ଓଡ଼ିଆ ବାର୍ତ୍ତା/ କଟକ: କୈବଲ୍ୟ ସାହିତ୍ୟ ସଂସଦ ଆନୁକୁଲ୍ୟରେ ଗୌରୀ ଶଙ୍କର ଟାଉନ୍ ହଲ୍ ଠାରେ ୭୮ତମ ରାଜ୍ୟସ୍ତରୀୟ କାର୍ଯ୍ୟକ୍ରମ ସ୍ମୃତି ଉପାସନା ମହୋତ୍ସବ ଏବଂ କୈବଲ୍ୟ ତ୍ରିରଙ୍ଗା ଉତ୍ସବ ଅନୁଷ୍ଠିତ ହୋଇ ଯାଇଛି । ଏହି କାର୍ଯ୍ୟକ୍ରମକୁ ଓଡ଼ିଶା ଉଚ୍ଚ ନ୍ୟାୟାଳୟ ଆଇନଜୀବୀ ସଂଘ ସଭାପତି ମନୋଜ ମିଶ୍ର ଉଦ୍ଘାଟନ କରିଥିଲେ । ମୁଖ୍ୟ ଅତିଥି ଭାବେ ଧରଣୀଧର ନାୟକ ବରିଷ୍ଠ ଆଇନଜୀବୀ ଯୋଗଦାନ କରି ପ୍ରଦୀପ ପ୍ରଜ୍ବଳନ କରିଥିଲେ । ସ୍ବର୍ଗତ ପଣ୍ଡିତ, ଦାର୍ଶନିକ ଏବଂ ଶିକ୍ଷାବିତ ନୀଳକଣ୍ଠ ରାଉତଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରି ନୀରବ ପ୍ରାର୍ଥନା କରାଯାଇଥିଲା । କୈବଲ୍ୟ ତ୍ରିରଙ୍ଗା ଉତ୍ସବରେ ମୁଖ୍ୟ ଅତିଥି ଜାତୀୟ ପତାକା ପ୍ରଦର୍ଶନ କରି ଜାତୀୟତା ଭାବରେ ସମାଜସେବୀ ଏବଂ ସାହିତ୍ୟିକ ମାନଙ୍କୁ ଉଦବୁଦ୍ଧ କରିଥିଲେ । ଅନୁଷ୍ଠାନର ପ୍ରତିଷ୍ଠାତା ଡ଼କ୍ଟର ସଂଗ୍ରାମ କେଶରୀ ସାମନ୍ତରାୟ କାର୍ଯ୍ୟକ୍ରମକୁ ବ୍ୟାଖ୍ୟା କରି ସ୍ବର୍ଗତ ନୀଳକଣ୍ଠ ରାଉତ ଅମର ହୋଇ ରହିବେ ବୋଲି ଅଭିବ୍ୟକ୍ତି ପ୍ରକାଶ କରିଥିଲେ । ଶହେରୁ ଉର୍ଦ୍ଧ ସାହିତ୍ୟିକ ସ୍ବର୍ଗତ ନୀଳକଣ୍ଠ ରାଉତଙ୍କ ସ୍ମୃତି ଅନୁଭୂତି ବ୍ୟାଖ୍ୟା କରିଥିଲେ । ପଚାଶରୁ ଉର୍ଦ୍ଧ କବି ସ୍ବର୍ଗତ ରାଉତଙ୍କୁ କବିତାରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଅଶିରୁ ଉର୍ଦ୍ଧ ସାହିତ୍ୟ ଏବଂ ସାମାଜିକ ସଂଗଠନ ଯୋଗଦାନ କରି ଭକ୍ତି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସୁନାମଧନ୍ୟ କଣ୍ଠଶିଳ୍ପୀ ତିରିଶରୁ ଉର୍ଦ୍ଧ ଜଗନ୍ନାଥ ଜଣାଣ ଗାନ କରିଥିଲେ । ସତ୍ୟ ସନାତନ ବୈଦିକ ବିଦ୍ୟାଳୟର ଛାତ୍ରଛାତ୍ରୀ ବେଦପାଠ ଏବଂ ଗୀତା ପାଠ କରିଥିଲେ । କୈବଲ୍ୟ ସମ୍ମାନ ସାହିତ୍ୟ ଏବଂ ଆଧ୍ୟାତ୍ମିକତା ପାଇଁ ସ୍ବର୍ଗତ ନୀଳକଣ୍ଠ ରାଉତଙ୍କୁ ପ୍ରଦାନ କରାଯାଇଥିଲା । ଏହି ସମ୍ମାନକୁ ପୁତ୍ର ଅଙ୍କିତ ରାଉତ ଏବଂ ଭ୍ରାତା ତ୍ରିଲୋଚନ ରାଉତ ଗ୍ରହଣ କରିଥିଲେ । ଦୁଇ ଶହରୁ ଅଧିକ ବିଶିଷ୍ଟ ବ୍ୟକ୍ତିଙ୍କୁ ଅନୁଷ୍ଠାନ ତରଫରୁ ସ୍ଵାଗତ ସମ୍ୱର୍ଦ୍ଧନା ପ୍ରଦାନ କରାଯାଇଥିଲା । କବୟିତ୍ରୀ ରଶ୍ମିତା ପତି ଧନ୍ୟବାଦ୍ ଅର୍ପଣ ଏବଂ ଯୋଗଗୁରୁ ସାଗରିକା ଜେନା ଶାନ୍ତି ମନ୍ତ୍ର ପାଠ କରିଥିଲେ ।
