ସରକାରୀ ନିୟମର ଖୋଳା ଉଲଂଘନ, କାର୍ଯ୍ୟାନୁଷ୍ଠାନ ଦାବି
ଓଡ଼ିଆ ବାର୍ତ୍ତା/ କୋକସରା (ହିରଣ୍ୟ ବେହେରା): ସରକାରଙ୍କ ନିୟମ ଗୋଟିଏ ପଟେ, ଅନ୍ୟପଟେ ଠିକା ସଂସ୍ଥାର ରାଜ୍ । ମୁଣ୍ଡ ଉପରେ ଅଗ୍ନିବର୍ଷି ଖରା ହେଉଥିବାବେଳେ ସରକାରୀ ନିୟମ କାନୁନକୁ ଫୁ’ କରି ଶ୍ରମିକଙ୍କୁ ଖଟାଉଛି ଠିକା ସଂସ୍ଥା । ଦିନର ତାପମାତ୍ରା ୪୦° ଉପରେ ରହୁଥିବାରୁ ଦିନ ୧୧ଟାରୁ ୩ଟା ମଧ୍ୟରେ କିଭଳି ଶ୍ରମିକମାନେ କାର୍ଯ୍ୟ ନକରିବେ ତାହା ଉପରେ ଗୁରୁତ୍ୱ ଦେଇ ସରକାର କଡ଼ା ନିୟମ ଜାରି କରିଛନ୍ତି । ହେଲେ କଳାହାଣ୍ଡି ଜିଲ୍ଲାରେ ପ୍ରଶାସନ ଓ ଶ୍ରମ ବିଭାଗର ଅଧିକାରୀ ମାନଙ୍କ ଅବହେଳା ଯୋଗୁଁ ବାସ୍ତବ ଚିତ୍ର କିନ୍ତୁ ଓଲଟା ଦେଖିବାକୁ ମିଳୁଛି । ଏପରି ଏକ ଚିତ୍ର ଦେଖିବାକୁ ମିଳିଛି କୋକସରା ବ୍ଲକ ୨୬ ନମ୍ବର ଜାତୀୟ ରାଜପଥ ବଙ୍ଗୋମୁଣ୍ଡା ଛକଠାରୁ କୁଲେରଗୁଡା ପର୍ଯ୍ୟନ୍ତ ଚାଲିଥିବା ପ୍ରଧାନ ମନ୍ତ୍ରୀ ସଡକ ନିର୍ମାଣ କାର୍ଯ୍ୟରେ । ସୂଚନା ଅନୁଯାୟୀ ଧର୍ମଗଡ଼ ଗ୍ରାମ୍ୟ ଉନ୍ନୟନ ବିଭାଗ ଦ୍ଵାରା କୋକସରା ବ୍ଲକର ବଙ୍ଗୋମୁଣ୍ଡା ଛକଠାରୁ କୁଲେରଗୁଡା ପର୍ଯ୍ୟନ୍ତ ପ୍ରଧାନ ମନ୍ତ୍ରୀ ସଡକ ଯୋଜନାରେ ବର୍ତ୍ତମାନ ରାସ୍ତା ନିର୍ମାଣ କାମ ଜାରି ରହିଛି । ଏହି ରାସ୍ତାର କୁଲେରଗୁଡା ଠାରେ ଖୁର୍ସେଲଗୁଡା ପର୍ଯ୍ୟନ୍ତ ପିଚୁ ପଡୁଥିବାବେଳେ ଟେମରା- ବଙ୍ଗୋମୁଣ୍ଡା ମଝିରେ ଏକ କଳଭଟ ତିଆରି ହେଉଛି । ଟାଇଁ ଟାଇଁ ଖରାରେ ଘରୁ ପଦାକୁ ଗୋଡ଼ କାଢି ହେଉ ନଥିବାବେଳେ ଏଠାରେ ନିୟୋଜିତ ଠିକାସଂସ୍ଥା ସରକାରଙ୍କର ନିୟମକୁ ଫୁ’ କରି ଦିନ ୧୨ଟା ବେଳର ଟାଣ ଖରାରେ ଶ୍ରମିକଙ୍କୁ ଖଟାଇ ଚାଲିଥିବା ଦେଖିବାକୁ ମିଳୁଛି । ରାଜ୍ୟର ଅନେକ ସହରରେ ଖରା ୪୦ ଡିଗ୍ରୀ ଉପରେ ରହିଛି। ସତେ ଯେପରି ତାତିଲା କଡେଇରେ ଭାଜି ହେଉଥିବା ପରି ମନେ ହେଉଥିବାବେଳେ କ୍ରମାଗତ ଭାବେ ତାପମାତ୍ରା ବୃଦ୍ଧି ପାଉଥିବାରୁ ଜନ ଜୀବନ ଅସ୍ତବ୍ୟସ୍ତ ହୋଇପଡିଛି । ସେପଟେ ଖରା ଦାଉରୁ ରକ୍ଷା ପାଇବା ପାଇଁ ସରକାର ବିଭିନ୍ନ ସଚେତନତା କାର୍ଯ୍ୟକ୍ରମ ସହ ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟାଳୟ ପାଇଁ ନିୟମ ମଧ୍ଯ ଜାରି କରିଛନ୍ତି । ତଥାପି ଏଠାରେ ନିର୍ମାଣ କାର୍ଯ୍ୟ କରୁଥିବା ଠିକା ସଂସ୍ଥା ଏମଏସ୍ ମା’ ଭବାନୀ ଇଞ୍ଜିନିୟରିଂ (କ) ଶ୍ରେଣୀର ଠିକାଦାର ସରକାରଙ୍କ ନୀତି ନିୟମକୁ ବେଖାତିରି କରି ଉଡ଼ାଇ ଦେଇଛନ୍ତି । କାର୍ଯ୍ୟ ସ୍ଥାନରେ ପାଣିର ମଧ୍ୟ ବ୍ୟବସ୍ଥା ଟିକେ ହୋଇ ନାହିଁ ।
୧୨ଟା ସମୟର ଟାଣ ଖରାରେ ଶ୍ରମିକଙ୍କୁ ଖଟାଉଥିବାବେଳେ ପ୍ରଶାସନ କିମ୍ବା ଶ୍ରମ ବିଭାଗ ପକ୍ଷରୁ କୌଣସି ଆଖିଦୃଶିଆ ପଦକ୍ଷେପ ନେବାରୁ ଶ୍ରମିକମାନେ ମରଣକୁ ବରଣ କରି ରୋଜଗାର ଆଶାରେ କାମ କରୁଥିବା ଦେଖିବାକୁ ମିଳିଛି । ଅନ୍ୟପଟେ ମହିଳା ମାନେ ୧୧ଟା ପରେ ଖରାରେ କାମ ପାଇଁ ବାରଣ କରୁଥିବା ବେଳେ ୧୨ଟା ସମୟର ପର୍ଯ୍ୟନ୍ତ କାମ କରିବାକୁ ସେଠାରେ ଥିବା ଠିକାସଂସ୍ଥାର କର୍ମଚାରୀମାନେ ଶ୍ରମିକଙ୍କୁ ଯୋର ଦେଉଥିବା କାମରେ ନିୟୋଜିତ କିଛି ମହିଳା ଶ୍ରମିକ କହିଛନ୍ତି । ସରକାରଙ୍କ ନିୟମକୁ ବେଖାତିର କରି ଏହି ଠିକା ସଂସ୍ଥା ପୁରୁଷ ଓ ମହିଳା ଶ୍ରମିକମାନଙ୍କୁ ଖରାରେ ଖାଟାଇ ଚାଲିଛନ୍ତି । ଟାଣ ଖରାରେ ଶ୍ରମିକମାନେ କାମ କରୁଥିବା ବେଳେ ଅଂଶୁଘାତର ଶିକାର ହେବା କଥାକୁ ଏଡ଼ାଇ ଦିଆଯାଇ ନପାରେ । ଜିଲ୍ଲା ପ୍ରଶାସନ ଓ ଶ୍ରମ ବିଭାଗ ଯଦି ସତର୍କ ହୋଇ ଏଥିପ୍ରତି ଦୃଷ୍ଟି ନଦେଲେ ଆଗାମୀ ଦିନରେ ଧନ ଜୀବନ ହାନୀ ହେବାର ଯଥେଷ୍ଟ ସମ୍ଭାବନା ରହିଛି । ଏଣୁ ଜିଲ୍ଲା ପ୍ରଶାସନ ସଂପୃକ୍ତ ଠିକାସଂସ୍ଥା ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି ।
