ଓଡ଼ିଆ ବାର୍ତ୍ତା/ ଜୁନାଗଡ଼ (ସ୍ବାସ୍ତିଦୀପ ଆଦିତ୍ୟ): ଜିଲା ମହକୁମା ସମେତ ବିଭିନ୍ନ ସହରରେ ଚଳିତ ବର୍ଷ ଭଳିକି ଭଳି ଗଣେଶଙ୍କ ପ୍ରତିମା ପୂଜା ପାଉଛନ୍ତି । ଜୁନାଗଡ଼ ବଜାରପଡ଼ାରେ ଚୁଡ଼ିରେ ପ୍ରସ୍ତୁତ ଗଣେଶ ପ୍ରତିମା ଦେଖିବାକୁ ଦର୍ଶକଙ୍କ ଭିଡ଼ ପରିଲକ୍ଷିତ ହେଉଛି । ସୂଚନାଯୋଗ୍ୟ, ସ୍ଥାନୀୟ ଜୟ ଶିବଶଙ୍କର କ୍ଲବ୍ ପକ୍ଷରୁ ଗତ ୨୮ ବର୍ଷ ଧରି ଗଣେଶଙ୍କ ପୂଜା କରାଯାଉଛି । ଅନ୍ୟ ସ୍ଥାନର ମୂର୍ତ୍ତି ଅପେକ୍ଷା ଏଠାକାର ମୂର୍ତ୍ତିର ସ୍ବତନ୍ତ୍ରତା ରହିଛି । ଏଠାକାର ପୂଜା ପେଣ୍ଡାଲରେ ପ୍ରତି ବର୍ଷ ଅଭିନବ ଉପାୟରେ ମୂର୍ତ୍ତି ତିଆରି କରାଯାଏ । ଚଳିତ ଥର ଏଠାରେ ଚୁଡ଼ିରେ ଗଣେଶଙ୍କ ପ୍ରତିମା ତିଆରି ହୋଇଛି । ପ୍ରାୟ ୨୫ ଶହ ଚୁଡ଼ିରେ ସ୍ୱତନ୍ତ୍ର ଭାବେ ପ୍ରସ୍ତୁତ ଅଠା ଓ କିଛି ପାରମ୍ପରିକ ରଙ୍ଗ ବ୍ୟବହାର କରି ମୂର୍ତ୍ତି ପ୍ରସ୍ତୁତ କରାଯାଇଛି । ମୁଖ୍ୟ କାରିଗର ପୁରୁଷୋତ୍ତମ କଟାଙ୍କ ସମେତ ସୁରେଶ ନିଆଲ୍, ପ୍ରକାଶ ନିଆଲ, ରାଜନ୍ କଟା, ରୋହିତ ନାଗ ପ୍ରମୁଖ କାରିଗର ମାନେ ପ୍ରାୟ ୧ ମାସ ଧରି ନିଜସ୍ଵ ସୃଜନଶୀଳତା ବଳରେ ମୂର୍ତ୍ତି ତିଆରି କରିବା ସହିତ ମଞ୍ଚ ସଜ୍ଜା କରିଛନ୍ତି । ଗତ ୨୮ ବର୍ଷ ଧରି ଭିନ୍ନ ଭିନ୍ନ ଉପାଦାନରେ ମୂର୍ତ୍ତି ତିଆରି କରୁଥିବା ସେମାନେ କୁହନ୍ତି । ଅଭିନବ ମୂର୍ତ୍ତି ପ୍ରତି ଶ୍ରଦ୍ଧାଳୁଙ୍କ ଆଗ୍ରହ ଦେଖ୍ ବିଭିନ୍ନ ବର୍ଷ ଭିନ୍ନ ଭିନ୍ନ ଉପାଦାନରେ କାରିଗର ମାନେ ମୂର୍ତ୍ତି ତିଆରି କରନ୍ତି । ଅତୀତରେ ରଙ୍ଗ ବେରଙ୍ଗର ନାନା ପ୍ରକାର ଫଳ, ଧାନ ପଲ୍ହା, ବିଭିନ୍ନ ପ୍ରକାର ପତ୍ର, ଭିନ୍ନରଙ୍ଗ ଓ ପ୍ରକାରର କର୍ପୁର ଆଦିକୁ ମଧ୍ଯ ମୂର୍ତ୍ତିର ରୂପ ଦିଆଯାଇଥିଲା । ମୂର୍ତ୍ତି ତିଆରିରେ କେବେ କ୍ଳବ୍ କର୍ମକର୍ତ୍ତା ହସ୍ତକ୍ଷେପ କରୁ ନଥିବାରୁ ପ୍ରତି ବର୍ଷ ଭିନ୍ନ ଭିନ୍ନ ପ୍ରତିକୃତିରେ ଆମେ ମୂର୍ତ୍ତି ତିଆରି କରୁ ବୋଲି କାରିଗର ମାନେ କୁହନ୍ତି । ଗତ ୨୭ରେ ପ୍ରତିମାର ପ୍ରାଣ ପ୍ରତିଷ୍ଠା ପରେ ଚୁଡ଼ି ତିଆରି ଗଣେଶଙ୍କ ଦର୍ଶନ କରିବାକୁ ଦେଖଣାହାରୀଙ୍କ ଭିଡ଼ ଲାଗୁଛି ।
