ବଲାଙ୍ଗୀର,୧୯/୪ : ବଲାଙ୍ଗୀର ଜିଲ୍ଲାରେ ଗତକାଲି ଦ୍ଵିତୀୟ ପର୍ଯ୍ୟାୟ ନିର୍ବାଚନ ଶାନ୍ତି ଶୃଙ୍ଖଳାର ସହ ଶେଷ ହୋଇଯାଇଛି। ଏଥିସହ ୮ ଜଣ ସାଂସଦ ଏବଂ ୫୦ ଜଣ ବିଧାୟକ ପ୍ରାର୍ଥୀଙ୍କ ଭାଗ୍ୟ ଇଭିଏମରେ ସିଲ ହୋଇଛି। ମାଓ ଉପଦ୍ରୁତ ଅଞ୍ଚଳରେ କଡା ସୁରକ୍ଷା ବ୍ୟବସ୍ଥା ମଧ୍ୟରେ ଭୋଟ ଗ୍ରହଣ କରାଯାଇଥିଲା। ସ୍ଥାନୀୟ ସମସ୍ୟାକୁ ନେଇ ଜିଲ୍ଲାର ଦୁଇଟି ସ୍ଥାନରେ ଭୋଟ ବର୍ଜନ କରାଯାଇଥିଲା। ଅନେକ ସ୍ଥାନରେ ଇଭିଏମ ଅଚଳ ଯୋଗୁଁ ଭୋଟଦାନରେ ବିଳମ୍ବ ହୋଇଥିଲା। ଜିଲ୍ଲାର ଅନେକ ବୁଥରେ ରାତିରେ ବି ମତଦାନ ଚାଲିଥିଲା। ସେହିପରି ବଲାଙ୍ଗୀର ସଂସଦୀୟ କ୍ଷେତ୍ରର ସୁବର୍ଣ୍ଣପୁର ଜିଲ୍ଲାରେ ମଧ୍ୟ ରାତି ୭ଟା ଯାଏ ଭୋଟ ଗ୍ରହଣ କରାଯାଇଥିଲା।
