ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): ବାଲେଶ୍ବର ସହରରେ ସର୍ବତ୍ର ଧୂମଧାମରେ ଗଣେଶ ପୂଜା ପାଳିତ ହେଉଥିବା ବେଳେ ସୁସଜ୍ଜିତ ଆଲୋକମାଳା ସାଙ୍ଗକୁ ସୁନ୍ଦର ମୂର୍ତ୍ତି ସମସ୍ତଙ୍କୁ ଆକର୍ଷିତ କରିଛି। ବିଶେଷ କରି ଯୁବପିଢିଙ୍କ ମଧ୍ୟରେ ପୂଜା ଆୟୋଜନ କରିବାର ଆଗ୍ରହ ବାଲେଶ୍ଵର ସହରରେ ବେଶ୍ ଦେଖିବାକୁ ମିଳିଥିବା ବେଳେ ସହରର ଉପାନ୍ତ ଅଞ୍ଚଳ କଳିଙ୍ଗନଗରରେ ଏହାର ବ୍ୟତିକ୍ରମ ଘଟିଛି। ଏଠାରେ କଳିଙ୍ଗ ନଗର ବିକାଶ ପରିଷଦ ପକ୍ଷରୁ କେବଳ ଅବସର ପ୍ରାପ୍ତ ତଥା ବୟୋଜ୍ୟେଷ୍ଠମାନେ ଏକାଠି ହୋଇ ଗଣେଶ ପୂଜା କରୁଥିବା ଦେଖିବାକୁ ମିଳିଛି। ଯାହା ସ୍ଥାନୀୟ ଅଞ୍ଚଳରେ ଭାଇଚାରାର ଏକ ଅଭିନବ ପରମ୍ପରା ସୃଷ୍ଟି କରିପାରିଛି। ସୂଚନାଯୋଗ୍ୟ, ବାଲେଶ୍ଵର ସହର ସାରଗାଁ ପଞ୍ଚାୟତ ଅଧୀନସ୍ଥ କଳିଙ୍ଗ ନଗରରେ କଳିଙ୍ଗ ନଗର ବିକାଶ ପରିଷଦ ପକ୍ଷରୁ ପୂଜା ମଣ୍ଡପରେ ଶ୍ରୀ ଶ୍ରୀ ଗଣେଶ ପୂଜା ଅନୁଷ୍ଠିତ ହୋଇଯାଇଛି। ଏହି ପରିଷଦର ସମସ୍ତ ସଦସ୍ୟ ଅବସରପ୍ରାପ୍ତ କର୍ମଚାରୀ ସାମିଲ ହୋଇ ପୂଜା କରି ଆସୁଛନ୍ତି। ଏହି ଉତ୍ସବରେ ଅଧିକାଂଶ ପରିଷଦ ସଦସ୍ୟ ଓ ଗ୍ରାମବାସୀମାନେ ଯୋଗ ଦେଇଥିଲେ। ପୂଜାରେ ପୂଜକ ମନ୍ତ୍ର ଉଚ୍ଚାରଣ କରି ସମଗ୍ର ଆଖପାଖ ପରିବେଶ ମୁଖରିତ କରିଥିଲେ। ପୂଜା ପାଇଁ ମଧ୍ୟାହ୍ନରେ ପ୍ରାୟ ୨୫୦ ଜଣ ଭକ୍ତଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା। ସମସ୍ତ ଭକ୍ତ ଠାକୁରଙ୍କୁ ଦର୍ଶନ କରିବା ସହ ପ୍ରସାଦ ସେବନ କରିଥିଲେ। ଏହି ଅବସରରେ ସନ୍ଧ୍ୟାରେ ଆଳତି କାର୍ଯ୍ୟକ୍ରମରେ ସ୍ଥାନୀୟ ବାସିନ୍ଦାଙ୍କ ଭଜନ ପରିବେଷଣ କରାଯାଇଥିଲା। ଭଜନ ସମୟରେ କୁନି ବାଦକ ତଥା ଡେପୁଟି କଲେକ୍ଟରଙ୍କ ପୁତ୍ର ଶ୍ରୀମାନ ଆଶୁତୋଷ ବାଦ୍ୟ ପରିବେଷଣ କରି ସମସ୍ତଙ୍କୁ ବିମୋହିତ କରିଥିଲେ। ଏହି ସମୟରେ ପ୍ରାୟ ବହୁ ଭକ୍ତ ଉପସ୍ଥିତ ରହିଥିଲେ। ଏହି ଉତ୍ସବ ପାଳନ ଦ୍ୱାରା ସମସ୍ତଙ୍କ ମଧ୍ୟରେ ଏକ ଭାଇଚାରା ଭାବ ସୃଷ୍ଟି ହୋଇପାରିଛି। ଦୀର୍ଘ ୪ ବର୍ଷ ଧରି ଏଠାରେ ମହାଆଡମ୍ବରରେ ଗଣେଶ ପୂଜା ପାଳିତ ହୋଇଆସୁଛି। ତେବେ ଆଜି ପରିଷଦ ପକ୍ଷରୁ ବାଲିଘାଟରେ ଗଣେଶଙ୍କୁ ବିସର୍ଜନ କରାଯାଇଛି।
