ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଳକ ଛତ୍ରପୁର ପଞ୍ଚାୟତ ଅନୁସୂଚିତ ଜନଜାତି ଓ ଅନୁସୂଚିତ ଜାତି ଗାଁ ଲେପଟାଗୁଡ଼ାର ୭୦ ପ୍ରତିଶତ ଲୋକଙ୍କ ଘରଡିହ ପଟ୍ଟା ନାହିଁ। ଏହି ଗାଁରେ ଉତ୍କଟ ପାନୀୟଜଳ ସମସ୍ୟା ରହିଛି। ମୌଳିକ ସୁବିଧାରୁ ବଞ୍ଚିତ ଏହି ଗ୍ରାମବାସୀ ଅତି ଦୟନୀୟ ଅବସ୍ଥାରେ ରହିଛନ୍ତି। ସୂଚନା ଅନୁସାରେ, ଲେପଟାଗୁଡ଼ା ଗାଁରେ ୭୩ଟି ପରିବାର ରହୁଛନ୍ତି। ଏହି ଗାଁରେ ବର୍ଷ ବର୍ଷ ଧରି ପିଇବା ପାଣି ସମସ୍ୟା ଲାଗି ରହିଥିବା ବେଳେ ଝରଣା ପାଣିରେ ଶୋଷ ମେଣ୍ଟାଉଛନ୍ତି। ଗ୍ରାମରେ ଗୋଟିଏ ନଳକୂଅ ରହିଥିବା ବେଳେ ସେଠାରେ ସୋଲାର ପମ୍ପ ସଂଯୋଗ କରାଯାଇଛି। ତେବେ ସେଥିରୁ ପର୍ଯ୍ୟାପ୍ତ ପାଣି ବାହାରୁ ନାହିଁ। ଗାଁରେ ପିଇବା ପାଣିର ସୁବିଧା ପାଇଁ ବାରମ୍ବାର ସରପଞ୍ଚ ଓ ବ୍ଲକ ପ୍ରଶାସନକୁ ଜଣାଇବା ପରେ ଆଜିକୁ ୨ ବର୍ଷ ହେଲା ଗାଁରେ ଜଳଯୋଗାଣ ପାଇଁ ୨ଟି ଗଭୀର ନଳକୂଅ ଖୋଳାଯାଇଛି। କିନ୍ତୁ ଦାୟିତ୍ଵ ନେଇଥିବା ଠିକାଦାର ଓ ପ୍ରଶାସନିକ ଅଧିକାରୀ ଇଚ୍ଛା ପ୍ରକଟ କରୁ ନଥିବାରୁ ଆଜି ପର୍ଯ୍ୟନ୍ତ ସେଠାରେ ମୋଟର ସଂଯୋଗ ହୋଇନାହିଁ। ଗାଁରେ ପ୍ରାଥମିକ ସ୍କୁଲ ଅଛି। ଏହି ସ୍କୁଲରୁ ଉତ୍ତୀର୍ଣ୍ଣ ଛାତ୍ରଛାତ୍ରୀ ଆଗକୁ ପଢ଼ିବାରେ କଷ୍ଟକର ହେଉଛି। ଗାଁଠାରୁ ମୁଖ୍ୟ ରାସ୍ତାକୁ ୪ କି.ମି ବାଟ ସମ୍ପୂର୍ଣ୍ଣ ଭାବେ ଜଙ୍ଗଲ ରହିଥିବା ବେଳେ ସଦାସର୍ବଦା ଜଙ୍ଗଲୀ ହାତୀ ଓ ଅନ୍ୟ ହିଂସ୍ରଜନ୍ତୁଙ୍କ ମଧ୍ୟ ଭୟ ରହୁଛି। ତେଣୁ ଆବାସିକ ସ୍କୁଲ ମିଳିଲେ ଯାଇ ଛାତ୍ରଛାତ୍ରୀ ପାଠ ପଢୁଛନ୍ତି। ଗାଁରେ ବିଜୁଳି ସଂଯୋଗ ରହିଛି। କିନ୍ତୁ ଗାଁ ନିକଟସ୍ତ ଝିମିରି ଜଙ୍ଗଲରେ ହାତୀ ରହୁଥିବା ବେଳେ କେବଳ ମାସକୁ ୧୦ ଦିନ ବିଜୁଳି ଗାଁ ଲୋକେ ବ୍ୟବହାର କରୁଥିବା କହିଛନ୍ତି। ରାସ୍ତା ପାଇଁ ପ୍ରଶାସନ ନିକଟରେ ବାରମ୍ବାର ଅଭିଯୋଗ ପରେ ଗତ ୨୦୧୭ ମସିହାରେ ଆର୍ଡି ବିଭାଗ ଦ୍ବାରା ୨.୧୫ କି.ମି. ନୂତନ ରାସ୍ତାଟି ଠିକାଦାରଙ୍କ ଚୁକ୍ତି ରହିଥିଲେ ମଧ୍ୟ ତାହା ୨୦୨୦ ରେ ଆରମ୍ଭ ହୋଇ ୨୦୨୧ରେ କାର୍ଯ୍ୟ ଶେଷ ହୋଇଥିଲା। କିନ୍ତୁ ମାତ୍ର ୧ ବର୍ଷ ମଧ୍ୟରେ ରାସ୍ତାରୁ ପିଚୁ ଉଠୁଥିବା ବେଳେ ବର୍ତ୍ତମାନ ରାସ୍ତାଟି ଖରାପ ହୋଇ ଯାଉଥିବା ଗାଁ ଲୋକେ ଅଭିଯୋଗ କରିଛନ୍ତି। ବର୍ତ୍ତମାନ ପ୍ରଧାନମନ୍ତ୍ରୀ ଜନମନ ଯୋଜନାରେ ଗାଁର ୫୫ ଲୋକଙ୍କୁ ଘର ନିର୍ମାଣ ପାଇଁ ଟଙ୍କା ଆସିଛି। ଏଥିରୁ କେବଳ ୩୦ ପ୍ରତିଶତ ଲୋକହିଁ ଘର ନିର୍ମାଣ କରୁଛନ୍ତି। ଅନ୍ୟ ୭୦ ପ୍ରତିଶତ ଲୋକଙ୍କ ନିଜର ବୋଲି ଘରବାରି ନଥିବାରୁ ଘର ନିର୍ମାଣ କରି ପାରୁନାହାନ୍ତି। ୧୦୦ ବର୍ଷ ଧରି କୁଡିଆ ଘରେ ବସବାସ କରି ଆସୁଥିବା ଲୋକଙ୍କୁ ଘରବାରି ଖଣ୍ଡେ ମିଳିପାରି ନାହିଁ। ତେଣୁ ଏହି ଗାଁର ସମସ୍ୟା ପ୍ରତି ପ୍ରଶାସନ ଓ ଜନପ୍ରତିନିଧି ତୁରନ୍ତ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
