କଥାକାରର ଜୀବନ ଶବ୍ଦ ଓ ଭାବର ଅନନ୍ତ ପ୍ରବାହ, କହିଲେ ଅତିଥି
ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ଶିକ୍ଷା ଓ ଜ୍ଞାନର ଦିବ୍ୟ ଦୃଷ୍ଟି ‘ପ୍ରଜାପତି ଅନୁଷ୍ଠାନର ସାହିତ୍ୟ ଶାଖା ‘ଅକ୍ଷର’ର କଥା ସାହିତ୍ୟ ପର୍ବ ଓ ‘କଥାକାର ସମ୍ମାନ’ ପ୍ରଦାନ ଉତ୍ସବ ରବିବାର ‘ଆତିଥ୍ୟ ଭବନ ସମ୍ମିଳନୀ କକ୍ଷରେ ଏକ ଭାବଗମ୍ଭୀର ପରିବେଶ ମଧ୍ୟରେ ଅନୁଷ୍ଠିତ ହୋଇଯାଇଛି। ‘ପ୍ରଜାପତି’ର ପ୍ରତିଷ୍ଠାତା କବି ପ୍ରଶାନ୍ତ ଦାସଙ୍କ ପୌରୋହିତ୍ୟରେ ଆୟୋଜିତ ଉତ୍ସବକୁ ବିଶିଷ୍ଟ ଶିକ୍ଷାବିତ୍ ପ୍ରାଧ୍ୟାପକ ହରିକୃଷ୍ଣ ସାହୁ ଉଦ୍ଘାଟନ କରିଥିଲେ। ଲେଖକଟିଏ ଏକାନ୍ତ ଓ ଶାନ୍ତ ମୁହୂର୍ତ୍ତରେ ନିଜ ଭିତର ଓ ନିଜ ବାହାରେ ଥିବା ଅନେକ କଥାକୁ ଉପଲବ୍ଧି କରେ। ତାହା ହିଁ ତାର ଲେଖନୀୟ ଜୀବନକୁ ବିକାଶିତ କରିଥାଏ। ଉପଯୁକ୍ତ ବାତାବରଣ ଲେଖକର ସୃଷ୍ଟିକୁ
ଶକ୍ତିଶାଳୀ କରିଥାଏ ବୋଲି ଶ୍ରୀ ସାହୁ ତାଙ୍କର ଭାଷଣରେ କହିଥିଲେ।
ପ୍ରାରମ୍ଭରେ ‘ପ୍ରଜାପତି’ର ସଂଯୋଜକ ବିପ୍ଳବ ଦାସ ମହାପାତ୍ର ସ୍ଵାଗତ ଭାଷଣ ଦେବା ସହ ‘ଅକ୍ଷର କଥାକାର ସମ୍ମାନ’ ପ୍ରଦାନ
ଉତ୍ସବ ସମ୍ପର୍କରେ ବକ୍ତବ୍ୟ ରଖିଥିଲେ । ସମ୍ପାଦକ ରାଜେଶ ଗିରି ସମ୍ପାଦକୀୟ ବିବରଣୀ ପାଠ କରିଥିଲେ । ସମ୍ମାନିତ ଅତିଥି ଗାଳ୍ପିକ ଗଙ୍ଗାଧର ବିଶ୍ୱାଳ ଔପନ୍ୟାସିକ ପଦ୍ମଜ ପାଳଙ୍କ ଲେଖକୀୟ କୃତି ସମ୍ପର୍କରେ ବିଶେଷ କଥନ ରଖିଥିଲେ। ଏହି ଅବସରରେ ଅତିଥି କବି ଶ୍ରୀଦେବ, ଗାଳ୍ପିକ ତପନ ମହାପାତ୍ର, ଗାଳ୍ପିକ ନିବାରଣ ଜେନା, ଗାଳ୍ପିକ ସୃଷ୍ଟିଧର ପରିଡା, କବି ଉତ୍ପଳ ମହାନ୍ତି, ସୁଲଗ୍ନା ଶିକ୍ଷାନୁଷ୍ଠାନର ପ୍ରତିଷ୍ଠାତା ଘନଶ୍ୟାମ ବିଶ୍ଵାଳ, ଆଇନଜୀବୀ ପର୍ଶୁରାମ ପ୍ରଧାନ ନିଜ ନିଜର ବକ୍ତବ୍ୟ ରଖିଥିଲେ।
ଔପନ୍ୟାସିକ ପଦ୍ମଜ ପାଳଙ୍କୁ ଚଳିତବର୍ଷ ରାଜ୍ୟସ୍ତରୀୟ ମର୍ଯ୍ୟାଦାଜନକ ‘ଅକ୍ଷର କଥାକର ସମ୍ମାନ-୨୦୨୫’ ପ୍ରଦାନ କରାଯାଇଥିଲା। ତାଙ୍କୁ ପୁରସ୍କାର ଅର୍ଥରାଶି, ମାନପତ୍ର, ଉପଢୌକନ ଓ ଉତ୍ତରୀୟ ଅତିଥିମାନେ ପ୍ରଦାନ କରିଥିଲେ।
ସମ୍ମାନ ଗ୍ରହଣ କରି ଔପନ୍ୟାସିକ ଶ୍ରୀ ପାଳ କହିଲେ ଯେ କଥାକାରର ଜୀବନ ଶବ୍ଦ ଓ ଭାବର ଅଳ୍ପ ପ୍ରକାଶ। ସୁନ୍ଦର ଗପଟିଏ ତାଙ୍କୁ ପ୍ରେମ ଓ ଆତ୍ମୀୟତା ପ୍ରଦାନ କରିପାରେ । ଲେଖକର ଜିଜ୍ଞାସାଭାବ ଯେତେ ଗଭୀର ହୁଏ ସୃଷ୍ଟିକାର ସେତେ ଅର୍ଥପୂର୍ଣ୍ଣ ହୋଇପାରେ। ଏହି ସମ୍ମାନ ପ୍ରଦାନ ଉତ୍ସବରେ ଶ୍ରୀ ପାଳଙ୍କୁ ବିଭିନ୍ନ ଅନୁଷ୍ଠାନ ପକ୍ଷରୁ ନାଗରିକ ସମ୍ବର୍ଦ୍ଧନା ପ୍ରଦାନ କରା ଯାଇଥିଲା। ବାଲେଶ୍ବରର କଥାକାରଙ୍କ ପକ୍ଷରୁ ଶ୍ରୀ ପାଳ ଓ ତାଙ୍କ ପତ୍ନୀଙ୍କୁ ‘ପ୍ରଜାପତି’ ଉପହାର ପ୍ରଦାନ କରାଯାଇଥିଲା । ‘ପ୍ରଜାପତି’ର ସଦସ୍ୟା ସରସ୍ଵତୀ ଭୋଇ, ପ୍ରତିମା ତ୍ରିପାଠୀ, ପାର୍ଥସାରଥୀ ସାହୁ ଓ ଅମରଜିତ ଦାସ ନିଜ ନିଜର ଉପହାର ପ୍ରଦାନ କରିଥିଲେ।
ପ୍ରାରମ୍ଭରେ ‘ରାଗିଣୀ’ ଅନୁଷ୍ଠାନର ଶିଳ୍ପୀଗଣ ଗୁରୁ ମୋନାଲିସା ମହାନ୍ତିଙ୍କ ପରିଚାଳନାରେ ସ୍ଵାଗତ ସଂଗୀତ ପରିବେଷଣ କରିଥିଲେ। ‘ନୃତ୍ୟାୟନ’ ଅନୁଷ୍ଠାନର ନୃତ୍ୟଶିଳ୍ପୀଗଣ ଗୁରୁ ପ୍ରଦୀପ ବେହେରାଙ୍କ ପରିଚାଳନାରେ ନୃତ୍ୟ ପରିବେଷଣ କରିଥିଲେ। ନନ୍ଦିତା ନାୟକ, ସୁପ୍ରଭା ବେହେରା, ରଞ୍ଜନ ଘୋଷ, ଶୁଚିସ୍ମିତା ବେହେରା, ପଣ୍ତିତ ଆଚାର୍ଯ୍ୟ, ସଞ୍ଜିବ ନାୟକ, ସୁଜାତା ଦାସ ପ୍ରମୁଖ ଉତ୍ସବ ପରିଚାଳନା କରିଥିଲେ। ଶେଷରେ ମଧୁସୂଦନ ମିଶ୍ର ଧନ୍ୟବାଦ ଅର୍ପଣ କରିଥିଲେ ।
