଇନ୍ସର ବିମାନ ଗୁଡ଼ିକରେ ବ୍ୟବହୃତ ଲୋଗୋରେ ଗରୁଡ଼ ଚିହ୍ନ ରହିଛି। ଏହାଛଡ଼ା ଘରୋଇ ବିମାନ ସେବାର ନାଁ ‘ଜଟାୟୁ ଏୟାରଲାଇନ୍ସ’। ଶୁଣାଯାଏ ଏକଦା ଇଣ୍ଡୋନେସିଆର ରାଷ୍ଟ୍ରପତି ନିଜ ଗସ୍ତ ଅବସରରେ ଆମେରିକା ରାଷ୍ଟ୍ରପତିଙ୍କୁ ବିଦ୍ୟାଦାତ୍ରୀ ସରସ୍ବତୀଙ୍କ ଏକ ପ୍ରତିମା ଉପହାର ଦେଇଥିଲେ। ଖାଲି ସେତିକି ନୁହେଁ ଇଣ୍ଡୋନେସିଆବାସୀ ଭାରତୀୟଙ୍କ ଅପେକ୍ଷା ରାମାୟଣକୁ ଅଧିକ ବୁଝନ୍ତି ଏବଂ ଦେଖନ୍ତି। ସେମାନଙ୍କ ଜାତୀୟ ଟିଭି ଚ୍ୟାନେଲରେ ସପ୍ତାହକୁ ଥରେ ରାମାୟଣ ଧାରାବାହିକ ପ୍ରସାରିତ ହୋଇଥାଏ। ଇଣ୍ଡୋନେସିଆର ବାଲିକପନରେ ଥିବା ଦେଶର ପ୍ରମୁଖ ସପିଙ୍ଗ ମଲ୍ ର ନାମ ‘ରାମାୟଣ ପ୍ଲାଜା’। ଏହି ଦେଶର ଅଧିକାଂଶ ମାଲବାହୀ ଏବଂ ଯାତ୍ରୀବାହୀ ଜଳଜାହାଜର ନାଁ ମହାଭାରତର ଚରିତ୍ର ଦ୍ରୋପଦୀ, ନକୁଳ, ସହଦେବ, ଯୁଧିଷ୍ଠିର ଓ ଅର୍ଜୁନଙ୍କ ନାମରେ ନାମିତ। ଆଉ ଏକ ଆଶ୍ଚର୍ଯ୍ୟର କଥା, ଆମେ ବ୍ୟବହାର କରୁଥିବା ୭୦ ପ୍ରତିଶତ ରୁଦ୍ରାକ୍ଷ ହିମାଳୟ କିମ୍ବା ନେପାଳରୁ ନୁହଁ ବରଂ ଇଣ୍ଡୋନେସିଆର ବାଲିଦ୍ବିପରୁ ଆସିଥାଏ। ବାକି ୩୦ ପ୍ରତିଶତ ରୁଦ୍ରାକ୍ଷ ହିମାଳୟ ଓ ନେପାଳ ଅଞ୍ଚଳରୁ ସଂଗୃହିତ ହୋଇଥାଏ। ସବୁଠାରୁ ଭଲ ଚାହିଦାଥିବା ପଞ୍ଚମୁଖୀ ଓ ଅଷ୍ଟମୁଖି ରୁଦ୍ରାକ୍ଷ ବାଲି ଦ୍ବିପରୁ ହିଁ ଆସିଥାଏ। ମୁଖ୍ୟତଃ ହିନ୍ଦୁମାନେ ହିଁ ରୁଦ୍ରାକ୍ଷର ବ୍ୟବହାର ଜାଣନ୍ତି। କିନ୍ତୁ ଇଣ୍ଡୋନେସିଆ ଭଳି ଏକ ମୁସଲିମବହୁଳ ଦେଶରେ ଏତେ ପରିମାଣରେ ରୁଦ୍ରାକ୍ଷ ଉତ୍ପାଦନ ହେବା ନିଶ୍ଚିତ ଭାବେ ଏକ ଆଶ୍ଚର୍ଯ୍ୟ।
